លោក ស៊ី ជីនភីង ថ្លែងនៅក្នុងមហាកំពែងរបស់ប្រជាជនក្នុងក្រុងប៉េកាំង។ AFP
.jpg)
ប្រទេសចិន បានរៀបចំកិច្ចប្រជុំគណៈកម្មាធិការកណ្ដាលមួយស្ដីពីការបង្កើតផែនការរយៈពេល ៥ ឆ្នាំ លើកទី១៤ នៅក្នុងទីក្រុងប៉េកាំងកាលពីថ្ងៃចន្ទ ទី ២៦ ខែតុលា។ កិច្ចប្រជុំកំពូលនេះធ្វើ ឡើងក្រោមអធិបតីភាពរបស់លោកប្រធានាធិបតី ស៊ី ជីនភីង រួមនឹងមន្ដ្រីគ្រាក់ៗរបស់ចិនជាច្រើនរូបទៀត ដែលមានរយៈពេល ៤ ថ្ងៃ គឺពីថ្ងៃ ២៦ រហូតដល់ថ្ងៃទី ២៩ ខែតុលា។
នៅក្នុងសុន្ទរកថា លោក ស៊ី ជីនភីង បានសង្កត់ធ្ងន់ថាប្រទេសចិន ត្រូវតែមានភាពជាខ្លួនទីពឹងខ្លួនបន្ថែមទៀត ដោយវិនិយោគកាន់តែច្រើននៅក្នុងការច្នៃប្រឌិតបច្ចេកវិទ្យាក្នុងស្រុកកែលម្អបរិស្ថាន និងផ្តោតលើអ្វីដែលលោកហៅថា «យុទ្ធសាស្រ្តវិលជុំ»។ «យុទ្ធសាស្រ្តវិលជុំ» មានគោលបំណងបង្កើនការយកចិត្តទុកដាក់លើការប្រើប្រាស់ក្នុងស្រុក ដើម្បីជំរុញសេដ្ឋកិច្ច ខណៈពេលដែលត្រូវធ្វើឱ្យមានតុល្យភាព ជាមួយនឹងពាណិជ្ជកម្ម និងការវិនិយោគបរទេស។
ជាមួយគ្នានេះផែនការរយៈពេល ៥ ឆ្នាំ លើកទី១៤ គឺជាក្របខ័ណ្ឌគោលនយោបាយដ៏ធំ ដែលចិននឹងត្រូវគ្រប់គ្រងពីឆ្នាំ ២០២១ ដល់ឆ្នាំ ២០២៥ ហើយគណៈកម្មាធិការក៏នឹងរៀបចំ “ចក្ខុវិស័យ” សម្រាប់ឆ្នាំ ២០៣៥ ជាផែនការរយៈពេលវែងដែលលោក ស៊ី ជីនភីង បានកំណត់ដើម្បីសម្រេចឱ្យបាននូវទំនើបភាវូបនីយកម្មសង្គមផងដែរ។ ក្រោយបញ្ចប់កិច្ចប្រជុំរយៈពេល ៤ ថ្ងៃ របស់គណៈកម្មាធិការកណ្ដាល សេចក្ដីសម្រេចរួម ១ នឹងត្រូវប្រកាស។
លោក Richard McGregor សមាជិកជាន់ខ្ពស់នៅវិទ្យាស្ថាន Lowy ក្នុងទីក្រុងស៊ីដនី ដែលផ្តោតលើការងារផ្ទៃក្នុងរបស់បក្សកុម្មុយនិស្តចិនបាននិយាយថា ផែនការ ៥ ឆ្នាំបន្ទាប់របស់ចិនទំនងជាផ្តោតលើការជំរុញរបស់លោក ស៊ី សម្រាប់ «ខ្លួនទីពឹងខ្លួន» ដែលជាបំណងរបស់ទីក្រុងប៉េកាំង ដើម្បីកម្រិតការពឹងផ្អែករបស់ខ្លួនលើសហរដ្ឋអាមេរិក និងប្រទេសដទៃទៀត។
លោក Zhang Yansheng ប្រធានក្រុមស្រាវជ្រាវនៅមជ្ឈមណ្ឌលចិនសម្រាប់ការផ្លាស់ប្តូរសេដ្ឋកិច្ចអន្តរជាតិ (China Centre for International Economic Exchanges) ដែលជាអ្នកជំនាញមានមូលដ្ឋាននៅទីក្រុងប៉េកាំងបាននិយាយថា គោលដៅរបស់ផែនការរយៈពេល ៥ ឆ្នាំ លើកទី១៤ នឹងរួមមានគុណភាពនៃកំណើនសេដ្ឋកិច្ចបច្ចេកវិទ្យាការច្នៃប្រឌិត ការកែទម្រង់ស្ថាប័ន និងការកសាងកម្រិតខ្ពស់នៃចង្វាក់ផ្គត់ផ្គង់ឧស្សាហកម្ម។
