ក្រុងវ៉ាស៊ីនតោន៖ ប្រធានាធិបតីអាមេរិកលោក ដូណាល់ ត្រាំ បានព្រលយពាក្យកាលពីថ្ងៃអង្គារថា អាមេរិកអាចនឹងប្រើប្រាស់កងកម្លាំងយោធាប្រឆាំងកូរ៉េខាងជើង ប្រសិនបើចាំបាច់ ក្រោយពីក្រុងព្យុងយ៉ាងបានព្រមានថា ឱសានវាទនៃកិច្ចប្រជុំប្រចាំឆ្នាំសម្រាប់ការចរចាបញ្ហាលុបបំបាត់កម្មវិធីអាវុធនុយក្លេអ៊ែររបស់ប្រទេសទាំង ២ នឹងត្រូវបញ្ចប់នៅពេលខាងមុខនេះ។
លោក ដូណាល់ ត្រាំ បានគំរាមចាត់វិធានការយោធាឡើងវិញ ខណៈការចរចារវាងក្រុងវ៉ាស៊ីនតោន និងក្រុងព្យុងយ៉ាង បានជាប់គាំង អំពីថាតើនឹងត្រូវចាត់វិធានការលុបបំបាត់ កម្មវិធីអាវុធនុយក្លេអ៊ែររបស់កូរ៉ខាងជើងដោយរបៀបណា ជាមួយការសម្បទានរបស់អាមេរិក។
ប៉ុន្តែប្រធានាធិបតីអាមេរិក បានសង្កត់ធ្ងន់អំពីទំនាក់ទំនងឯកជនយ៉ាងជិតស្និទ្ធរបស់លោក ជាមួយមេដឹកនាំកូរ៉េខាងជើងលោក គីម ជុងអ៊ុន ដោយបានថ្លែងថា លោកសង្ឃឹមថា លោក គីម ជុងអ៊ុន នឹងនៅតែស្មោះត្រង់ចំពោះការប្តេជ្ញាចិត្តរបស់លោក ដើម្បីលុបបំបាត់កម្មវិធីអាវុធនុយក្លេអ៊ែររបស់ប្រទេសនេះ។
លោក ដូណាល់ ត្រាំ បានថ្លែងប្រាប់ក្រុមអ្នកកាសែតនៅក្នុងទីក្រុងឡុងដ៍ ជាទីដែលលោកកំពុងចូលរួមនៅក្នុងកិច្ចប្រជុំរបស់ក្រុមមេដឹកនាំអង្គការសន្ធិសញ្ញាអាត្លង់ទិកខាងជើងថា៖ «បច្ចុប្បន្នយើងមានយោធាយ៉ាងខ្លាំងក្លាបំផុត ដែលយើងមិនធ្លាប់មានពីមុន ហើយយើងបានពង្រីកអំណាចរបស់ប្រទេសដ៏ខ្លាំងក្លាបំផុតមួយនេះនៅក្នុងពិភពលោក»។
លោក ដូណាល់ ត្រាំ បានថ្លែងថា៖ «ហើយជាការពិតណាស់ យើងមិនត្រូវប្រើប្រាស់កម្លាំងយោធានោះទេ ប៉ុន្តែប្រសិនបើចាំបាច់ យើងនឹងប្រើប្រាស់វា ហើយប្រសិនបើចាំបាច់ យើងនឹងត្រូវតែប្រើប្រាស់យោធា»។
កាលពីពេលកន្លងទៅលោក ត្រាំ បានគំរាម «បំផ្លាញរបបកុម្មុយនីស្តមួយនេះទាំងស្រុង» កាលពីឆ្នាំ ២០១៧ នៅពេលមានភាពតានតឹងកាន់តែខ្លាំងឡើង ជុំវិញការសាកល្បងអាវុធនុយក្លេអ៊ែរ និងមីស៊ីលប៉ាលីស្ទិកអន្តរទ្វីបរបស់កូរ៉េខាងជើង។
កាលពីព្រឹកថ្ងៃអង្គារ អនុរដ្ឋមន្ត្រីការបរទេសកូរ៉េខាងជើង លោក រី ថែ-ស៊ុង បានចេញសេចក្តីថ្លែងការណ៍មួយ ដែលបានស្នើឲ្យអាមេរិកមានការចរចាឡើងវិញ ចាប់តាំងពីជំនួបកំពូលលើកទី ២ របស់លោក គីម និង ត្រាំ នៅវៀតណាម បានបរាជ័យនោះ៕ Yonhap/SK