ក្រុមហ៊ុន Huawei បានឱ្យដឹងថា កំណើនប្រាក់ចំណូលក្រុមហ៊ុនក្នុងរយ:ពេល ៣ ត្រីមាសនៃឆ្នាំនេះ មានសម្ទុះយឺត ខណ:ប្រាក់ចំណេញបានធ្លាក់ចុះ ក្រោយទទួលរងទណ្ឌកម្មសហរដ្ឋអាមេរិក។
ក្រុមហ៊ុនទូរគមនាគមន៍ ដែលមានទីតាំងនៅទីក្រុងសិនជិនមួយនេះបានឱ្យដឹងកាលពីថ្ងៃសុក្រសប្តាហ៍មុនថា ក្រុមហ៊ុនរកប្រាក់ចំណូលបានចំនួន ៦៧១,៣ ពាន់លានយន់ (៩៨,៥៧ ពាន់លានដុល្លារ) ក្នុងរយ:ពេល ៩ ខែដំបូងក្នុងឆ្នាំ ២០២០ ដែលកើន ៩,៩% ធៀបនឹងចំណូលចំនួន ៦១០,៨ ពាន់លានយន់ ដែលក្រុមហ៊ុនបានរាយការណ៍កាលពីឆ្នាំមុន។
តួលេខ ៩,៩% នេះគឺជាអត្រាកំណើនមួយទាបធៀបនឹងកំណើន ២៤% ក្នុងរយ:ពេល ៩ ខែដំបូងដូចគ្នាក្នុងឆ្នាំ ២០១៩។ ចំណែកប្រាក់ចំណេញសុទ្ធរបស់ក្រុមហ៊ុនបានកើន ៨% ក្នុងរយ:ពេល ៩ ខែនៃឆ្នាំនេះ ដែលទាបជាងប្រាក់ចំណេញ ៨,៧% ដែលរកបានកាលពីឆ្នាំមុន។
ក្រុមហ៊ុនទូរគមនាគមន៍ដ៏ធំរបស់ប្រទេសចិន មួយនេះ ទទួលរងផលប៉ះពាល់យ៉ាងខ្លាំងបន្ទាប់ពីទីក្រុងវ៉ាស៊ីនតោនដាក់ទណ្ឌកម្មទៅលើអាជីវកម្មពួកគេ។
កាលពីឆ្នាំមុនក្រុមហ៊ុន Huawei ត្រូវបានដាក់បញ្ចូលទៅក្នុង «បញ្ជីខ្មៅ» របស់សហរដ្ឋអាមេរិក ដែលធ្វើឱ្យក្រុមហ៊ុនរងការហាមឃាត់ការនាំចេញផលិតផលទៅកាន់សហរដ្ឋអាមេរិក និងការផ្គត់ផ្គង់ «បន្ទះឈីប» ដែលក្រុមហ៊ុនត្រូវការជាចាំបាច់សម្រាប់ផលិតឧបករណ៍ទូរគមនាគមន៍ និងទូរស័ព្ទដៃត្រូវបានកាត់ផ្តាច់។
លើសពីនេះទៀត សហរដ្ឋអាមេរិកក៏បានហាមឃាត់ក្រុមហ៊ុនផលិតឧបករណ៍អេឡិចត្រូនិកពិភពលោក ដែលប្រើប្រាស់សូហ្វវែរ (software) និងគ្រឿងម៉ាស៊ីនអាមេរិកមិនឱ្យផ្គត់ផ្គង់ឧបករណ៍ទៅក្រុមហ៊ុន Huawei បើសិនជាគ្មានអាជ្ញាប័ណ្ណពីសហរដ្ឋអាមេរិក។
ទន្ទឹមនឹងនេះក្រុមហ៊ុន Google ក៏បានផ្តាច់ទំនាក់ទំនងជាមួយក្រុមហ៊ុនទូរគមនាគមន៍ Huawei ដោយមិនអនុញ្ញាតឱ្យទូរស័ព្ទដៃរបស់ក្រុមហ៊ុន Huawei ប្រើប្រាស់ប្រព័ន្ធប្រតិបត្តិការ Android របស់ខ្លួន។ ការផ្តាច់ប្រព័ន្ធប្រតិបត្តិការ Android បានធ្វើឱ្យទីផ្សារលក់ទូរស័ព្ទដៃរបស់ក្រុមហ៊ុន Huawei នៅក្រៅប្រទេសធ្លាក់ចុះយ៉ាងខ្លាំង។
