ប្រេសិតពិសេស អ.ស.ប.ប្រចាំនៅយេម៉ែន លោក Martin Griffiths។ AFP
.jpg)
ក្រុងសាណាៈ អង្គការសហប្រជាជាតិបានឲ្យដឹងកាលពីថ្ងៃអង្គារថា មានផ្ទុះគ្រាប់នៅក្បែរសាលារៀន ២ នៅក្នុងរដ្ឋធានីយេម៉ែនកាន់កាប់ដោយក្រុមឧទ្ទាម បានបណ្តាលឲ្យក្មេង ១៤ នាក់ស្លាប់ និង ១៦ នាក់រងរបួស ប៉ុន្តែមូលហេតុនៃការផ្ទុះកាលពីចុងសប្តាហ៍នៅមិនទាន់ដឹងច្បាស់នៅឡើយទេ។
យោងតាមសេចក្តីថ្លែងការណ៍របស់មូលនិធិកុមារអង្គការសហប្រជាជាតិ (UNICEF)និងប្រេសិតពិសេស អ.ស.ប ប្រចាំនៅយេម៉ែន បានឲ្យដឹងថា ភាគច្រើនក្មេងដែលស្លាប់នៅក្នុងស្រុក Saewan នៃក្រុងនេះ គឺជាក្មេងស្រីដែលមានអាយុក្រោម ៩ ឆ្នាំ។
ក្មេងក្រុមឧទ្ទាមហ៊ូធីនៅយេម៉ែន បានចោទក្រុមចម្រុះយោធាដឹកនាំដោយអារ៉ាប៊ី សាអ៊ូឌីត ដែលគាំទ្ររដ្ឋាភិបាលថា បានធ្វើការវាយប្រហារផ្លូវអាកាស។
ក្រុមចម្រុះបានបដិសេធថា មិនបានធ្វើការវាយប្រហារផ្លូវអាកាសទៅរដ្ឋធានីយេម៉ែនកាលពីថ្ងៃអាទិត្យនោះទេ។
ប្រមុខ UNICEF ប្រចំានៅមជ្ឈិមបូព៌ា និងអាហ្រ្វិកខាងជើង លោក Geert Cappelaere បានថ្លែងថា៖ «ការផ្ទុះគ្រាប់នៅក្នុងក្រុងសាណានៅក្នុងសប្តាហ៍នេះ បានបណ្តាលឲ្យក្មេង ១៤ នាក់ស្លាប់ និង ១៦ នាក់រងរបួសធ្ងន់។ នេះគឺជាអ្វីដែល UNICEF អាចផ្ទៀងផ្ទាត់បាន ដោយចំនួនក្មេងដែលស្លាប់ និងរងរបួស ទំនងជាកើនឡើងថែមទៀត។
ជិតដល់ពេលបាយថ្ងៃត្រង់ និងមានសិស្សនៅក្នុងថ្នាក់ពេញ ការផ្ទុះគ្រាប់នោះ បានធ្វើឲ្យបង្អួចសាលារៀនខ្ទាតរប៉ាត់រប៉ាយ ហើយអំបែងគ្រាប់ដែលផ្ទុះ និងបំណែកកញ្ចក់ខ្ទាតចូលក្នុងបន្ទប់រៀន៕ AFP/PSA
