ថៃគ្រោងនឹងចាក់វ៉ាក់សាំងកូវីដ ១៩ ឱ្យបាន ៧០% នៃចំនួនប្រជាជនត្រឹមខែកញ្ញានេះ
ថៃបានដាក់គោលដៅក្នុងការចាក់វ៉ាក់សាំងយ៉ាងតិច ១ ដូសឱ្យ ប្រជាជននៅក្នុងប្រទេសខ្លួនឲ្យបាន ៧០% ត្រឹមខែកញ្ញា។ នេះបើតាមការស្រង់សម្ដីរបស់លោក Anutin Charnvirakul រដ្ឋមន្ត្រីក្រសួងសុខាភិបាលថៃ ដោយសារព័ត៌មាន Reuters កាលពីថ្ងៃពុធ។
ប្រទេសអាស៊ីអាគ្នេយ៍ មិនទាន់បានចាប់ផ្ដើមចាក់វ៉ាក់សាំងទ្រង់ទ្រាយធំនោះទេ ដោយចាក់តាមក្រុមមនុស្សអាទិភាពនីមួយៗ។ ចាប់តាំងពីបើកយុទ្ធនាការចាក់វ៉ាក់សាំងកាលពីខែមីនាមក ថៃចាក់បាន ១,៥ លាននាក់ហើយ ដោយក្នុងនោះភាគច្រើនជាបុគ្គលិកសុខាភិបាល ហើយប្រើប្រាស់វ៉ាក់សាំង Sinovac។
អាជ្ញាធរថៃបានអនុញ្ញាតឱ្យប្រើប្រាស់វ៉ាក់សាំងចំនួន ៤ ប្រភេទដែលមានដូចជា វ៉ាក់សាំងក្រុមហ៊ុនចិន Sinovac, វ៉ាក់សាំងអង់គ្លេស AstraZeneca, វ៉ាក់សាំងអាមេរិក Johnson & Johnson និង Moderna៕
ហ៊ីម រដ្ឋា
