ក្រុងហ្គីប្រាលតាៈ នាវាដឹកប្រេងអ៊ីរ៉ង់ស្ថិតនៅក្នុងចំណុចកណ្តាលនៃជម្លោះការទូតនោះ បានចេញដំណើរពីក្រុងហ្គីប្រាលតាហើយ ក្រោយពីអង់គ្លេស បានបដិសេធមិនធ្វើទៅតាមសំណើរបស់អាមេរិកឲ្យឃាត់ទុកនាវានោះ។
យោងតាមវេបសាយចរាចរណ៍តាមសមុទ្រ (Marine Traffic) ដែលតាមដានស្ថានការណ៍នោះ បានឲ្យដឹងថា នាវាដឹកប្រេងដែលត្រូវបានឃាត់ទុកចាប់តាំងពីថ្ងៃទី ៤ ខែ កក្កដា នៅម្តុំឆ្នេរសមុទ្រក្រុងហ្គីប្រាលតា បានលើកយុថ្កាកាកាលពីរសៀលថ្ងៃអាទិត្យ ហើយបានចាប់ផ្តើមចេញដំណើរទៅទិសខាងត្បូង។
ក្រុមអាជ្ញាធរនៅប្រទេស អង់គ្លេស មិនបានបញ្ជាក់អះអាងអំពីការចេញដំណើររបស់នាវានោះទេ។
ក្រុងហ្គីប្រាលតា បានឃាត់នាវា Grace 1កាលពីថ្ងៃទី ៤ ខែ កក្កដា ដោយមានការសង្ស័យថា នាវានេះកំពុងដឹកប្រេងទៅកាន់ប្រទេស ស៊ីរី ជាការបំពានទណ្ឌកម្មរបស់សហភាពអឺរ៉ុប ដោយបានបង្កឲ្យមានភាពតានតឹងកាន់តែខ្លាំងឡើង នៅក្នុងការទំនាក់ទំនងរវាងក្រុងតេអេ-រ៉ង់ និងក្រុងឡុងដ៍។ ប្រទេស អ៊ីរ៉ង់ បានបដិសេធម្តងហើយម្តងទៀតថា ខ្លួនមិនបានបំពានច្បាប់ណាមួយនោះទេ។
តុលាការនៃក្រុងហ្គីប្រាលតាបានបញ្ជាឲ្យដោះលែងនាវានោះ កាលពីថ្ងៃព្រហស្បតិ៍ ដោយក្រុមមន្ត្រីអ៊ីរ៉ង់បានថ្លែងថា យានិកថ្មីម្នាក់បានទៅដល់កន្លែងចតនាវានោះ ហើយបច្ចុប្បន្ននាវានោះបានដាក់ឈ្មោះថ្មីថា Adrian Darya ហើយវាអាចផ្ទុកប្រេងបានចំនួន ២,១ លានបារ៉ែល។
ប៉ុន្តែកាលពីថ្ងៃសុក្របានប៉ុន្មាននាទីក្រោយមក ក្រសួងយុត្តិធម៌អាមេរិកបានស្នើឲ្យឃាត់នាវានោះ ដោយបានចោទប្រកាន់ថា បានជាប់ពាក់ព័ន្ធនៅក្នុងការគាំទ្រការដឹកជញ្ជូនទំនិញដោយខុសច្បាប់ ទៅកាន់ប្រទេស ស៊ីរី ដោយក្រុមកងការពារបដិវត្តន៍អ៊ិស្លាមអ៊ីរ៉ង់ ដែលក្រុមនេះ ត្រូវបានចុះក្នុងបញ្ជីខ្មៅរបស់ក្រុងវ៉ាស៊ីនតោន ថាជាក្រុមភេរវករ។
រដ្ឋាភិបាលក្រុងហ្គីប្រាលតាបានបដិសេធសំណើអាមេរិក ដោយបានថ្លែងថា ខ្លួនមិនអាចស្នើសុំឲ្យតុលាការចេញដីកាឃាត់នាវាដឹកប្រេងនោះឡើយ ដោយសារការដាក់ទណ្ឌកម្មរបស់អាមេរិកប្រឆាំងអ៊ីរ៉ង់ មិនត្រូវបានអនុវត្តនៅក្នុងសហភាពអឺរ៉ុប។
នាវាដឹកប្រេងអ៊ីរ៉ង់ បានវិលត្រឡប់ទៅកាន់ភាគខាងកើតកាលពីព្រឹកថ្ងៃចន្ទ ទោះបីជាគោលដៅចុងក្រោយរបស់ខ្លួនមិនបានបញ្ជាក់ឲ្យបានច្បាស់លាស់ក្តី។
នៅក្នុងការសម្រេចចិត្តរបស់ខ្លួន ដែលបានបញ្ជាឲ្យដោះលែងនាវានោះ ក្រុងហ្គីប្រាលតាបានថ្លែងថា ខ្លួនទទួលបានការធានាពីភាគីអ៊ីរ៉ង់ថា នាវានោះនឹងមិនធ្វើដំណើរទៅកាន់ប្រទេសណាមួយ ដែលជាគោលដៅដាក់ទណ្ឌកម្មរបស់សហភាពអឺរ៉ុបនោះឡើយ។
អ៊ីរ៉ង់បានបដិសេធថា ខ្លួនមិនបានសន្យាអំពីគោលដៅរបស់នាវានោះ ដើម្បីធានាឲ្យដោះលែងនោះទេ។
អ្នកនាំពាក្យក្រសួងការបរទេសរបស់អ៊ីរ៉ង់លោក Abbas-Mousavi បានថ្លែងថា៖ «អ៊ីរ៉ង់មិនបានផ្តល់ការធានាអំពីនាវា Grace 1 ថា នឹងមិនទៅកាន់ប្រទេស ស៊ីរី ជាថ្នូរទៅនឹងការដោះលែងទេ»៕ AFP/SK