លោកស្រីថេរិសា ម៉េ (ស្តាំ) ពិភាក្សាជាមួយលោកប្រាយុធ ចាន-អូចា។ AFP
.jpg)
ក្រុងឡុងដ៍ៈ នាយករដ្ឋមន្ត្រីអង់គ្លេស លោកស្រី ថេរិសា ម៉េបានអំពាវនាវឲ្យមានការបោះឆ្នោត ដោយសេរីនិងបើកចំហរនៅក្នុងប្រទេសថៃ ខណៈលោកស្រីបានជួបពិភាក្សាជាមួយលោកនាយករដ្ឋមន្ត្រី ប្រាយុធ ចាន-អូចា នៅក្នុងក្រុងឡុងដ៍កាលពីថ្ងៃពុធនោះ។
នៅក្នុងអំឡុងជំនួបពិភាក្សា លោកឧត្តមសេនីយ៍ ប្រាយុធ បានធានាចំពោះលោកស្រីម៉េថា ប្រទេសថៃ នឹងរៀបចំធ្វើការបោះឆ្នោតទូទៅ នៅឆ្នាំក្រោយ។
លោកឧត្តមសេនីយ៍ប្រាយុធអតីតប្រមុខកងទ័ព ដែលបានរឹបអូសអំណាចពីរដ្ឋាភិបាលស៊ីវិល នៅក្នុងរដ្ឋប្រហារឆ្នាំ២០១៤ នឹងជួបប្រធានាធិបតីបារាំងលោកអាម៉ានុយអែលម៉ាក្រុង នៅថ្ងៃចន្ទ ជាផ្នែកនៃដំណើរទស្សនកិច្ចនៅអឺរ៉ុបដែលត្រូវបានដឹងឮយ៉ាងសុះសាយនោះ។
អ្នកនាំពាក្យរបស់លោកស្រីបានថ្លែងក្រោយជំនួបនោះ ថា លោកស្រីនាយករដ្ឋមន្ត្រី បានជំរុញឲ្យមានការរីកចម្រើនឆ្ពោះទៅរកការបោះឆ្នោតដោយសេរីនិងបើកចំហរនៅក្នុងប្រទេសថៃ ឲ្យស្របតាមបទដ្ឋានអន្តរជាតិនៅក្នុងនោះមានការរឹតត្បិតទៅលើគណបក្សនយោបាយ ដែលគួរត្រូវបានលុបចោលបម្រាមនៅដំណាក់កាលដំបូង។
ខណៈនាយករដ្ឋមន្ត្រីទាំងពីរកំពុងពិភាក្សាគ្នា ក្រុមរដ្ឋមន្ត្រីការបរទេសក៏មានជំនួបផ្ទាល់របស់ពួកគេផងដែរ។
រដ្ឋមន្ត្រីការបរទេសអង់គ្លេសលោក Boris Johnson និយាយលើគេហទំព័រធ្វីតធើថាលោកមានក្តីរីករាយចំពោះការទទួលស្វាគមន៍ លោករដ្ឋមន្ត្រីការបរទេសថៃ Don Pramudwinai៕ PSA
