ក្រុងស៊ីដនីៈ ទូរទស្សន៍ ABCបានរាយការណ៍កាលពីថ្ងៃចន្ទថា ប្រទេស អូស្ត្រាលី កំពុងមានគម្រោងសាងសង់កំពង់ផែទឹកជ្រៅថ្មីមួយនៅឆ្នេរសមុទ្រភាគខាងជើងរបស់ខ្លួន ដើម្បីផ្តល់លទ្ធភាពឲ្យអាមេរិកដាក់ពង្រាយទាហានម៉ារីន ជាផ្នែកនៃកិច្ចខិតខំប្រឹងប្រែងប្រឆាំងការកើនឡើងនូវវត្តមានយោធាចិននៅក្នុងតំបន់។
ប្រព័ន្ធផ្សព្វផ្សាយជាតិរបស់ប្រទេស អូស្ត្រាលី បានដកស្រង់សម្តីក្រុមមន្ត្រីរដ្ឋាភិបាល និងការពារជាតិចម្រុះ ដោយថ្លែងថា កំពង់ផែនោះ មានចម្ងាយប្រហែល ៤០ គីឡូម៉ែត្រ ពីកំពង់ផែ Darwin ជារដ្ឋធានីនៃទឹកដីអូស្ត្រាលីភាគខាងជើង ដែលបានចុះកិច្ចសន្យាជួលកំពង់ផែរបស់ខ្លួនទៅឲ្យចិនកាលពីឆ្នាំ ២០១៥។
កំពង់ផែ Darwin មានទីតាំងយោធា និងបានទទួលធ្វើជាម្ចាស់ផ្ទះនាវាទស្សនកិច្ចជាច្រើនគ្រឿងរបស់អាមេរិក ប៉ុន្តែទូរទស្សន៍ ABC បានរាយការណ៍ឲ្យដឹងថា កំពង់ផែថ្មី នឹងផ្តល់ភាពងាយស្រួលដល់នាវាចម្បាំងធំៗ និងមូលដ្ឋានកិច្ចប្រតិបត្តិការទូលំទូលាយ។
ទាហានម៉ារីនអាមេរិកជាង ២ ០០០ នាក់ បំពេញការងារប្តូរវេនគ្នាយ៉ាងទៀងទាត់ឆ្លងកាត់កំពង់ផែ Darwin ជាផ្នែកនៃកិច្ចសហប្រតិបត្តិការយោធាយ៉ាងជិតស្និទ្ធរវាងសម្ព័នមិត្តទាំង ២ នេះ។
ទាំងប្រទេស អូស្ត្រាលី និងអាមេរិក បានកំពុងពង្រឹងវត្តមានយោធារបស់ពួកគេនៅមហាសមុទ្រប៉ាស៊ីហ្វិកភាគខាងលិច ដើម្បីប្រឆាំងវិធានការនានារបស់ប្រទេស ចិន ក្នុងការទទួលបានឥទ្ធិពលនៅទូទាំងតំបន់យុទ្ធសាស្ត្រសំខាន់ៗ ជាពិសេសតាមរយៈការបង្កើតមូលដ្ឋានកងកម្លាំងប្រដាប់អាវុធ នៅលើកោះដែលមានជម្លោះនៅសមុទ្រចិនខាងត្បូង។
ជាផ្នែកនៃកិច្ចខិតខំប្រឹងប្រែងនោះ ក្រុងវ៉ាស៊ីនតោន និងកង់បេរ៉ា កាលពីពេលថ្មីៗនេះ បានប្រកាសផែនការសាងសង់មូលដ្ឋានយោធារួមនៅកោះ Manus នៃរដ្ឋប៉ាពួញូហ្គីណេរបស់ប្រទេស អូស្ត្រាលី ភាគឦសាន។
ទូរទស្សន៍ ABC បានឲ្យដឹងទៀតថា កំពង់ផែអូស្ត្រាលីថ្មីនៅតំបន់ Glyde Point នៅក្នុងនោះ នឹងធ្វើប្រតិបត្តិការពាណិជ្ជកម្ម និងឧស្សាហកម្ម ហើយបន្ថែមពីនេះទៅទៀត នោះ មានកន្លែងជាច្រើនសម្រាប់សកម្មភាពយោធា។
ទូរទស្សន៍ ABC បានរាយការណ៍ទៀតថា ការប្រកាសពាក់ព័ន្ធទៅនឹងកំពង់ផែនោះ អាចកើតឡើងនៅក្នុងរយៈពេល ២-៣ សប្តាហ៍ក្រោយ ស្របពេលមានការធ្វើសមយុទ្ធយោធា Talisman Sabre អាមេរិក-អូស្ត្រាលី នៅពាក់កណ្តាល ខែកក្កដាជារៀងរាល់ឆ្នាំ។
ស្ថានកុងស៊ុលរបស់អាមេរិកប្រចាំនៅទីក្រុងស៊ីដនី បានបដិសេធមិនធ្វើអត្ថាធិប្បាយ អំពីរបាយការណ៍របស់ ABC នោះទេ ហើយភ្លាមៗនោះដែរ ក្រសួងការពារជាតិនៃប្រទេស អូស្ត្រាលី ក៏មិនបានឆ្លើយតបទៅនឹងការស្នើសុំឲ្យបកស្រាយទាក់ទងនឹងការសាងសង់កំពង់ផែនោះទេ៕ AFP/SK