វៀតណាម​ថា​ចិន​គំរាមកំហែង​សន្តិភាព​ធ្ងន់ធ្ងរ


20140523_18a
ប្រធានាធិបតី ហ្វីលីពីន លោកអាគីណូ(ស្តាំ) បង្ហាញកាយវិការ ខណៈលោកពិភាក្សាជាមួយនាយករដ្ឋមន្ត្រីវៀតណាម លោកតឹនយុង នៅក្រុងម៉ានីល AFP

ក្រុងម៉ានីលៈ នាយករដ្ឋមន្ត្រី វៀតណាម លោក ង្វៀន តឹនយុង បាន​ថ្លែង​ពី​ថ្ងៃ​ពុធ​ថា ការ​ដាក់​ឧបករណ៍​បូម​ប្រេង​របស់​ចិន ក្នុង​ដែន​ទឹក​សមុទ្រ​ចិន​ខាង​ត្បូង​ដែល​មាន​ជម្លោះ បាន​«​គំរាមកំហែង​ដល់​សន្តិភាព​យ៉ាង​ធ្ងន់ធ្ងរ​»។

ថ្លែង​ក្នុង ក្រុង​ម៉ានីល​បន្ទាប់ពី​ជំនួប​ជាមួយ​ប្រធានាធិបតី​ហ្វីលីពីន លោក​បេនីកណូ អាគីណូ លោក​យុង បាន​និយាយ​ថា ក្រុម​មេដឹកនាំ​បាន​ឯកភាព​ថា ចិន​គួរ​ត្រូវ​សហគមន៍​អន្តរជាតិ​ថ្កោលទោស​ពី​បទ​ដាក់​ពង្រាយ​ឧបករណ៍​បូម​ប្រង និង​ទង្វើ​ខុសច្បាប់​ជាច្រើន​ទៀត​នៅក្នុង​សមុទ្រ។

ដោយ​លោក​ឈរ​អម​លោក​អាគីណូ​នៅឯ​វិមាន​ប្រធានាធិបតី​លោក​យុង​បាន​និយាយ​ថា៖ «​ទាក់ទង​នឹង​ស្ថានការណ៍​នៅ​សមុទ្រ ខាង​កើត ខ្ញុំ​និង​លោក​ប្រធានាធិបតី បាន​សម្តែង​កង្វល់​ដ៏ជ្រាលជ្រៅ​រួម​គ្នា​ជុំវិញ​ស្ថានភាព​ដ៏គ្រោះថ្នាក់​បំផុត​នា​បច្ចុប្បន្ន ដែល​បង្ក​ដោយ​ទង្វើ​ជាច្រើន​របស់​ចិន ដែល​រំលោភ​ច្បាប់​អន្តរជាតិ»។

លោក​បាន​គូស​បញ្ជាក់​ថា៖ «ជាពិសេស​ការ​ដាក់​ឧបករណ៍​បូម ប្រេង Haiyang 981 ខុស​ច្បាប់​របស់​ចិន​និង​ការ​ពង្រាយ​នាវា​អម​ជាច្រើន​គ្រឿង​ដើម្បី​ការពារ ឧបករណ៍​បូម​ប្រេង​នោះ បាន​គំរាម​កំហែង​យ៉ាង​ធ្ងន់ធ្ងរ​ដល់​សន្តិភាព ស្ថិរភាព សន្តិសុខ​ដែនសមុទ្រ​និង​សុវត្ថិភាព​និង​សេរីភាព​នៃ​ការ ធ្វើ​នាវាចរណ៍​នៅ​សមុទ្រ​នេះ»។

វៀតណាម​បាន​ហៅ​សមុទ្រចិន ខាង​ត្បូង​ដែល​ត្រូវ​បាន​គេ​ជឿថា មាន​ប្រេង​និង​ឧស្ម័ន​យ៉ាង​ច្រើន​ថា ជា​សមុទ្រ​ខាង​កើត។

ចិន ទាមទារ​ដែនសមុទ្រ​ស្ទើរតែ​ទាំងអស់ សូម្បីតែ​ដែនទឹក​នៅ កៀក​ឆ្នេរសមុទ្រ​របស់​ប្រទេស​ជិត​ខាង​ខ្លួន​ក៏ដោយ​។

វៀតណាម ហ្វីលីពីន ប្រ៊ុយណេ ម៉ាឡេស៊ី និង​តៃវ៉ាន់ បាន​ប្រជែង​គ្នា​ទាមទារ តំបន់​ជាច្រើន​នៃ​សមុទ្រ​នេះ​ហើយ​ជម្លោះ​ជាច្រើន ទសវត្សរ៍​មក​នេះ​បាន​ធ្វើវា​ឲ្យ​ក្លាយ​ជា​ភ្លើង​កំហឹង​ជា​សក្តានុពល សម្រាប់​ជម្លោះ។

ចិន​បាន​ទទួល​កាន់កាប់​ប្រជុំ​កោះ​ប៉ារ៉ាសែល ក្នុង​ឆ្នាំ​១៩៧៤​បន្ទាប់ពី​ការ​ប្រយុទ្ធ​នឹង​វៀតណាម​បាន​ធ្វើឲ្យ ទាហាន​វៀតណាម​ប្រមាណ​៥០​នាក់​ស្លាប់​៕ PSA

ព័ត៌មានថ្មីៗ