ក្រុងប៊្រុចសែល៖ ប្រមុខការទូតប្លុកអឺរ៉ុបបានថ្លែងកាលពីថ្ងៃចន្ទថា ប្រទេសសមាជិកអឺរ៉ុបនៅតែមានការខ្វែងគំនិតគ្នា ជុំវិញព័ត៌មានលម្អិតអំពីបេសកកម្មផ្លូវទឹក ដើម្បីអនុវត្តបម្រាមលក់ដូរអាវុធនៅប្រទេស លីប៊ី ដែលហែកហួរដោយសង្គ្រាមមួយនេះ។
ប្រទេសទាំង ២៧ បានឯកភាពគ្នានៅក្នុងគោលការណ៍ ដើម្បីបង្កើនកិច្ចប្រតិបត្តិការ Irene ទ្វេដងនៅក្នុងសមុទ្រមេឌីទែរ៉ាណេកាលពីខែមុន ប៉ុន្តែពួកគេនៅតែស្ថិតនៅក្នុងជម្លោះ ជុំវិញអ្វីដែលត្រូវធ្វើជាមួយក្រុមជនចំណាកស្រុក ដែលអាចនឹងត្រូវបានលើកយកមកពិភាក្សា នៅក្នុងការងាររបស់ខ្លួន។
រដ្ឋមន្ត្រីការបរទេសរបស់អ៊ីតាលី គឺលោក លីជី ឌី ម៉ៃអូ បានថ្លែងថា រដ្ឋាភិបាលរបស់លោកនៅតែបដិសេធមិនឲ្យប្រើប្រាស់កំពង់ផែរបស់ខ្លួន ឲ្យក្រុមជនចំណាកស្រុកចូលចតជាដាច់ខាត ដោយបានអះអាងថា ខ្លួនត្រូវការយកចិត្តទុកដាក់ទៅលើកម្លាំងរបស់ខ្លួន ដើម្បីប្រយុទ្ធប្រឆាំងការឆ្លងរីករាលដាលមេរោគកូរ៉ូណា ប្រភេទថ្មីដ៏ចម្លែកនេះ។
ប៉ុន្តែប្រមុខការទូតប្រទេសអឺរ៉ុប លោក ចូសេប ប៊ូររីលល៍ បានអះអាងថា ជាមួយ «សុឆន្ទៈ» បេសកកម្មនេះ នៅតែអាចរៀបចំឡើង និងដំណើរការនៅត្រឹមចុងខែមីនា នេះ តាមការគ្រោងទុក។
លោក ប៊ូររីលល៍ បានថ្លែងប្រាប់ក្រុមអ្នកកាសែត ក្រោយពីកិច្ចពិភាក្សាជាមួយក្រុមរដ្ឋមន្ត្រីការបរទេសទាំង ២៧ ដែលបានរៀបចំធ្វើឡើងតាមរយៈវីដេអូខន់ហ្វឺរិន ដោយសារការឆ្លងរាលដាលមេរោគផ្លូវដង្ហើមថា៖ «មានការរីកចម្រើនជាច្រើនត្រូវបានធ្វើឡើង ប៉ុន្តែនៅតែមានបញ្ហាខ្លះ មិនទាន់សម្រេចនៅឡើយ»។
«មានបញ្ហាមួយចំនួនដែលមិនមានការឯកភាពគ្នារវាងក្រុមប្រទេសជាសមាជិកទាំងនេះទៅលើនីតិវិធីចាប់ផ្តើមចេញនាវា»៕ AFP/SK