លោក អង់តូនីញ៉ូ ហ្គុយតឺរេស ថ្លែងក្នុងសន្និសីទសារព័ត៌មាន។ Xinhua
.jpg)
បុរីញូវយ៉ក៖ លោកអគ្គលេខាធិការអង្គការសហប្រជាជាតិ អង់តូនីញ៉ូ ហ្គុយតឺរេស កាលពីថ្ងៃអង្គារ បានអំពាវនាវសុំឱ្យមានការបន្ធូរបន្ថយបំណុលសម្រាប់ប្រទេសក្រីក្រ និងប្រទេសមានប្រាក់ចំណូលមធ្យម ដើម្បីឱ្យពួកគេឆ្លើយតបទៅនឹងជំងឺកូវីដ ១៩។
លោក ហ្គុយតឺរេស បានថ្លែងប្រាប់សន្និសីទសារព័ត៌មានរួមជាមួយលោកនាយករដ្ឋមន្ត្រីកាណាដា ចាស្ទីន ទ្រូដូ និងនាយករដ្ឋមន្ត្រី ហ្សាម៉ាអ៊ីក អានដ្រូហូលណេស ក្រោយពីជំនួបកម្រិតខ្ពស់ស្តីពីហិរញ្ញប្បទានសម្រាប់ការអភិវឌ្ឍថា៖ «ខ្ញុំសង្ឃឹមថា គំនិតផ្តួចផ្តើមព្យួរសេវាបំណុល (នៃក្រុមប្រទេសចំនួន ២០) នឹងត្រូវបន្តហើយទំហំនៃការព្យួរនេះ បន្តផ្តល់ទៅឲ្យក្រុមប្រទេសកំពុងអភិវឌ្ឍន៍ និងប្រាក់ចំណូលមធ្យមដែលកំពុងត្រូវការជាចាំបាច់។ វិស័យឯកជនដែលមានទីភ្នាក់ងារឥណទានជាច្រើន ត្រូវចូលរួមក្នុងកិច្ចប្រឹងប្រែងកាត់បន្ថយបំណុលនេះផងដែរ»។
លោកបានលើកទឹកចិត្តយ៉ាងខ្លាំងឲ្យមានការផ្តល់ធនធានមួយចំនួន ដើម្បីអភិវឌ្ឍសេដ្ឋកិច្ចតាមធនាគារពិភពលោក (World Bank) និងធនាគារអភិវឌ្ឍន៍ពហុជាតិដទៃទៀតទាំងការប្រើប្រាស់ធនធានដែលមានស្រាប់ ឬធនធាននៃហិរញ្ញប្បទានសម្បទានដែលសំខាន់សម្រាប់ប្រទេសដែលកំពុងត្រូវការបំផុតនោះ។
លោក ហ្គុយតឺរេស បានថ្លែងថា រដ្ឋាភិបាលទាំងអស់ត្រូវមានធនធាន ដើម្បីវិនិយោគទៅលើការបង្កើតការងារធ្វើឲ្យការអប់រំ និងអាជីវកម្មនានា ដំណើរការឡើងវិញ និងបញ្ចូលថវិការបស់ពួកគេទៅក្នុងគោលបំណងអភិវឌ្ឍន៍ប្រកបដោយចីរភាព និងកិច្ចព្រមព្រៀងក្រុងប៉ារីសស្តីពីការប្រែប្រួលអាកាសធាតុ ដើម្បីធ្វើឲ្យមានការរីកចម្រើនទៅមុខឲ្យកាន់តែខ្លាំងឡើង កាន់តែបៃតងឡើង និងប្រសើរឡើង។
លោក អង់តូនីញ៉ូ ហ្គុយតឺរេស បានថ្លែងឲ្យដឹងថា សហគមន៍អន្តរជាតិក៏គួរតែបង្កើនធនធានដែលអាចផ្តល់ដល់មូលនិធិរូបិយវត្ថុអន្តរជាតិ ក្នុងនោះ តាមរយៈការបែងចែកនៃសិទ្ធិទទួលបានមូលនិធិពិសេសថ្មី និងការបែងចែកសិទ្ធិទទួលបានមូលនិធិដែលមានស្រាប់។
លោកបានស្នើឲ្យសហគមន៍អន្តរជាតិចាត់វិធានការរួមគ្នា ដើម្បីផ្តល់ប្រាក់ ៣៥ ពាន់លានដុល្លារអាមេរិក ដល់កម្មវិធី ACT-Accelerator ជាកិច្ចសហការសកលដឹកនាំដោយអង្គការសុខភាពពិភពលោក (WHO) ដើម្បីធ្វើរោគវិនិច្ឆ័យជំងឺកូវីដ ១៩ បង្កើតថ្នាំព្យាបាល និងវ៉ាក់សាំង។ នៅក្នុងចំណោមទឹកប្រាក់ទាំងនោះ ប្រាក់ចំនួន ១៥ ពាន់លានដុល្លារ ត្រូវការបន្ទាន់ដើម្បីចាប់ផ្តើមកម្មវិធីនេះ។
លោក ហ្គុយតឺរេស បានថ្លែងបញ្ជាក់ថា រហូតមកទល់ពេលនេះ មានអ្នកឆ្លងជំងឺកូវីដ ១៩ ជាង ៣៣ លាននាក់ និងមនុស្សជាង ១ លាននាក់ បានស្លាប់បាត់បង់ជីវិតនៅទូទាំងពិភពលោក៕ Xinhua/PSA
