ក្រុងតេអេរ៉ង់៖ ប្រមុខទីភ្នាក់ងារអាតូមិកអ៊ីរ៉ង់កាលពីថ្ងៃអាទិត្យ បានរិះគន់ក្រុមប្រទេសមហាអំណាចនៅអឺរ៉ុប ដោយបាននិយាយថា ជាការក្បត់កិច្ចសន្យារបស់ពួកគេ ដែលបានផ្តល់ឲ្យសាធារណរដ្ឋអ៊ិស្លាមនេះនូវជម្រើសតិចតួច ប៉ុន្តែប្រទេសនេះបានកាត់បន្ថយការប្តេជ្ញារបស់ខ្លួននៅក្រោមកិច្ចព្រមព្រៀងនុយក្លេអ៊ែរមួយ។
លោក Ali Akbar Salehi បានថ្លែងនៅកាន់ក្រុមអ្នកកាសែតរួមជាមួយលោក Cornel Feruta ប្រមុខស្តីទីនៃទីភ្នាក់ងារថាមពលអាតូមិកអន្តរជាតិ (IAEA) ដែលបំពេញទស្សនកិច្ចមួយថ្ងៃនៅក្រុងតេអេរ៉ង់។
ដំណើរទស្សនកិច្ចរបស់មន្ត្រី IAEA បានកើតឡើងមួយថ្ងៃក្រោយពីអ៊ីរ៉ង់និយាយថា ខ្លួនកំពុងដំឡើងម៉ាស៊ីនបំបែកធាតុទំនើបៗជាច្រើនគ្រឿងដែលអាចចម្រាញ់សារធាតុអ៊ុយរ៉ានីញ៉ូមនូវអាត្រាមួយលឿន ជាវិធានការថ្មីបំផុតចំពោះកិច្ចព្រមព្រៀងនុយក្លេអ៊ែរឆ្នាំ ២០១៥ ជាប្រវត្តិសាស្ត្រនេះ។
វិធានការនេះ គឺជាជំហានទី ៣ នៅក្នុងយុទ្ធសាស្ត្រមួយដែលអ៊ីរ៉ង់បានអនុវត្តនៅក្នុងខែឧសភា ដោយបានកាត់បន្ថយការប្តេជ្ញាចំពោះកម្មវិធីនុយក្លេអ៊ែររបស់ខ្លួន នៅក្នុងកិច្ចប្រឹងប្រែងមួយ ដើម្បីបង្ខំឲ្យភាគីដែលនៅសល់នៃកិច្ចព្រមព្រៀងនេះ គោរពពាក្យសន្យាចំពោះការកាត់បន្ថយទណ្ឌកម្មរបស់អាមេរិក។
អង់គ្លេស បារាំង និងអាល្លឺម៉ង់ កំពុងព្យាយាមជួយសង្គ្រោះកិច្ចព្រមព្រៀងនុយក្លេអ៊ែរនេះ ដែលបានចាប់ផ្តើមប្រេះស្រាំកាលពីឆ្នាំទៅ នៅពេលដែលលោកប្រធានាធិបតី US ដូណាល់ ត្រាំ បានដកចេញពីកិច្ចព្រមព្រៀងនុយក្លេអ៊ែរនេះ និងបានចាប់ផ្តើមចាត់វិធានការដាក់ទណ្ឌកម្មប្រទេស អ៊ីរ៉ង់ ជាថ្មី។
លោក Salehi បានថ្លែងទៀតថា៖ «សហភាពអឺរ៉ុប ត្រូវបានសន្មតថាជាអ្នកជំនួសអាមេរិក ដោយសារតែពួកគេបានខកខានមិនបានធ្វើតាមការសន្យារបស់ពួកគេ»៕ AFP/PSA