ក្រុងបាងកកៈ យោងតាមទស្សនៈមួយ ដែលបានធ្វើប្រជាមតិដោយសាកលវិទ្យាល័យសួនឌូស៊ីតរ៉ាចាផាត់ បានឲ្យដឹងថា មនុស្សភាគច្រើនបានជឿជាក់ថា ការបំផ្ទុះគ្រាប់បែកមួយដែលបានធ្វើឲ្យរង្គោះរង្គើក្រុងបាងកកកាលពីដើមខែនេះ គឺជារឿងនយោបាយ ហើយបានធ្វើឲ្យប៉ះពាល់ដល់ការជឿជាក់ទៅលើរដ្ឋាភិបាល ស្ថិតនៅក្រោមការគ្រប់គ្រងរបស់លោកឧត្តមសេនីយ៍ ប្រាយុធ ចាន-អូចា។
ប្រជាមតិមួយនេះ ត្រូវបានធ្វើឡើងកាលពីថ្ងៃទី ៦ ដល់ថ្ងៃទី ១០ ខែ សីហា ទៅលើមនុស្សចំនួន ១ ២២០ នាក់ នៅទូទាំងប្រទេស ដើម្បីប្រមូលទស្សនៈរបស់ពួកគេអំពីឧប្បត្តិហេតុបំផ្ទុះគ្រាប់បែកទាំងនោះ។
កាលពីថ្ងៃទី ១ ខែ សីហា គោលដៅគួរឲ្យសង្ស័យ ២ ត្រូវបានកើតឡើងនៅខាងក្រៅទីស្នាក់ការប៉ូលិសភូមិន្ទថៃនៅក្រុងបាងកក ខណៈដែលក្រុមរដ្ឋមន្ត្រីការបរទេសមកពីបណ្តាប្រទេសជាច្រើន បានមកកាន់រដ្ឋធានីបាងកក ដើម្បីចូលរួមជំនួបរបស់ក្រុមរដ្ឋមន្ត្រីការបរទេសអាស៊ានប្រចាំឆ្នាំ និងទាក់ទងទៅនឹងរបៀបវារៈផ្សេងៗទៀតផងដែរ។
នៅថ្ងៃបន្ទាប់ គ្រាប់បែកយ៉ាងតិច ៦ គ្រាប់ បានផ្ទុះ និងមានការវាយប្រហារ ៤ កន្លែង បានកើតឡើងនៅក្នុងកន្លែងខុសៗគ្នា នៅក្នុងនោះមាននៅខាងក្រៅវិមានរដ្ឋាភិបាល នៅក្រៅក្រុងបាងកក និងនៅខាងមុខក្រសួងការពារជាតិ។
ដោយបានសួរថា តើការបំផ្ទុះគ្រាប់បែកនោះ ត្រូវបានបង្ហាញឲ្យឃើញហេតុផលនយោបាយនោះ ឬយ៉ាងណាមនុស្សភាគច្រើនចំនួន ៨៦,១៣ ភាគរយ បានឆ្លើយ «បាទ ឬចាស» ដោយហេតុផលថា ក្រុមឧក្រិដ្ឋជនចង់បង្កឲ្យមានភាពចលាចល ខណៈប្រទេសនេះត្រូវបានញាំញីដោយជម្លោះនយោបាយ ហើយជាការផ្គើនទៅនឹងការប្រឆាំងច្បាប់វិសោធនកម្មទាំងនោះ ចំណែកមនុស្សចំនួន ១៣,៨៧ ភាគរយ បានជឿជាក់ថា ពួកគេមិនបានធ្វើរឿងទាំងនោះពាក់ព័ន្ធជាមួយនយោបាយនោះទេ ដោយនិយាយថា អ្នកបំផ្ទុះគ្រាប់បែកទាំងនោះ បានធ្វើឡើងកើតចេញពីជម្លោះបុគ្គល ឬជំនួញ។
ចំនួន ៧៦,៣៩ ភាគរយ បាននិយាយថា ឧប្បត្តិហេតុនោះបានបំផ្លាញនិមិត្តរូបរបស់ប្រទេស ដែលបានបង្កឲ្យប្រជាជនមានអារម្មណ៍គ្មានសុវត្ថិភាព និងមិនជឿជាក់ទៅលើរដ្ឋាភិបាល ចំណែក ២៣,៦១ ភាគរយ បានជឿថា ការជឿជាក់ជាសាធារណៈទៅលើរដ្ឋាភិបាល មិនបានធ្វើឲ្យប៉ះពាល់នោះទេ ហើយរដ្ឋាភិបាលនឹងមានសមត្ថភាពចាត់វិធានការតាមផ្លូវច្បាប់ប្រឆាំងក្រុមឧក្រិដ្ឋជន ហើយគ្រប់គ្រងស្ថានការណ៍ឲ្យវិលត្រឡប់ទៅរកភាពល្អប្រសើរដូចដើមវិញ។
ដោយបានសួរថា តើពួកគេគិតថា នឹងមានហេតុការណ៍បំផ្ទុះគ្រាប់បែកកើតឡើងវិញដែរ ឬទេ មនុស្សចំនួន ៨៣,៩៣ ភាគរយ បាននិយាយថា«បាទ ឬចាសអាចកើតឡើងម្តងទៀត» ចំណែក ១៦,០៧ ភាគរយ បាននិយាយថា «អត់ទេ» ដោយបានជឿជាក់ថា ក្រុមឧក្រិដ្ឋជនគ្រាន់តែចង់បង្កឲ្យមានចលាចល និងជ្រួលច្របល់ប៉ុណ្ណោះ៕ BKP/SK