លោកនាយករដ្ឋមន្ត្រីហ្ស៊កដានី អូម៉ារ រ៉ាស់ហ្សាស់ ធ្វើសន្និសីទសារព័ត៌មាន។ រូប AFP
.jpg)
ក្រុងអាម៉ាន់៖ ទីភ្នាក់ងារសារព័ត៌មាន Petra ដែលគ្រប់គ្រងដោយរដ្ឋបានរាយការណ៍ថា ប្រទេស ហ្ស៊កដានី និងអង្គការសន្ធិសញ្ញាអាត្លង់ទិកខាងជើង (NATO) កាលពីថ្ងៃចន្ទ បានពិភាក្សាគ្នានៅឯកិច្ចប្រជុំមួយនៅក្នុងទីក្រុងអាម៉ាន់ ដែលជាមធ្យោបាយ ដើម្បីបង្កើនកិច្ចសហប្រតិបត្តិការ និងការផ្លាស់ប្តូរជំនាញគ្នាទៅវិញទៅមក។
នៅឯកិច្ចប្រជុំរវាងគណៈប្រតិភូរបស់អង្គការណាតូ និងនាយករដ្ឋមន្ត្រីប្រទេស ហ្ស៊កដានី លោក អូម៉ារ រ៉ាស់ហ្សាស់ ភាគីទាំង ២ បានពិភាក្សាគ្នាអំពីការអភិវឌ្ឍនៅតំបន់មជ្ឈិមបូព៌ា ស្របពេលមានស្ថានការណ៍អស្ថិរភាពនៅទីនោះ។
ដោយបានលើកឡើងអំពីផលប៉ះពាល់ពីការរៀបចំទទួលយកក្រុមជនភៀសខ្លួនស៊ីរីមួយចំនួនធំនៅក្នុងប្រទេស ហ៊្សកដានី លោក រ៉ាស់ហ្សាស់ បានថ្លែងថា ប្រទេស ហ្ស៊កដានី បានកំពុងធ្វើការងារជាមួយស្ថាប័នក្នុងតំបន់ និងអន្តរជាតិ ដើម្បីស្វែងរកដំណោះស្រាយជម្លោះក្នុងតំបន់។
កាលពីថ្ងៃចន្ទ ប្រធានព្រឹទ្ធសភារបស់ប្រទេស ហ្ស៊កដានី លោក ហ្វៃសាល់ ហ្វាយីស បានជួបជាមួយគណៈប្រតិភូហើយបានបញ្ជាក់អំពីផលប៉ះពាល់ជុំវិញការរៀបចំទទួលយកក្រុមជនភៀសខ្លួនស៊ីរីចំនួន ១,៣ លាននាក់។
លោកបានអំពាវនាវឲ្យសហគមន៍អន្តរជាតិរក្សាក្រមសីលធម៌របស់ខ្លួន និងមានភាពទទួលខុសត្រូវដោយស្របច្បាប់ ក្នុងការរៀបចំនៅក្នុងប្រទេស ដើម្បីទទួលយកក្រុមជនភៀសខ្លួនទាំងនោះ។
ក្រុមសមាជិករបស់គណៈប្រតិភូនោះ បានសម្តែងការអបអរសាទររបស់ពួកគេ អំពីតួនាទីរបស់ប្រទេស ហ្ស៊កដានី នៅក្នុងការបង្កើនឲ្យមានស្ថិរភាព និងសន្តិសុខនៅក្នុងតំបន់។
ចំណែកប្រទេស អាល្លឺម៉ង់ វិញ បានថ្លែងកាលពីថ្ងៃចន្ទថា ខ្លួននឹងបង្កើនការចំណាយរបស់អង្គការណាតូរហូតដល់ ៥៥,៣ ពាន់លានដុល្លារ មុនក្រុមមេដឹកនាំជួបគ្នានៅក្នុងក្រុងឡុងដ៍ ដើម្បីប្រារព្ធខួបលើកទី ៧០ នៃភាពជាដៃគូឆ្លងមហាសមុទ្រអាត្លង់ទិក៕ Xinhua/SK
