ក្រុងតេអេរ៉ង់ៈក្រសួងការបរទេសអ៊ីរ៉ង់កាលពីថ្ងៃអាទិត្យ បានថ្កោលការវាយប្រហារទៅលើពិធីរៀបអាពាហ៍ពិពាហ៍នៅក្នុងក្រុងកាប៊ុលនៃប្រទេស អាហ្វហ្គានីស្ថាន ជាទង្វើអមនុស្សធម៌។
ការវាយប្រហារគ្រាប់បែកទៅលើរោងការមួយដែលមានភ្ញៀវចូលរួមយ៉ាងច្រើនកុះករនៅក្នុងក្រុងកាប៊ុលកាលពីល្ងាចថ្ងៃសៅរ៍ ដោយបានបណ្តាលឲ្យមនុស្ស ៦៣ នាក់ស្លាប់ និង ១៨២ នាក់រងរបួស។
នៅក្នុងសេចក្តីថ្លែងការណ៍មួយ អ្នកនាំពាក្យក្រសួងការបរទេស លោក Abbas Mousavi បានសម្តែងសមាណទុក្ខចំពោះរដ្ឋាភិបាលអាហ្វហ្គានីស្ថាន និងប្រជាជន និងក្រុមគ្រួសាររបស់ក្រុមជនរងគ្រោះ។
លោក Mousavi បានថ្លែងថា ធាតុផ្សំនៅក្រោយអំពើឧក្រិដ្ឋកម្ម គឺជាសត្រូវរបស់មនុស្សជាតិ សន្តិភាព សន្តិសុខ និងស្ថេរភាពនៅក្នុងប្រទេស អាហ្វហ្គានីស្ថាន និងនៅក្នុងតំបន់ទាំងមូល៕ PSA