គណៈកម្មការសុខាភិបាលជាតិធ្វើសន្និសីទកាសែតអំពីមេរោគផ្លូវដង្ហើមប្រភេទថ្មី នៅការិយាល័យព័ត៌មានក្រុមប្រឹក្សារដ្ឋ។ Kyodo
.jpg)
ក្រុងប៉េកាំង៖ រដ្ឋាភិបាលចិនបាននិយាយកាលពីថ្ងៃពុធថា មនុស្ស ៩ នាក់បានស្លាប់ ក្រោយពីឆ្លងមេរោគផ្លូវដង្ហើមប្រភេទថ្មី ដែលរាលដាលនៅក្នុងប្រទេស ចិន និងបានអះអាងថា មនុស្ស ៤៤០ នាក់ នៅក្នុងខេត្តចំនួន ១៣ បានឆ្លងមេរោគ។
គណៈកម្មការសុខាភិបាលជាតិបានបង្ហាញទស្សនៈរបស់អ្នកជំនាញដែលថា មេរោគនេះបណ្តាលឲ្យឆ្លងជាច្រើនករណីរហូតមកទល់ពេលនេះសំដៅទៅក្រុងវ៉ូហាន នៃប្រទេស ចិនភាគកណ្តាល អាចរាលដាលបន្ថែមទៀតតាមរយៈការបំផ្លាស់ទី ខណៈដែលវាកាន់តែច្បាស់ថា មេរោគអាចឆ្លងពីមនុស្សទៅមនុស្ស។
គណៈកម្មការនេះបញ្ជាក់ថា ប្រទេសនេះនឹងបង្កើនកិច្ចសហការជាអន្តរជាតិនៅក្នុងការទប់ស្កាត់មិនឲ្យផ្ទុះជំងឺនេះ ស្របពេលមានរបាយការណ៍ថា មេរោគនេះបានរាលដាលដល់ប្រទេសដទៃទៀតនៅក្នុងនោះមានអាមេរិកដែរ។
យោងតាមគណៈកម្មការនោះបានឲ្យដឹងថា ត្រឹមពាក់កណ្តាលយប់ថ្ងៃអង្គារ ចំនួនស្លាប់នៅក្នុងប្រទេស ចិន បានកើនត្រឹមតែ ៣ នាក់ទេ និងចំនួនករណីបញ្ហាផ្លូវដង្ហើម ដោយសារមេរោគនេះបានកើនឡើងជាង ១០០ ករណី ពី ១ ថ្ងៃមុននេះ។
លោក លី ប៊ីន អនុប្រធានគណៈកម្មការនេះបានថ្លែងប្រាប់សន្និសីទសារព័ត៌មានថាការកើនឡើងចំនួនករណីនេះត្រូវការវិធីសាស្ត្រទប់ស្កាត់ឲ្យបានល្អប្រសើរ រួមទាំងធ្វើការស្វែងយល់អំពីជំងឺនេះឲ្យបានច្បាស់។
លោកបានបន្ថែមថា អ្នកស្លាប់ទាំងអស់បានកើតឡើងនៅខេត្តហ៊ូបេ។
លោក លី បានថ្លែងថា ប្រជាជនចិនរាប់លាននាក់ ត្រូវបានគេរំពឹងទុកនឹងធ្វើដំណើរនៅក្នុងស្រុក និងទៅបរទេសនៅពេលបុណ្យចូលឆ្នាំចិន ដែលនឹងចាប់ផ្តើមនៅថ្ងៃសុក្រ ប្រទេស ចិន នឹងអនុវត្តការគ្រប់គ្រងទៅលើការធ្វើដំណើរនៅក្នុង និងក្រៅក្រុងវ៉ូហាន និងរឹតបន្តឹងទៅលើការជួបជុំជាសាធារណៈនៅក្នុងខេត្តនេះទាំងមូល។
សន្និសីទសារព័ត៌មាននេះ ត្រូវបានធ្វើឡើងជាលើកដំបូងដោយរដ្ឋាភិបាលចិន ជុំវិញមេរោគផ្លូវដង្ហើមប្រភេទថ្មីនេះ។
ប្រទេស ថៃ កូរ៉េខាងត្បូង និងជប៉ុន បានអះអាងពីករណីឆ្លងមេរោគផ្លូវដង្ហើមប្រភេទថ្មី ខណៈតៃវ៉ាន់ និងអាមេរិក បានរាយការណ៍ ២៤ ម៉ោងចុងក្រោយថា មានករណីឆ្លងមេរោគប្រភេទថ្មីនេះ៕ Kyodo/PSA