ក្រុមហ៊ុន Huawei មិនបានប្រាប់ឱ្យដឹងថាផ្នែកណាមួយនៃអាជីវកម្មរបស់ខ្លួនដែលធ្វើឱ្យក្រុមហ៊ុនកើនប្រាក់ចំណូលនោះទេ។
កាលពីដើមឆ្នាំនេះ Huawei បានប្រកាសថា ផ្នែកអាជីវកម្មផលិតផលទូទៅរបស់ខ្លួន ដែលរួមមានផ្នែកទូរស័ព្ទដៃបានធ្វើឱ្យធ្លាក់ចំណូលអស់ ១២ ពាន់លានដុល្លារ បើប្រៀបធៀបទៅនឹងគោលដៅរបស់ពួកគេសម្រាប់ឆ្នាំ ២០១៩។
សម្រាប់រយៈពេល ៣ ត្រីមាសក្នុងឆ្នាំនេះ ក្រុមហ៊ុន Huawei បានឱ្យដឹងថា ប្រាក់ចំណូលដែលខ្លួនរកបាន គឺដូចការរំពឹងទុក។
ក្រុមហ៊ុនបានឱ្យដឹងថែមទៀតក្នុងសេចក្តីប្រកាសព័ត៌មានមួយថា៖ «ខណ:ពេលពិភពលោកជួបវិបត្តិកូវីដ ១៩ ការផ្គត់ផ្គង់របស់ក្រុមហ៊ុន Huawei នៅលើពិភពលោក កំពុងទទួលរងសម្ពាធខ្លាំង ចំណែកឯចង្វាក់ផលិតកម្មវិញ ក៏ទទួលការលំបាកច្រើនដែរ»។
លោក Richard Yu នាយកប្រតិបត្តិក្រុមអាជីវកម្មអតិថិជនរបស់ក្រុមហ៊ុន Huawei បានមានប្រសាសន៍នៅក្នុងការបង្ហាញទូរស័ព្ទដៃទំនើបសេរី Mate 40 កាលពីថ្ងៃព្រហស្បតិ៍ថា៖ «ក្រុមហ៊ុនកំពុងស្ថិតនៅក្នុងស្ថានភាពលំបាកបំផុត ហើយកំពុងទទួលរងទុក្ខដោយសារទណ្ឌកម្មចុងក្រោយរបស់សហរដ្ឋអាមេរិក»។
នាសប្តាហ៍នេះ ប្រទេសស៊ុយអែត បានក្លាយជាប្រទេសចុងក្រោយបង្អស់ ដែលហាមក្រុមហ៊ុនទូរគមនាគមន៍ Huawei និងក្រុមហ៊ុន ZTE ដែលជាក្រុមហ៊ុនផលិតឧបករណ៍ទូរគមនាគមន៍ចិនមួយផ្សេងទៀតមិនឱ្យស្ថាបនាបណ្តាញទូរស័ព្ទចល័ត 5G ដោយលើកឡើងថា ខ្លាចមានហានិភ័យដល់សន្តិសុខជាតិ។
កាលពីដើមឆ្នាំនេះ ចក្រភពអង់គ្លេស ក៏បានប្តូរចិត្តលែងឱ្យក្រុមហ៊ុនទូរគមនាគមន៍ Huawei ចូលរួមក្នុងការស្ថាបនាបណ្តាញ 5G ដោយលើកឡើងពីការបារម្ភផ្នែកសន្តិសុខជាតិ និងភាពមិនប្រាកដប្រជានៃខ្សែផ្គត់ផ្គង់ជាសកលរបស់ក្រុមហ៊ុន Huawei។
ក្រុមហ៊ុនទូរគមនាគមន៍ Huawei បានទទួលការបដិសេធម្តងហើយម្តងទៀត ក្នុងហេតុផលថាផលិតផល 5G របស់ពួកគេអាចនឹងបង្កហានិភ័យដល់សន្តិសុខជាតិរបស់ប្រទេសផ្សេងៗ៕
អ៊ឹង ម៉េងគង់