ក្រុងអាកាកាលី៖ អាមេរិក និងតួកគី កាលពីថ្ងៃអាទិត្យ បានចាប់ផ្តើមល្បាតរួមគ្នានៅប្រទេស ស៊ីរីភាគឦសាន ដែលមានគោលបំណងចង់បន្ធូរបន្ថយភាពតានតឹង រវាងក្រុងអង់ការ៉ា និងកងកម្លាំងឃើដគាំទ្រដោយអាមេរិក ដែលបានប្រយុទ្ធយ៉ាងស្វិតស្វាញជាមួយក្រុមរដ្ឋអ៊ិស្លាម។
អ្នកកាសែត AFP ម្នាក់ បានរាយការណ៍ថា រថពាសដែក ៦ គ្រឿង របស់តួកគីបានបើកឆ្លងកាត់ព្រំដែន ដើម្បីទៅចូលរួមជាមួយកងកម្លាំងអាមេរិកនៅប្រទេស ស៊ីរី ដើម្បីល្បាតរួមគ្នាជាលើកដំបូងរបស់ពួកគេ ស្ថិតនៅក្រោមកិច្ចព្រមព្រៀងមួយដែលបានរៀបចំធ្វើឡើងរវាងក្រុងវ៉ាស៊ីនតោន និងក្រុងអង់ការ៉ា។
ឧទ្ធម្ភាគចក្រ ២ គ្រឿង បានហោះពីលើតំបន់នោះ ខណៈរថពាសដែកជាច្រើនគ្រឿងរបស់តួកគីបានបើកទម្លុះជញ្ជាំងបេតុង ដែលខណ្ឌចែកប្រទេសទាំង ២ នោះ។
បន្ទាប់មកពួកគេបានធ្វើដំណើរឆ្ពោះទៅភាគខាងលិច ជាមួយរថពាសដែកអាមេរិក មានចំនួនប្រហាក់ប្រហែលគ្នា ជាមួយរថយន្តសង្គ្រោះបន្ទាន់មួយគ្រឿង និងរថយន្តភីកអាប់មួយគ្រឿងទៀត ដើម្បីចូលរួមប្រតិបត្តិការរួម នៅមុនពេលឆ្លងកាត់ត្រឡប់ទៅកាន់ប្រទេស តួកគី វិញ។
ក្រសួងការពារជាតិតួកគីបានថ្លែងថា យន្តហោះដ្រូនជាច្រើនគ្រឿង ត្រូវបានដាក់ពង្រាយនៅទីនោះ។
កិច្ចព្រមព្រៀងនោះបានធ្វើឡើងកាលពីថ្ងៃទី ៧ ខែ សីហា ដោយមានគោលបំណងចង់បង្កើត «តំបន់សុវត្ថិភាព» មួយរវាងព្រំដែនតួកគី និងតំបន់ប្រទេស ស៊ីរី នៅទន្លេ Euphrates ភាគខាងកើត ដែលបានគ្រប់គ្រងដោយអង្គភាពការពារប្រជាជនឃើដ (YPG)។
កងកម្លាំងឃើដស៊ីរី បានចាប់ផ្តើមដកកងកម្លាំងចេញពីព្រំដែនតួកគីកាលពីចុងខែសីហាកន្លងទៅ។
អង្គភាព YPG ជាខ្នងបង្អែករបស់កងកម្លាំងប្រជាធិបតេយ្យស៊ីរី ជាដៃគូសំខាន់មួយរបស់ក្រុងវ៉ាស៊ីនតោននៅក្នុងការប្រយុទ្ធប្រឆាំងជាមួយក្រុមជីហាដនៅប្រទេស ស៊ីរី។
ប៉ុន្តែក្រុងអង់ការ៉ា បានមើលឃើញអង្គភាព YPG ថា ជាការពង្រីកគណបក្សពលករឃើដដោយខុសច្បាប់។
កងកម្លាំង PKK ដែលបានធ្វើការបះបោរប្រឆាំងរដ្ឋឃើដចាប់តាំងពីឆ្នាំ ១៩៨៤ ហើយត្រូវបានដាក់ចូលក្នុងបញ្ជីខ្មៅថា ជាក្រុមភេរវករមួយដោយក្រុងអង់ការ៉ា អាមេរិក និងសហភាពអឺរ៉ុប។
ការគាំទ្រកងកម្លាំងប្រជាធិបតេយ្យស៊ីរី (SDF) របស់អាមេរិក ជាចំណុចអរិភាពដ៏សំខាន់មួយជាមួយតួកគី ដែលជាសមាជិករបស់អង្គការណាតូ។
នៅពេលប្រយុទ្ធនៅក្នុងតំបន់ប្រឆាំងក្រុមជីហាដឲ្យបរាជ័យ ទិដ្ឋភាពនៃការដកយោធាអាមេរិកចេញពីតំបន់នោះ បានធ្វើឲ្យកងកម្លាំងឃើដមានការភ័យខ្លាចចំពោះការវាយប្រហាររបស់ក្រុមឃើដផ្សេងទៀតមកលើខ្លួន។
លោក Riyad Khamis ជាប្រមុខក្រុមប្រឹក្សាយោធា SDF បានថ្លែងថា៖ «យើងកំពុងអនុវត្តកិច្ចព្រមព្រៀងនោះ ហើយយើងអាចទប់ស្កាត់សង្គ្រាមនោះបាន»៕ AFP/SK