​វាយប្រហារ​ផ្លូវអាកាស​និង​​​ប៉ះទង្គិច​គ្នា​នៅ​ប៉ាគីស្ថាន សម្លាប់​៧៥​នាក់


ក្រុងមីរ៉ាន់ស្ហាៈ យន្តហោះ​ទ័ពអាកាស​ប៉ាគីស្ថាន​ជាច្រើន​គ្រឿង​បាន​វាយប្រហារ ធ្ងន់ធ្ងរ​លើ​បណ្ដា​គោលដៅ​ក្រុម​តាលីបង់​នៅ​តំបន់​កុលសម្ព័ន្ធ​ដ៏ចលាចល​នៅ ក្បែរ​ព្រំដែន​អាហ្វហ្គានីស្ថាន​មុន​ពេល​ការ​ប៉ះ ទង្គិច​គ្នា​ជាច្រើន បាន​ផ្ទុះ​ឡើង​រវាង​យោធា និង​ក្រុម​បះបោរ ដោយ​បណ្តាល​ឲ្យ​មនុស្ស​រាប់​សិប​នាក់​ស្លាប់​។

ក្រុម​មន្ត្រី​និយាយ​ថា មនុស្ស​យ៉ាង​តិច​៦០​នាក់ ក្នុង​នោះ​មាន​មេបញ្ជាការ​ក្រុម​បះបោរ​ជាច្រើន​នាក់​ផង ត្រូវ​បាន​សម្លាប់​នៅក្នុង​ការ​វាយប្រហារ​តាម​ផ្លូវអាកាស​ពី​ព្រឹក​ព្រលឹម ថ្ងៃ​នេះ ខណៈ​ដោយឡែក​ពី​នេះ​ក្រុម​សកម្មប្រយុទ្ធ​យ៉ាង​តិច​១១​នាក់​និង​មន្រ្តី សន្តិសុខ​៤​នាក់​បាន​ស្លាប់​ក្នុង​ការ​ប្រយុទ្ធ​គ្នា​ក្បែរ​ទីប្រជុំជន Mir Ali ក្នុង​តំបន់​វ៉ាហ្ស៊ីរី ខាង​ជើង​។

ដោយ​គ្មាន​រៀបរាប់​ពិស្ដារ ថា​នរណា​ជា ក្រុម​មេបញ្ជាការ សេចក្ដី​ថ្លែងការណ៍​ពី​ផ្នែក​ប្រព័ន្ធ​ផ្សព្វផ្សាយ​របស់​យោធា បាន​និយាយ​ថា​៖ «តាមរយៈ​របាយការណ៍​ជាច្រើន​មក​ដល់​ពេល​នេះ ភេរវករ​ក្បាល​រឹង​៦០​នាក់ ក្នុង​នោះ​មាន​ទាំង​មេបញ្ជាការ​សំខាន់ និង​ជនបរទេស​ខ្លះ ក៏​ត្រូវ​បាន​សម្លាប់​នៅក្នុង​ការ​វាយប្រហារ​នោះ​ដែរ​និង​ប្រមាណ​៣០​នាក់ បាន​រងរបួស​»។

ក្នុង​សេចក្ដី​ថ្លែងការណ៍​មួយ​យោធា បាន​និយាយ​ថា ក្នុង​ឧបទ្ទវ​ហេតុ​ក្រោយ​មក «ភេរវករ​១១​នាក់​ត្រូវ​បាន​សម្លាប់ និង​កម្លាំង​សន្តិសុខ​៤​នាក់ ដែល​ក្នុង​នោះ​មាន​មន្រ្តី​ម្នាក់ បាន​ធ្វើ​ទុក្ករកិរិយា។

ចំនួន​និង​អត្តសញ្ញាណ​របស់​អ្នក​ស្លាប់​គេ មិន​អាច​ផ្ទៀងផ្ទាត់​បាន​ដោយ​ឯករាជ្យ​ទេ ព្រោះ​ការ​ប្រយុទ្ធ​គ្នា​កំពុង​បន្ត ហើយ​ក្រុម​អ្នកកាសែត​មិន​អាច​ចូល​ក្នុង​តំបន់​នោះ​បាន​ទេ។

ក្រុម​មន្ត្រី​ចារកម្ម​ក្នុង​តំបន់ និង​ក្រុម​អ្នក​ស្រុក បាន​និយាយ​ថា ក្រុម​ជនស៊ីវិល ក៏​ស្ថិត​ក្នុង​ចំណោម​អ្នក​រងរបួស​ដែរ។

យោធា​បាន​និយាយ​ថា អ្នក​ដែល​គេ​យក​ជា​គោលដៅ​ក្នុង​ប្រតិបត្តិការ​ពី​ថ្ងៃ ពុធ ត្រូវ​បាន​ទាក់ទង​ជាមួយ​នឹង​ការ​វាយប្រហារ​ដោយ​គ្រាប់បែក និង​ការ​វាយប្រហារ​អត្តឃាត​ថ្មីៗ ជុំវិញ​ប្រទេស​នេះ។

យោធា​ក៏​បាន​និយាយ​ផង​ដែរ​ថា​«ទីតាំង​លាក់ទុក​»​សម្ភារ​គ្រឿង​គ្រាប់​រំសេវ​ដ៏ធំ​មួយ​ត្រូវ​បាន​កម្ទេច​ចោល ក្នុង​ការ​វាយប្រហារ​នោះ។

អ្នក យក​ព័ត៌មាន AFP ម្នាក់ នៅក្នុង​ខណ្ឌ​នោះ​បាន​និយាយ​ថា ឧទ្ធម្ភាគចក្រ​យោធា​ដែល​មាន​បំពាក់​អាវុធ និង​ក្រុម​ទាហាន​ថ្មើរ​ជើង កំពុង​បាញ់រះ​លើ​គោលដៅ នៅក្នុង​និង​ជុំវិញ​ទីប្រជុំជន Mir Ali ហើយ​ក្រុម​កុលសម្ព័ន្ធ ត្រូវ​បាន​បញ្ជា​ឲ្យ​ភៀស​ខ្លួន​ចេញ​៕ MN

ព័ត៌មានថ្មីៗ