ក្រុងបាងកកៈ ប្រភពយោធាបានឲ្យដឹងថា តាមការរាយការណ៍ លោកនាយករដ្ឋមន្ត្រី ប្រាយុធ ចាន់-អូចា បានឯកភាពរក្សាកូតាតំណែងរដ្ឋមន្ត្រីដែលគណបក្សផាឡាំងប្រាឆារ៉ាត់ (PPRP) បានសន្យាផ្តល់ឲ្យបក្សប្រជាធិបតេយ្យ និងបក្សភូមិចៃថៃ។
ប្រភពយោធានោះ បានឲ្យដឹងទៀតថា ក្រោយពីធ្វើការសម្រេចចិត្តរួច លោកឧត្តមសេនីយ៍ ប្រាយុធ-ចាន់-អូចា បានអញ្ជើញគ្រប់គណបក្សចម្រុះទាំងអស់ ដើម្បីចូលរួមពិធីស្តាប់ព្រះរាជឱង្កាត្រាស់បង្គាប់តែងតាំងលោក ជានាយករដ្ឋមន្ត្រីនៅពេលខាងមុខ ដែលបានគ្រោងរៀបចំធ្វើឡើង កាលថ្ងៃអង្គារ នៅវិមានរដ្ឋាភិបាល។
ប្រភពយោធាដដែល បានថ្លែងថា លោកនាយករដ្ឋមន្ត្រីបានកោះហៅលោក អានុធិន ឆាន-វីរ៉ាក់គុល ជាមេដឹកនាំគណបក្សភូមិចៃថៃ ដែលកាលពីថ្ងៃចន្ទលោក បានស្ថិតនៅក្នុងខេត្តសៀមរាបនៃប្រទេស កម្ពុជា ឲ្យវិលត្រឡប់ទៅក្រុងបាងកកវិញកាលពីថ្ងៃអង្គារម្សិលមិញ។
ប្រភពនោះ បានបន្តថា ជម្លោះជុំវិញតំណែងរដ្ឋមន្ត្រីសំខាន់ៗនៅក្នុងចំណោមក្រុមដៃគូចម្រុះរបស់គណបក្សផាឡាំប្រាឆារ៉ាត់ ត្រូវបានបញ្ចប់ ហើយថា គណបក្សភូមិចៃថៃទំនងជាគ្រប់គ្រងក្រសួងដឹកជញ្ជូនជាមួយលោក សាក់ សៃយ៉ាំ ឈិតឆប ជាប្អូនប្រុសរបស់លោក នេវិន-ឈិតឆប ជាមេដឹកនាំគណបក្សភូមិចៃថៃ ដែលបានក្លាយជារដ្ឋមន្ត្រីដឹកជញ្ជូន។
តាមការរាយការណ៍ ក្រុមប្រឆាំងសម្ព័ន្ធមិត្តទាំង ៣ របស់គណបក្សផាឡាំងប្រាឆារ៉ាត់ មានការមិនសប្បាយចិត្តជាមួយនឹងការបែងចែកតំណែងនោះ ខណៈខ្លួនចង់ទាមទារយកក្រសួងកសិកម្ម និងដឹកជញ្ជូនពីគណបក្សប្រជាធិបតេយ្យ និងគណបក្សភូមិចៃថៃមកវិញនោះ។
ចំណែកឯឧបនាយករដ្ឋមន្ត្រីលោក ស៊ុមឃិត ចាតុស៊្រីភីថាក់ បានបញ្ជាក់ថា ការបង្កើតរដ្ឋាភិបាល គឺជាតួនាទីរបស់លោកនាយករដ្ឋមន្ត្រី និងជំរុញឲ្យគ្រប់គណបក្សនយោបាយទាំងអស់ ត្រូវផ្តល់យោបល់ឲ្យក្រុមបេក្ខជនទាំងអស់ខំប្រឹងធ្វើការឲ្យអស់ពីសមត្ថភាពរបស់ពួកគេ នៅចំពេលរបាយការណ៍កន្លងមក បានរាយការណ៍អំពីជម្លោះយ៉ាងខ្លាំងក្លាជុំវិញមុខតំណែងរដ្ឋមន្ត្រីសំខាន់ៗនៅក្នុងរដ្ឋាភិបាលចម្រុះ។
លោក ស៊ុមឃិត ដែលត្រូវបានគេមើលឃើញថាជាដៃស្តាំរបស់លោក ប្រាយុធ ទទួលបន្ទុកផ្នែកកិច្ចការសេដ្ឋកិច្ចបានថ្លែងថា លោកនាយករដ្ឋមន្ត្រីសម្រេចចុងក្រោយក្នុងការបែងចែកតួនាទី នៅក្នុងរដ្ឋាភិបាលចម្រុះនោះ៕ BKP/SK