លោក ស៊ី ជីនភីង (ស្តាំ) ចាប់ដៃជាមួយមេដឹកនាំកូរ៉េខាងជើង លោក គីម ជុងអ៊ុន នៅមហាកំពែងប្រជាជនចិនក្រុងប៉េកាំង។ Yonhap ហេង ជីវ័ន
.jpg)
ក្រុងសេអ៊ូលៈ ប្រធានាធិបតីចិនលោក ស៊ី ជីនភីង បានទៅដល់ក្រុងព្យុងយ៉ាង កាលពីថ្ងៃព្រហស្បតិ៍ ដោយចាប់ផ្តើមដំណើរទស្សនកិច្ចរយៈពេល ២ ថ្ងៃ នៅកូរ៉េខាងជើង ដែលត្រូវបានគេជឿជាក់ថា ផ្តោតទៅលើការពង្រឹងសម្ព័ន្ធមិត្តរបស់ពួកគេ និងដោះស្រាយបញ្ហាផ្សេងៗ នៅក្នុងនោះមានកម្មវិធីអាវុធនុយក្លេអ៊ែររបស់កូរ៉េខាងជើងផងដែរ។
សារព័ត៌មាន Xinhua របស់ចិនបានរាយការណ៍ឲ្យដឹងថា យន្តហោះរបស់លោក ស៊ី ជីនភីង បានទៅដល់ទីក្រុងព្យុងយ៉ាង នៅម៉ោង ១១៤០ នាទីព្រឹក។
ការធ្វើដំណើរទស្សនកិច្ចជាលើកដំបូងទៅកាន់កូរ៉េខាងជើងរបស់ប្រមុខថ្នាក់ដឹកនាំរដ្ឋចិនក្នុងរយៈពេល ១៤ ឆ្នាំ និងជាលើកទី៥ ហើយ ចាប់តាំងពីក្រុងប៉េកាំង និងក្រុងព្យុងយ៉ាងបានបង្កើតទំនាក់ទំនងការទូតនៅក្នុងឆ្នាំ ១៩៤៩។ ប្រធានាធិបតីចិន សម័យនោះ គឺលោក ហ៊ូ ជីនតាវ បានធ្វើដំណើរទស្សនកិច្ចទៅកាន់ក្រុងព្យុងយ៉ាងកាលពីខែ តុលា ឆ្នាំ ២០០៥។
ការធ្វើដំណើរទស្សនកិច្ចរបស់លោក ស៊ី ជីនភីង ទៅកាន់ប្រទេសសម្ព័ន្ធមិត្តកុម្មុយនីស្តមួយនេះ បានលើកឡើងអំពីការជឿជាក់ ជុំវិញតួនាទីរបស់លោកនៅក្នុងកិច្ចខិតខំប្រឹងប្រែង ដើម្បីបន្តកិច្ចពិភាក្សាកម្មវិធីនុយក្លេអ៊ែរ រវាងក្រុងវ៉ាស៊ីនតោន និងក្រុងព្យុងយ៉ាង ដោយមានការព្រួយបារម្ភខ្លះៗថា ប្រទេស ចិន អាចបញ្ចូលភូមិសាស្ត្រនយោបាយដ៏ស្មុគស្មាញថ្មីមួយទៀត ដើម្បីចរចាភាពជាប់គាំងនៅពេលបច្ចុប្បន្ន។
នៅមុនដំណើរទស្សនកិច្ចរបស់លោកប្រធានាធិបតីចិន ស៊ី ជីនភីង អស់រយៈពេលជាច្រើនម៉ោងមុននោះ អាមេរិកបានដាក់ទណ្ឌកម្មថ្មីមួយទៀតទៅលើក្រុមហ៊ុនរបស់រុស្ស៊ីមួយដែលក្រុងវ៉ាស៊ីនតោន បានចោទប្រកាន់ពីបទជួយបញ្ចៀសទណ្ឌកម្មឲ្យកូរ៉េខាងជើង៕ Yonhap/SK
