ទាហានឥណ្ឌាឈរនៅក្នុងរថយន្ត ខណៈធ្វើដំណើរក្នុងក្រុងស្រុីណាហ្គារកាលពីថ្ងៃទី ១៨ សីហា។ AFP
.jpg)
ក្រុងស្រ៊ីណាហ្គារៈ ប្រភពរដ្ឋាភិបាលបានប្រាប់ AFP ថា មនុស្សរាប់ពាន់នាក់ ត្រូវបានឃាត់ខ្លួននៅក្នុងតំបន់កាស្មៀរ នៃប្រទេស ឥណ្ឌា ជុំវិញការភ័យខ្លាចផ្ទុះចលាចលក្រោយពីក្រុងញូវដែលីដកស្វ័យភាពរបស់ខ្លួនចេញពីតំបន់ដែលកំពុងមានភាពជ្រួលច្របល់នោះ។
ចៅក្រមម្នាក់ដែលថ្លែងមកកាន់ AFP ក្នុងលក្ខខណ្ឌអនាមិកនោះ បាននិយាយថា មនុស្សយ៉ាងតិច ៤ ពាន់នាក់ ត្រូវបានចាប់ខ្លួន និងឃុំខ្លួននៅក្រោមច្បាប់សុវត្ថិភាពសាធារណៈ (PSA) ជាច្បាប់មួយដ៏ចម្រូងចម្រាស ដែលអនុញ្ញាតឲ្យអាជ្ញាធរចាប់មនុស្សណាម្នាក់ ដាក់គុករហូតដល់ ២ ឆ្នាំ ដោយគ្មានការចោទប្រកាន់ ឬកាត់ទោសឡើយ។
ចៅក្រមរូបនោះបានបន្តថា៖ «ពួកគេភាគច្រើនត្រូវដឹកតាមយន្តហោះចេញពីតំបន់កាស្មៀរ ដោយសារពន្ធនាគារនៅទីនេះពេញរកកន្លែងដាក់មនុស្សមិនបាន»។
លោកបានបន្ថែមថា លោកប្រើប្រាស់ទូរស័ព្ទតាមប្រព័ន្ធផ្កាយរណប ដើម្បីទំនាក់ទំនងប្រមូលតួលេខពីអ្នកធ្វើការជាមួយទៅទូទាំងដែនដីហិមាល័យ ស្របពេលមានការផ្តាច់ទំនាក់ទំនង ដែលកំណត់ដោយក្រុមអាជ្ញាធរ។
ក្រុមអាជ្ញាធរបានបដិសេធមិនផ្តល់ចំនួនសរុបថា តើមានមនុស្សប៉ុន្មាននាក់ត្រូវបានចាប់ឃុំខ្លួនជាផ្នែកនៃការអះអាងថា អ្នកនយោបាយក្នុងតំបន់ជាង ១០០ នាក់ សកម្មជន និងបញ្ញវន្ត ត្រូវបានចាប់ឃុំខ្លួននៅក្នុងរយៈពេលប៉ុន្មានថ្ងៃដំបូង ក្រោយពីរដ្ឋនេះត្រូវបានដកឋានៈពាក់កណ្តាលស្វយ័តរបស់ខ្លួននោះ។
ពួកគេបាននិយាយថា ការចាប់មនុស្សឃុំខ្លួន ត្រូវបានធ្វើឡើងដើម្បីចៀសវាងការរំលោភបំពានសន្តិភាពនៅក្នុងតំបន់ ដែលបានប្រយុទ្ធប្រឆាំងការបះបោរប្រដាប់អាវុធប្រឆាំងនឹងការគ្រប់គ្រងរបស់ឥណ្ឌារយៈពេល ៣ ទសវត្សរ៍៕ AFP/PSA
