ទូកដឹកជនចំណាកស្រុករ៉ូហ៊ីងយ៉ា ត្រូវបានឃាត់នៅសមុទ្រម៉ាឡេស៊ី។AFP
.jpg)
ក្រុងគូឡាឡាំពួ៖ មន្ត្រីជាន់ខ្ពស់ម្នាក់បានថ្លែងថា ប្រទេស ម៉ាឡេស៊ី កាលពីថ្ងៃអាទិត្យបានឃាត់ខ្លួនជនមូស្លីមរ៉ូហ៊ីងយ៉ា ២០២ នាក់ ដែលបានមកដល់ដោយខុសច្បាប់តាមទូកដោយបានលើកឡើងពីការភ័យខ្លាចថា ក្រុមជួញដូរមនុស្សធ្វើសកម្មភាពជាថ្មី ថ្វីបើមានការរាលដាលវីរុសកូរ៉ូណាក្តី។
លោកស្រី ហ្សូលីនដា រ៉ាមលី អនុប្រធាននៃទីភ្នាក់ងារអនុវត្តច្បាប់ដែនសមុទ្រម៉ាឡេស៊ីបានថ្លែងប្រាប់ AFP ថាទូកនេសាទធំ ១ គ្រឿង បានដឹកជនចំណាកស្រុករ៉ូហ៊ីងយ៉ាទៅកាន់កោះរមណីយដ្ឋានឡាងកាវីភាគខាងជើង។
ប្រទេស ម៉ាឡេស៊ី គឺជាទិសដៅអំណោយផលសម្រាប់ក្រុមជនចំណាកស្រុកមកពីមីយ៉ាន់ម៉ាជាប្រទេសភាគច្រើនកាន់សាសនាមូស្លីម ដែលមានជនភាគតិចរ៉ូហ៊ីងយ៉ាយ៉ាងច្រើនរស់នៅ។
ដោយមានឱកាសតិចតួចទទួលបានការងារធ្វើ និងការអប់រំនៅក្នុងប្រទេស មីយ៉ាន់ម៉ា ឬជំរំជនភៀសខ្លួននានានៅក្នុងប្រទេស បង់ក្លាដែស ជនរ៉ូហ៊ីងយ៉ារាប់ពាន់នាក់ បានព្យាយាមទៅដល់ប្រទេសជាច្រើននៅអាស៊ីអាគេ្នយ៍។
លោកស្រី ហ្សូលីនដា បានថ្លែងថា ជនចំណាកស្រុកទាំងនោះ ត្រូវបានឃាត់ខ្លួនដោយអាជ្ញាធរ ដើម្បីសាកសួរហើយនិងត្រូវបានប្រគល់ទៅឲ្យមន្ត្រីអន្តោប្រវេសន៍។
លោកស្រីបានថ្លែងនៅក្នុងសេចក្តីថ្លែងការណ៍មួយថា៖ «អាជ្ញាធរកំពុងស៊ើបអង្កេតលើពាក្យបណ្តឹងរបស់ជនចំណាកស្រុកថា មានមនុស្ស ៣ នាក់ គឺម្ចាស់ទូក និងអ្នកធ្វើការ ២ នាក់ គឺជាអ្នកគ្រប់គ្រងក្រុមរត់ពន្ធមនុស្ស»៕ AFP/PSA