លោកស្រី Yue Su សេដ្ឋវិទូសំខាន់នៅអង្គភាពស៊ើបការណ៍សេដ្ឋកិច្ច (EIU) វិញ រំពឹងថា ផែនការរយៈពេល ៥ ឆ្នាំនេះ នឹងសង្កត់ធ្ងន់លើការគាំទ្រសម្រាប់បច្ចេកវិទ្យាដូចជាឧបករណ៍អេឡិចត្រូនិក។ លោកស្រីក៏រំពឹងផងដែរថា ផែនការនេះ នឹងពិភាក្សាពីការពង្រឹងភាពធន់នឹងសន្តិសុខថាមពល ជាជាងពឹងផ្អែកលើការនាំចូលប្រេង និងធានាសន្តិសុខស្បៀង នៅពេលប្រឈមមុខនឹងភាពតានតឹងពាណិជ្ជកម្មជាមួយប្រទេសដែលធ្វើកសិកម្ម និងកង្វះសាច់ជ្រូកដែលជាអាហារចម្បងនៅក្នុងគ្រួសារចិន។
ជាងនេះទៅទៀត លោកស្រី Su ក៏បានបង្ហាញក្ដីសង្ឃឹមយ៉ាងមុតមាំទៀតថា ផ្អែកតាមផែនការរយៈពេល ៥ ឆ្នាំ ប្រទេសចិន នឹងរកវិធីបន្ថែមទៀត ដើម្បីជំរុញការប្រើប្រាស់រួមទាំងលុបចោលការកំណត់ចំនួនកូនដែលគ្រួសារនីមួយៗ អាចមានផងដែរ។
សូមបញ្ជាក់ថា គណៈកម្មាធិការកណ្តាលត្រូវបានបង្កើតឡើងដោយសមាជិកជាង ២០០ នាក់ ដែលត្រូវបានជ្រើសរើសដោយប្រតិភូបក្សនៅក្នុងសមាជជាតិរៀងរាល់ ៥ ឆ្នាំម្តង។ សេចក្ដីព្រាងផែនការ ៥ ឆ្នាំ ដែលបានដាក់ចេញនូវគោលដៅសេដ្ឋកិច្ច និងនយោបាយសំខាន់ៗរយៈពេលខ្លី ហើយនឹងគោលបំណងរយៈពេលវែងនឹងត្រូវចេញផ្សាយនៅសប្ដាហ៍ខាងមុខ ហើយក៏ត្រូវបានគេរំពឹងថា នឹងត្រូវអនុម័តជាផ្លូវការនៅខែមីនា ឆ្នាំក្រោយដោយសភាប្រជាជនជាតិជាស្ថាប័ននីតិប្បញ្ញត្ដិកំពូលរបស់ប្រទេសចិន។
ជាការកត់សម្គាល់ កំណើនសេដ្ឋកិច្ចរបស់ប្រទេសចិន មានសម្ទុះយឺតក្នុងរយៈពេលប៉ុន្មានឆ្នាំចុងក្រោយនេះ ស្របពេលមានការព្រួយបារម្ភអំពីកំណើនបំណុល។
យោងតាមផែនការរយៈពេល ៥ ឆ្នាំ លើកទី១៣ ដែលបានគូសបញ្ជាក់អំពីអាទិភាពរបស់រដ្ឋាភិបាលពីឆ្នាំ ២០១៦ ដល់ឆ្នាំ ២០២០ ប្រទេសចិន បានផ្លាស់ប្តូរការពឹងផ្អែកបន្ថែមទៀតទៅលើការប្រើប្រាស់សម្រាប់កំណើន ជាជាងការនាំចេញ។
កាលពីថ្ងៃទី ១៣ ខែតុលា មូលនិធិរូបិយវត្ថុអន្តរជាតិ បានទម្លាក់ការព្យាកររបស់ខ្លួនសម្រាប់សេដ្ឋកិច្ចពិភពលោកក្នុងឆ្នាំ ២០២១ ដល់ ៥,២% ដោយមានការរំពឹងទុកនូវការងើបសេដ្ឋកិច្ចឡើងវិញដោយ «យូរ និងមិនស្មើគ្នា» ក្រោយពីការរាតត្បាតនៃជំងឺកូវីដ ១៩។
ប៉ុន្ដែកាលពីថ្ងៃទី ១៨ ខែតុលា រដ្ឋាភិបាលចិនបានប្រកាសថា សេដ្ឋកិច្ចរបស់ចិនបានកើនឡើង ៤,៩% នៅចន្លោះខែកក្កដា និងកញ្ញា ក្នុងពេលដែលប្រទេសជាច្រើនបានឃើញលទ្ធផលធ្លាក់ចុះ។
កាលពីខែមុនមជ្ឈមណ្ឌលស្រាវជ្រាវអភិវឌ្ឍន៍នៃក្រុមប្រឹក្សារដ្ឋបានព្យាករថា សេដ្ឋកិច្ចចិននឹងវ៉ាដាច់សហគមន៍អឺរ៉ុបក្នុងរយៈពេល ៧ ឆ្នាំ ហើយនឹងវ៉ាដាច់សហរដ្ឋអាមេរិកនៅឆ្នាំ ២០៣២៕
សុខ ស្រីលុច
