ក្រុងវ៉ាស៊ីនតោន៖ យោងតាមប្រព័ន្ធផ្សព្វផ្សាយអាមេរិកបានឲ្យដឹងកាលពីថ្ងៃសៅរ៍ថា ទីប្រឹក្សាសន្តិសុខជាតិរបស់ប្រធានាធិបតីអាមេរិកលោក ដូណាល់ ត្រាំ គឺលោក រូប៊ឺត អូប្រៀន បានថ្លែងថា លោកមិនបានមើលឃើញភ័ស្តុតាងណាមួយ ដែលប្រទេស រុស្ស៊ី នឹងជួយលោក ដូណាល់ ត្រាំ ឲ្យជាប់ឆ្នោតជាថ្មីនោះទេ។
សារព័ត៌មាន ABC បានចេញផ្សាយបទសម្ភាសរបស់លោក អូប្រៀន ត្រូវបានចុះផ្សាយកាលពីថ្ងៃអាទិត្យនៅអំឡុងពេលដែលលោក អូប្រៀន បានថ្លែងថា លោកមិនបានដឹងអំពីការជ្រៀតជ្រែកជាសក្តានុពលរបស់ប្រទេស រុស្ស៊ី នៅក្នុងការបោះឆ្នោតរបស់អាមេរិកនៅឆ្នាំ ២០២០ នេះទេ។
លោក អូប្រៀន បានថ្លែងថា៖ «ខ្ញុំមិនបានមើលឃើញចារកម្មណាមួយ ដែលប្រទេស រុស្ស៊ី កំពុងធ្វើអ្វីមួយ ដើម្បីព្យាយាមជួយឲ្យលោកប្រធានាធិបតី ដូណាល់ ត្រាំ ឈ្នះការឆ្នោតជាថ្មីនោះឡើយ»។
លោកបានថ្លែងបន្ថែមថា៖ «ចំណែកសាររបស់យើងផ្ញើជូនប្រជាជនរុស្ស៊ី មិនទាក់ទងនឹងការបោះឆ្នោតរបស់អាមេរិកទេ។ យើងមានការរឹតបន្តឹងចំពោះប្រទេស រុស្ស៊ី ហើយយើងការពារសន្តិសុខយ៉ាងតឹងរ៉ឹងបន្ថែមទៀត នៅពេលបោះឆ្នោតខាងមុខនេះ»។
ការអត្ថាធិប្បាយរបស់លោក អូប្រៀន បានធ្វើឡើង ក្រោយពីកាសែត New York Times បានរាយការណ៍កាលពីដើមសប្តាហ៍មុនថា មន្ត្រីស៊ើបអង្កេតកាលពីពេលថ្មីៗនេះ បានផ្តល់ព័ត៌មានលម្អិតដល់គណៈកម្មាធិការស៊ើបអង្កេតសភាអំពីការជ្រៀតជ្រែករបស់រុស្ស៊ីក្នុងការបោះឆ្នោតប្រធានាធិបតី US៕ Xinhua/SK