បុរសម្នាក់រត់ឆ្លងផ្លូវក្នុងអំឡុងពេលព្រឹកចុះអ័ព្ទខ្លាំងនៅជាយក្រុងកូឡុំបូ។ AFP
.jpg)
ក្រុងកូឡុំបូ៖ មជ្ឈមណ្ឌលគ្រប់គ្រងគ្រោះមហន្តរាយ (DMC) បានឲ្យដឹងកាលពីថ្ងៃពុធថា មនុស្សជាង ១៥ ពាន់នាក់ ត្រូវរងប៉ះពាល់ដោយសារភ្លៀងធ្លាក់ខ្លាំងនៅប្រទេស ស្រីលង្កា ខណៈអ្នកស្លាប់ ៦ នាក់ត្រូវគេរាយការណ៍។
មនុស្ស ៤ នាក់ស្លាប់ ត្រូវបានគេរាយការណ៍មកពីស្រុក Nuwera Eliya នៅតំបន់ភ្នំភាគកណ្តាលដែលជាតំបន់មួយក្នុងចំណោមតំបន់ដែលរងប៉ះពាល់ខ្លាំងបំផុត ដោយសារភ្លៀងធ្លាក់ច្រើន និងខ្យល់បោកបក់ខ្លាំងជាច្រើនថ្ងៃ។
មនុស្សជាង ៩០០ នាក់ ត្រូវបានជម្លៀសទៅកាន់កន្លែងមានសុវត្ថិភាព ខណៈដែលផ្ទះជាង ៣៥០ ខ្នង ត្រូវបំផ្លាញទាំងស្រុង ឬជាចំណែកៗនោះ។
ការព្រមានពីការបាក់ដី ក៏នៅតែជាធរមាននៅក្នុងតំបន់ខ្លះនៅក្នុងនោះមានតំបន់រ៉ាត់ណាពួរ៉ា នៅក្នុងប្រទេស ស្រីលង្កាភាគកណ្តាល និងខាងត្បូង និងប្រជាជនជាច្រើនគ្រួសារ ដែលរស់នៅតំបន់ដែលងាយទទួលរងការបាក់ដីនោះ ត្រូវបានជម្លៀសឲ្យទៅនៅកន្លែងមានសុវត្ថិភាព។
លោកប្រធានាធិបតីស្រីលង្កា ហ្គោតាបាយ៉ា រ៉ាចាផាកសា កាលពីថ្ងៃចន្ទបានណែនាំឲ្យក្រុមមន្ត្រីចាត់វិធានការបន្ទាន់ដើម្បីធានាសុវត្ថិភាព និងសុខុមាលភាពរបស់ប្រជាជនដែលប៉ះពាល់ដោយទឹកជំនន់ និងបាក់ដី៕ Xinhua/PSA
