លោក អាសាដ (ស្តាំខាងមុខ) ជជែកជាមួយប្រេសិតពិសេសរុស្ស៊ីនៅក្រុងដាម៉ាស។ Xinhua
.jpg)
ក្រុងដាម៉ាស៖ យោងតាមការិយាល័យប្រព័ន្ធផ្សព្វផ្សាយរបស់ប្រធានាធិបតីស៊ីរីបានឲ្យដឹងថា ប្រធានាធិបតីស៊ីរី លោក បាសារ-អាល់-អាសាដ កាលពីថ្ងៃអាទិត្យ បានទទួលប្រេសិតពិសេសរបស់ប្រធានាធិបតីរុស្ស៊ី ប្រចាំនៅប្រទេស ស៊ីរី គឺលោក Alexander Lavrentiev ហើយបានពិភាក្សាជាមួយលោកនៅក្នុងជំនួបកំពូលត្រីភាគី ដែលបានចាប់ផ្តើមរៀបចំធ្វើឡើងកាលពីថ្ងៃចន្ទនៅទីក្រុងអង់ការ៉ា។
លោក Lavrentiev បានបញ្ជាក់អះអាងប្រាប់លោក អាសាដ អំពីកាលបរិច្ឆេទនៃជំនួបកំពូលត្រីភាគី ដែលនឹងធ្វើឡើងនៅក្នុងចំណោមប្រទេស តួកគី រុស្ស៊ី និងអ៊ីរ៉ង់។
ការពិភាក្សានោះ បាននិយាយលើកឡើងអំពីកិច្ចខិតខំប្រឹងប្រែងរបស់រុស្ស៊ី ដែលបានបង្កឧបសគ្គជាច្រើនដោយ «បណ្តាប្រទេសមួយចំនួននៅក្នុងតំបន់ និងបរទេស ដែលមានគោលបំណងចង់ធ្វើឲ្យសង្គ្រាមនៅប្រទេស ស៊ីរី អូសបន្លាយពេលយូរ»។
មន្ត្រីរុស្ស៊ីបានបញ្ជាក់អះអាងអំពីភាពស្មោះត្រង់របស់ប្រទេសលោក ដើម្បីបន្តការងារជាមួយក្រុងដាម៉ាស ជុំវិញការប្រយុទ្ធប្រឆាំងភេរវកម្ម និងការរំដោះតំបន់ទាំងអស់នៅក្នុងប្រទេស ស៊ីរី។
កាលពីព្រឹកថ្ងៃចន្ទកាសែត al-Watan គាំទ្ររដ្ឋាភិបាលបាននិយាយថា ការបង្កើតគណៈកម្មាធិការរដ្ឋធម្មនុញ្ញ គឺនៅតែស្ថិតនៅក្រោមការប្រុងប្រយ័ត្ន ខណៈប្រេសិតពិសេសរបស់អង្គការសហប្រជាជាតិប្រចាំនៅប្រទេស ស៊ីរី លោក Geir Pedersen បានរង់ចាំការសម្រេចចិត្តរបស់រដ្ឋាភិបាលស៊ីរី និងបណ្តារដ្ឋធានីទាំងអស់នោះ។
កាសែតនោះបាននិយាយថា លោក Alexander Lavrentiev បានមកដល់រដ្ឋធានីដាម៉ាស ដើម្បីរៀបចំកិច្ចពិភាក្សាជាមួយមេដឹកនាំស៊ីរីនៅមុនជំនួបកំពូលត្រីភាគីនៅអង់ការ៉ា៕ Xinhua/SK
