ក្រុងវ៉ាស៊ីនតោនៈ រដ្ឋមន្ត្រីក្រសួងការបរទេសអាមេរិក លោក ម៉ៃក៍ ប៉ុមប៉េអូ បានថ្លែងកាលពីល្ងាចថ្ងៃចន្ទថា អាមេរិកនឹងដកបុគ្គលិកទូត ដែលនៅសល់របស់ខ្លួនចេញពីស្ថានទូតនៅក្រុងការ៉ាកាស ខណៈវិបត្តិនៅវ៉េណេស៊ុយអេឡាកាន់តែធ្ងន់ធ្ងរឡើងនោះ។
លោក ប៉ុមប៉េអូ បានសរសេរនៅក្នុងគេហទំព័រធ្វីធើរថា៖ «ការសម្រេចចិត្តនេះ បានឆ្លុះបញ្ចាំងឲ្យឃើញអំពីស្ថានការណ៍កាន់តែអាក្រក់ខ្លាំងឡើងនៅវ៉េណេស៊ុយអេឡា និងមានការសន្និដ្ឋានថា វត្តមានរបស់បុគ្គលិកទូតអាមេរិកនៅស្ថានទូត បានក្លាយទៅជាលក្ខខណ្ឌមួយទៅលើនយោបាយអាមេរិក»។
កាលពីថ្ងៃទី ២៤ ខែ មករា ក្រសួងការបរទេសអាមេរិក បានចេញបញ្ជាឲ្យបុគ្គលិករដ្ឋាភិបាលអាមេរិកទាំងអស់ ចេញពីប្រទេស វ៉េណេស៊ុយអេឡា ជាបន្ទាន់ ជាទីដែល ប្រធានាធិបតី លោក នីកូឡាស ម៉ាឌូរ៉ូ កំពុងប្រឈមនឹងការប្រកួតប្រជែងដណ្តើមអំណាចយ៉ាងស្វិតស្វាញ ជាមួយមេដឹកនាំគណបក្សប្រឆាំង លោកJuan Guaido នៅចំពេលប្រទេស វ៉េណេស៊ុយអេឡា មានវិបត្តិសេដ្ឋកិច្ចធ្លាក់ចុះយ៉ាងគំហុកនោះ៕ AFP/SK