ប្រធានាធិបតីតួកគី លោក អេរដូហ្គែន (ស្តាំ) ថតរូបជាមួយប្រមុខលីប៊ី លោក ហ្វាយីស អាល់-សាររ៉ាច។ AFP
.jpg)
ក្រុងអ៊ីស្តង់ប៊ុល៖ ប្រធានាធិបតីតួកគីលោក រ៉េសិប តៃយីប អេរដូហ្គែន កាលពីថ្ងៃសៅរ៍បានព្រមានប្រទេស អឺរ៉ុប ថា ខ្លួនអាចនឹងប្រឈមនឹងការគំរាមកំហែងថ្មីចេញពីក្រុមអង្គការភេរវករ ប្រសិនបើរដ្ឋាភិបាលបានទទួលស្គាល់ដោយអង្គការសហប្រជាជាតិនៅប្រទេស លីប៊ី នៅក្នុងទីក្រុងទ្រីប៉ូលីដួលរលំមែននោះ។
នៅក្នុងអត្ថបទដែលបានចុះផ្សាយនៅលើវេបសាយសារព័ត៌មានប៉ូលីទីកូ ស្តីពីកិច្ចប្រជុំសន្តិភាពនៅលីប៊ីនៅក្នុងទីក្រុងប៊ែរឡាំង លោក អេរដូហ្គែន បានថ្លែងថា ការខកខានមិនបានគាំទ្ររដ្ឋាភិបាលបង្រួបបង្រួមជាតិ (GNA) ឲ្យបានគ្រប់គ្រាន់របស់ប្រទេសអឺរ៉ុប គឺ «ជាការបង្ហាញឲ្យឃើញតម្លៃដ៏សំខាន់ផ្ទាល់របស់ខ្លួន នៅក្នុងនោះរួមមានប្រជាធិបតេយ្យ និងសិទ្ធិមនុស្ស»។
រដ្ឋាភិបាល GNA ដឹកនាំដោយលោក ហ្វាយីស អាល់-សាររ៉ាច បានស្ថិតនៅក្រោមការវាយប្រហារចាប់តាំងពីខែមេសា ចេញពីកងកម្លាំងរបស់បុរសខ្លាំងលោក ហ្គាលីហ្វាហាហ្វតា មានមូលដ្ឋាននៅភាគខាងកើតប្រទេស លីប៊ី ដោយមានការវាយប្រហារបណ្តាលឲ្យជនស៊ីវិលជាង ២៨០ នាក់ និងក្រុមយុទ្ធជន ២ ០០០ នាក់ផ្សេងទៀតស្លាប់ នៅក្នុងជម្លោះនៅលីប៊ី។
លោក Giuseppe Conter (ស្តាំ) ពិភាក្សាជាមួយបុរសខ្លាំងលោក ហ្គាលីហ្វា ហាហ្វតារ(ឆ្វេង)នៅទីក្រុងរ៉ូម។ AFP
លោក អេរដូហ្គែន បានសរសេរនៅលើគេហទំព័រធ្វីធើររបស់លោកថា៖ «ប្រទេសអឺរ៉ុបនឹងជួបប្រទះនូវបញ្ហា និងការគំរាមកំហែងសាជាថ្មីៗ ប្រសិនបើរដ្ឋាភិបាលស្របច្បាប់របស់ប្រទេស លីប៊ី ពិតជាដួលរលំមែននោះ»។
«ក្រុមអង្គការភេរវកម្មដូចជា ក្រុមអាយស៊ីស ISIS និងក្រុមអាល់កៃដា ដែលបានបរាជ័យនៅក្នុងការវាយប្រហារដោយយោធានៅក្នុងប្រទេស ស៊ីរី និងអ៊ីរ៉ាក់ ហើយពួកគេអាចនឹងស្វែងរកទឹកដីថ្មីមួយទៀត ដើម្បីរៀបចំកម្លាំងឡើងវិញ»។
នៅក្នុងការផ្តួចផ្តើមគំនិតរួមមួយ ប្រទេស តួកគី និងរុស្ស៊ី បានសម្របសម្រួលឲ្យមានបទឈប់បាញ់គ្នាមួយ ប៉ុន្តែលោក ហាហ្វតារ បានដើរចេញពីកិច្ចពិភាក្សានៅក្នុងទីក្រុងម៉ូស្គូនៅសប្តាហ៍នេះ ដោយមានគោលបំណងចង់ឲ្យមានកិច្ចព្រមព្រៀងបទឈប់បាញ់ចុងក្រោយ។
បុរសខ្លាំងលោក ហ្គាលីហ្វា ហាហ្វតារ(ទី២ស្តាំ)ត្រូវបានអមដោយបុគ្គលិកសន្តិសុខផ្ទាល់របស់លោក។ AFP
លោក អេរដូហ្គែន បានខឹងយ៉ាងខ្លាំង ហើយបានចោទប្រកាន់លោក ហាហ្វតារ ពីបទដើរចេញពីក្រុងម៉ូស្គូ ហើយបានថ្លែងថា លោកនឹង «ផ្តល់មេរៀនដល់លោក ហាហ្វតារ» ប្រសិនបើលោកចាប់ផ្តើមបន្តធ្វើការវាយប្រហារទៀតនោះ។
រដ្ឋាភិបាលរបស់លោក អេរដូហ្គែន បានគាំទ្រលោក សាររ៉ាច ហើយរដ្ឋសភាតួកគីកាលពីដើមខែនេះបានអនុម័តឲ្យដាក់ពង្រាយកងកម្លាំងនៅលីប៊ី ក្រោយពីបានចុះកិច្ចព្រមព្រៀងសន្តិសុខ៕ AFP/SK
