ក្រុងរ៉ូមៈ នាវាការពារឆ្នេរអ៊ីតាលី ដែលដឹកជនចំណាកស្រុកជាង ៥០០ នាក់ រួមទាំងមនុស្សរាប់សិបនាក់ ដែលត្រូវបានជួយសង្គ្រោះដោយទាហានជើងទឹក របស់ប្រទេសលីប៊ី កាលពីសប្តាហ៍មុន បានទៅដល់កំពង់ផែមួយកាលពីយប់ថ្ងៃអង្គារនៅកោះស៊ីស៊ីលីប៉ុន្មានថ្ងៃ បន្ទាប់ពីរដ្ឋមន្ត្រីក្រសួងមហាផ្ទៃថ្មី បានហាមប្រាមនាវាជួយសង្គ្រោះរបស់អង្គការក្រៅរដ្ឋាភិបាលមិនឲ្យចូលចតនៅក្នុងឆ្នេរសមុទ្រប្រទេសអ៊ីតាលី។
អង្គការ UNHCR ប្រចាំនៅ អ៊ីតាលី បានថ្លែងថា៖ «នាវា Diciotti នៅទីបំផុត បានចូលចតនៅកំពង់ផែ Pozzallo ដោយយកមនុស្ស ៥២២ នាក់មកដល់កំពង់ផែសុវត្ថិភាព»។
ទីភ្នាក់ងារជនភៀសខ្លួន បានថ្លែងថា៖ «ពួកគេ ត្រូវបានជួយសង្គ្រោះនៅក្នុងប្រតិបត្តិការជាច្រើន ក្នុងនោះ ៤២ នាក់ក្នុងចំណោមពួកគេ បានរួចផុតពីការលង់ទឹក ហើយពួកគេត្រូវការការថែទាំទាំងផ្នែកវេជ្ជសាស្ត្រជាបន្ទាន់ និងការគាំពារផ្នែកចិត្តសាស្ត្រ»។
ទីភ្នាក់ងារនេះបន្ថែមថា វាធ្វើឡើងរួមជាមួយអាជ្ញាធរអ៊ីតាលី និងអង្គការមនុស្សធម៌។
ជនចំណាកស្រុក ១០ នាក់រួមមាន កុមារ ៦ នាក់ ស្ត្រី ៣ នាក់ និងបុរសម្នាក់ ត្រូវបានបញ្ជូនទៅកំពង់ផែ Pozzallo រួចហើយ និងត្រូវបានយកទៅមើលថែដោយកាកបាទក្រហមអ៊ីតាលី។
គេមិនដឹងថា ពួកគេគឺជាផ្នែកនៃក្រុមជនចំណាកស្រុក ៤១ នាក់ ដែលត្រូវបានជួយសង្គ្រោះពីនាវាមួយ នៅម្តុំប្រទេសលីប៊ីកាលពីថ្ងៃអង្គារសប្តាហ៍មុន ដោយ USNS Trenton ឬ អត់នោះទេ ដែលត្រូវបានផ្ទេរពួកគេទៅដាក់នាវា Diciotti ។
យោងតាមទាហានជើងទឹកអាមេរិកបានឲ្យដឹងថា អ្នកបើក នាវាដឹកជញ្ជូនរបស់អាមេរិក ក៏បានប្រទះឃើញសាកសពចំនួន ១២ នាក់ផងដែរ នៅលើសមុទ្រ ប៉ុន្តែមិនអាចរកពួកគេឃើញនៅក្នុងអំឡុងការស្រាវជ្រាវស្វែងរកបន្ទាប់ពីការជួយសង្គ្រោះ។ នាវានៅជិតនោះពី NGO Sea Watch សុខចិត្តជួយឲ្យតែខ្លួន អាចចូលចតជាមួយជនចំណាកស្រុកនៅកំពង់ផែអ៊ីតាលី ដែលអាជ្ញាធរអ៊ីតាលី បានបដិសេធ។
លោក Matteo Salvini រដ្ឋមន្ត្រីក្រសួងមហាផ្ទៃអ៊ីតាលី ដែលនិយមស្តាំ បានព្រមានថា នាវាជួយសង្គ្រោះជនចំណាកស្រុករបស់អង្គការក្រៅរដ្ឋាភិបាល មិនត្រូវបានអនុញ្ញាតឲ្យដាក់ «ទំនិញមនុស្ស» នៅក្នុងកំពង់ផែអ៊ីតាលី។
រដ្ឋាភិបាលថ្មីអ៊ីតាលីកាល ពីសប្តាហ៍មុន បានហាមប្រាមនាវា Aquarius របស់ NGO ដោយមានជនចំណាកស្រុកជាង ៦០០ នាក់នៅក្នុងនាវានោះមិនឲ្យចូលចតនៅក្នុងទឹកដីអ៊ីតាលី ដោយបានបង្កឲ្យមានចលាចល និងជម្លោះការទូតកើតឡើង៕