លោករ៉េសិបតៃយីប អេរដូហ្គែន (ឆ្វេង) និងលោកដូណាល់ ត្រាំ។ AFP
.jpg)
ក្រុងអង់ការ៉ាៈ ប្រទេស តួកគី កាលពីថ្ងៃចន្ទ បានប្តេជ្ញាចិត្តថា ខ្លួននឹងមិនត្រូវរងការគំរាមកំហែងពីប្រធានាធិបតីអាមេរិក លោក ដូណាល់ ត្រាំ ដែលថានឹងបំផ្លាញសេដ្ឋកិច្ចរបស់ខ្លួន ប្រសិនបើក្រុងអង់ការ៉ាធ្វើការវាយប្រហារទៅលើក្រុមកងកម្លាំងឃើដ ខណៈកងទ័ពអាមេរិក បានដកចេញ ពីទឹកដីស៊ីរីនោះ។
ការគំរាមកំហែងរបស់លោកត្រាំ បានកើតឡើង ក្រោយពីក្រុងអង់ការ៉ា បានគំរាមបើកកិច្ចប្រតិបត្តិការឆ្លងកាត់ព្រំដែនថ្មីមួយប្រឆាំងកងកម្លាំងនៃអង្គភាពការពារប្រជាជនឃើដ (YPG) ដែលបាននិងកំពុងធ្វើការងារយ៉ាងជិតស្និទ្ធមួយជាមួយអាមេរិកនៅក្នុងសង្គ្រាមប្រឆាំងក្រុមរដ្ឋអ៊ិស្លាមជ្រុលនិយម (IS)។
ការគាំទ្ររបស់អាមេរិកចំពោះកងកម្លាំង YPG គឺជាប្រភពដ៏ធំមួយនៃភាពតានតឹងរវាងក្រុមសម្ព័ន្ធមិត្តរបស់អង្គការណាតូ។
រដ្ឋមន្ត្រីការបរទេសតួកគី លោក Mevlut Cavusoglu បានថ្លែងថា៖ «ពួកយើង បាននិយាយម្តងហើយម្តងទៀតថា ពួកយើងគ្មានការភ័យខ្លាចទេ ហើយយើងនឹងមិនត្រូវបានគេគំរាមកំហែង។
លោកបន្ថែមទៀតថា «ការគំរាមកំហែងដាក់ទណ្ឌកម្មសេដ្ឋកិច្ចប្រឆាំងតួកគីនោះ នឹងគ្មានប្រយោជន៍ឡើយ»។
លោក Ibrahim Kalin ជាអ្នកនាំពាក្យប្រធានាធិបតីតួកគី លោក រ៉េសិបតៃយីប អេរដូហ្គែន កាលពីពេលថ្មីៗនេះ បានថ្លែងថា ក្រុងអង់ការ៉ា នឹង «បន្តប្រយុទ្ធប្រឆាំងពួកគេទាំងអស់នោះ» ដោយនិយាយសំដៅទៅក្រុម IS និង YPG នៅក្នុងប្រទេស ស៊ីរី។
កាលពីថ្ងៃអាទិត្យ លោកប្រធានាធិបតី ដូណាល់ ត្រាំ បានព្រមានថា អាមេរិកនឹងដាក់ទណ្ឌកម្មសេដ្ឋកិច្ចប្រឆាំង នឹងតួកគី ប្រសិនបើពួកគេធ្វើការវាយប្រហារទៅលើក្រុមឃើដមែននោះ»៕ AFP/SK
