ពលរដ្ឋធ្វើការតវ៉ាប្រឆាំងលោក Jovenel Moise នៅក្រុងព័រអូប្រាំង។ AFP
.jpg)
ក្រុងព័រអូប្រាំងៈ ស្នូរកាំភ្លើងរប៉េះរប៉ោះបានលាន់ឮនៅតាមដងផ្លូវនានានៃក្រុងព័រអូប្រាំង ខណៈរដ្ឋាភិបាលនៅតែរក្សាភាពស្ងៀមស្ងាត់នៅចំពោះមុខនឹងការតវ៉ាដែលបានធ្វើឲ្យរដ្ឋធានីហៃទីជាប់គាំង និងបង្កឲ្យមានអំពើហិង្សាកើនឡើង។
ជាធម្មតាផ្លូវមួយចំនួនបានកកស្ទះចរាចរណ៍តែពេលនេះគ្មានមនុស្សទាល់តែសោះដូចជានៅតាមសាលារៀនហាងទំនិញ និងការិយាល័យក្នុងទីក្រុងត្រូវបានបិទទ្វារដោយសារតែភ័យខ្លាចមានអំពើហិង្សាកាន់តែកើនឡើងដែលបានបណ្តាលឲ្យមនុស្សមួយចំនួនស្លាប់ និងបរិយាកាសមិនប្រាកដប្រជាមួយកំពុងធ្វើឲ្យរដ្ឋាភិបាលរបស់ប្រធានាធិបតី Jovenel Moise មានការព្រួយបារម្ភយ៉ាងខ្លាំង។
របាំងការពារជាច្រើនត្រូវបានដាក់បិទផ្លូវមិនឲ្យចេញចូលក្នុងតំបន់មួយចំនួននៃរដ្ឋធានីនោះ និងក្រុងនានា ខណៈក្រុមអ្នកតវ៉ាបានចេញទៅតាមដងផ្លូវ ដោយបានទាមទារឲ្យប្រធានាធិបតី Jovenel Moise ចុះចេញពីតំណែងជុំវិញរបាយការណ៍ខ្លះថា គ្រប់គ្រងមិនបានល្អ និងមានការលួចបន្លំប្រាក់អភិវឌ្ឍន៍នៅក្នុងប្រទេសការ៉ាប៊ីនដ៏ក្រីក្រមួយនេះ។
ក្រោយពីមានភាពស្ងប់ស្ងាត់ភាពតានតឹងបានចាប់ផ្តើមរហូតមកដល់ថ្ងៃម្សិលមិញមានយុវជនរាប់រយនាក់ចេញពីសង្កាត់ក្រីក្ររបស់ក្រុងនេះបានដើរដង្ហែក្បួនឆ្ពោះទៅសង្កាត់ Petionville ជាសង្កាត់អ្នកមានទ្រព្យសម្បត្តិស្តុកស្តម្ភក្បែរខាងនៅក្រុងព័រអូប្រាំងដោយមានការគប់ដុំថ្មទៅលើផ្ទះជាច្រើនខ្នង ហើយប៉ូលិសបានបាញ់ឧស្ម័នបង្ហូរទឹកភ្នែក ដើម្បីបំបែកក្រុមអ្នកតវ៉ាទាំងនោះ៕ SK
