ក្រុងវ៉ាស៊ីនតោន៖ សារព័ត៌មាន CNN បានរាយការណ៍កាលពីថ្ងៃពុធថា រូបភាពផ្កាយរណបថ្មីបានបង្ហាញទីតាំងមិនប្រកាសរបស់កូរ៉េខាងជើងដែលអ្នកជំនាញសង្ស័យថា អាចត្រូវបានប្រើប្រាស់ ដើម្បីផលិតក្បាលគ្រាប់នុយក្លេអ៊ែរ។
របាយការណ៍នោះ បានរាយការណ៍ថា រូបភាពជាច្រើនដែលត្រូវបានថតដោយមន្ទីរពិសោធន៍ Planet Labs និងត្រូវបានវិភាគដោយក្រុមអ្នកជំនាញនៅវិទ្យាស្ថានសិក្សាអន្តរជាតិ Middlebury បានបង្ហាញទីតាំងដ៏សកម្មមួយនៅក្នុងភូមិ Wollo-ri នៅក្បែរក្រុងព្យុងយ៉ាង។
លោក Jeffrey Lewis សាស្ត្រាចារ្យនៅវិទ្យាស្ថាននោះ ត្រូវបានគេដកស្រង់សម្ដីដោយនិយាយថា រូបភាពនោះ មានចំណុចពិសេសជាច្រើនរបស់ទីតាំងនុយក្លេអ៊ែររបស់កូរ៉េខាងជើង ព្រំដែនសន្តិសុខកន្លែងស្នាក់នៅកន្លែងគោរពបូជាសម្រាប់ក្រុមមេដឹកនាំធ្វើទស្សនកិច្ច និងអគារក្រោមដី។ ទីតាំងនេះ ស្ថិតនៅក្បែររោងចក្រផលិតដបទឹក ដែលមិនមានលក្ខណៈដូចទៅនឹងទីតាំងនោះឡើយ។
លោកបានថ្លែងប្រាប់ CNN ថា រូបភាពនោះ បានបង្ហាញឲ្យឃើញពីចរាចរណ៍យានជំនិះ រថយន្តតូចៗ រថយន្ដដឹកទំនិញ និងការដឹកជញ្ជូនកុងតឺន័រ។ រោងចក្រនេះសកម្មណាស់។ សកម្មភាពមិនបានបន្ថយល្បឿនឡើយ មិននៅក្នុងអំឡុងការចរចាទេ និងមិនមែនឥឡូវនេះទេ។ រោងចក្រនេះ នៅតែផលិតអាវុធនុយក្លេអ៊ែរ។
កិច្ចការចរចាពីបញ្ហានុយក្លេអ៊ែររវាងក្រុងវ៉ាស៊ីនតោន និងក្រុងព្យុងយ៉ាងបានជាប់គាំង ដោយភាគីទាំង ២ បានខ្វែងគំនិតគ្នាទៅលើទំហំនៃការលុបបំបាត់នុយក្លេអ៊ែររបស់កូរ៉េខាងជើង និងការបន្ធូរបន្ថយទណ្ឌកម្មពីអាមេរិក។
CNN បានឲ្យដឹងថា ទីតាំងនេះត្រូវកំណត់អត្តសញ្ញាណក្នុងឆ្នាំ ២០១៥ ដោយក្រុមអ្នកស្រាវជ្រាវនៅមជ្ឈមណ្ឌល James Martin ដើម្បីសិក្សាអំពីការទប់ស្កាត់ការរីកសាយអាវុធនុយក្លេអ៊ែរ ប៉ុន្តែលោក Lewis និងក្រុមអ្នកស្រាវជ្រាវ មិនបានបោះពុម្ពផ្សាយទីតាំងនោះទេ ដោយសារមិនអាចកំណត់តួនាទីរបស់ទីតាំងនៅក្នុងកម្មវិធីនុយក្លេអ៊ែររបស់កូរ៉េខាងជើង៕ Yonhap/PSA