ការផ្ទុះអាវុធរវាងអាមេនី និងអាស៊ែបៃហ្សង់ នាពេលកន្លងមក។ រូបថត AFP
.jpg)
ក្រុងវ៉ាស៊ីនតោន៖ ក្រសួងការបរទេសអាមេរិកបានប្រកាសថា ប្រទេសអាមេនី និងអាស៊ែបៃហ្សង់ ជាថ្មីម្តងទៀត បានឯកភាពគ្នាគោរព «បទឈប់បាញ់មនុស្សធម៌» មួយ នៅក្នុងជម្លោះតំបន់ណាហ្គូរណូ និងការ៉ាបាក់ហ៍ឱ្យមានប្រសិទ្ធភាពកាលពីថ្ងៃចន្ទ ក្រោយពីមានកិច្ចប្រឹងប្រែងនានា ដើម្បីទប់ស្កាត់មិនឱ្យមានការបង្ហូរឈាមនៅតំបន់ជម្លោះបានបរាជ័យ។
ក្រុមមេដឹកនាំពិភពលោកបាន និងកំពុងដណ្តើមគ្នាជ្រៀតជ្រែកអស់ជាច្រើនសប្តាហ៍ ដើម្បីសម្របសម្រួលឱ្យមានបទឈប់បាញ់មួយ ដោយប្រធានាធិបតីប្រទេសរុស្ស៊ី លោក វ៉្លាឌីមៀរ ពូទីន បានប៉ាន់ប្រមាណថា រហូតមកទល់ពេលនេះ មនុស្សជិត ៥ ០០០ នាក់ បានស្លាប់ក្នុងការប្រយុទ្ធគ្នាយ៉ាងខ្លាំងក្លានៅខេត្តសម្បូរទៅដោយភ្នំ ក្នុងរយៈពេលប៉ុន្មានសប្តាហ៍ថ្មីៗនេះ។
បទឈប់បាញ់គ្នាដំបូងមួយរបស់ភាគីទាំង ២ បានចរចាដោយប្រទេសបារាំង និងបទឈប់បាញ់ទី២ ដែលសម្របសម្រួលដោយរុស្ស៊ី បានបរាជ័យ។
យោងតាមសេចក្តីថ្លែងការណ៍រួម ១ ចេញពីក្រសួងការបរទេស US និងក្រុម «មីនស្កិ៍» ដែលព្យាយាមដឹកនាំឱ្យភាគីទាំង ២ ចរចា ដើម្បីបញ្ចប់ជម្លោះនោះ បានឱ្យដឹងថា បទឈប់បាញ់ចុងក្រោយបំផុតបានចូលជាធរមាននៅម៉ោង ៨ ព្រឹកថ្ងៃចន្ទម្សិលមិញ៕ AFP/SK
