បុរសបង់ក្លាដែសម្នាក់ព្យាយាមពន្លត់អគ្គិភ័យ ខណៈអណ្តាតភ្លើងកំពុងឆាបឆេះយ៉ាងខ្លាំង។ AFP
.jpg)
ក្រុងដាក្កាៈ ក្រុមមន្ត្រីបាននិយាយកាលពីថ្ងៃអាទិត្យថា មនុស្សយ៉ាងតិច ១ ម៊ឺននាក់ គ្មានផ្ទះសំបែង ក្រោយពីភ្លើងឆេះតំបន់អនាធិបតេយ្យដែលមានមនុស្សយ៉ាងច្រើនកកកុញនៅក្នុងរដ្ឋធានីបង់ក្លាដែស និងបានបំផ្លាញផ្ទះខ្ទមរខេករខាកអស់រាប់ពាន់ខ្នង។
មន្ត្រីសេវាពន្លត់អគ្គិភ័យ លោក Ershad Hossain បានថ្លែងប្រាប់ AFP ថា ភ្លើងនោះបានឆាបឆេះនៅក្នុងសង្កាត់ Mirpur នៃក្រុងដាក្កា កាលពីល្ងាចថ្ងៃសុក្រ និងឆេះផ្ទះខ្ទមប្រហែលចំនួន ២ ពាន់ខ្នង។
លោក Abdul Hamid មានវ័យ ៥៨ ឆ្នាំ ដែលបានបើកតូបលក់តែមួយនៅក្នុងតំបន់ដែលភ្លើងឆាបឆេះនោះ បាននិយាយប្រាប់ AFP ថា៖ «ខ្ញុំមិនអាចស្តារមុខរបរមួយនេះបានទេ។ ខ្ញុំមិនដឹងថា អ្វីដែលខ្ញុំនឹងត្រូវធ្វើតទៅទៀតនោះទេ»។
ក្រុមអ្នកពន្លត់អគ្គិភ័យបាននិយាយថា នៅទីបញ្ចប់ក្រុមអាជ្ញាធរបានគ្រប់គ្រងភ្លើងនោះបានទាំងស្រុង ហើយគ្មានមនុស្សណាម្នាក់ បានស្លាប់ទេ ទោះបីមានមនុស្សជាច្រើននាក់រងរបួសស្រាលក្តី។
អ្នកស្រុកជាច្រើននៅតំបន់ ជាកម្មករធ្វើការរោងចក្រកាត់ដេរសម្លៀកបំពាក់ មានប្រាក់ចំណូលទាប មិនបាននៅក្នុងតំបន់មានភ្លើងឆេះនោះទេ ដោយសារពួកគេចាកចេញពីផ្ទះសំបែងរបស់ពួកគេ ដើម្បីចូលរួមប្រារព្ធពិធីបុណ្យមូស្លីម Eid al-Adha ជាមួយក្រុមគ្រួសាររបស់ពួកគេ។
អធិការប៉ូលិសតំបន់លោក Golam Rabbani បាននិយាយថា៖ «អគ្គិភ័យនេះបណ្តាលឲ្យខូចខាតទ្រព្យសម្បត្តិយ៉ាងច្រើន»៕ AFP/PSA
