លោករដ្ឋមន្ត្រីការបរទេស អេស្ប៉ាញ Josep Borrell ថ្លែងនាពេលកន្លងមក។ រូបថត AFP
.jpg)
ក្រុងលុចសំបួ៖ ក្រុមមន្ត្រីការបរទេសអឺរ៉ុបកាលពីថ្ងៃចន្ទ បានសម្តែងការព្រួយបារម្ភ និងថ្កោលទោសចំពោះការវាយប្រហាររបស់តួកគីទៅលើកងកម្លាំងឃើដនៅស៊ីរីភាគខាងជើង ប៉ុន្តែបានព្រមានអំពីជម្រើសរបស់ពួកគេ ដើម្បីឲ្យមានវិធានការសម្របសម្រួលនៅទូទាំងប្លុកនេះមានកម្រិត។
ប្រទេសអឺរ៉ុបខ្លះនៅក្នុងនោះមាន អាល្លឺម៉ង់ និងបារាំង បានផ្អាកនាំអាវុធទៅប្រទេស តួកគី ជុំវិញការវាយលុកទ្រង់ទ្រាយធំ និងខ្លះទៀតដូចជាប្រទេស អ៊ីតាលី កំពុងជំរុញឲ្យអឺរ៉ុបហាមប្រាមនាំអាវុធជាផ្លូវការមួយ។
ប៉ុន្តែដោយមានប្រទេសអឺរ៉ុបខ្លះដែលបានជំរុញឲ្យមានការប្រុងប្រយ័ត្ន ដូច្នេះមិនត្រូវធ្វើឲ្យទំនាក់ទំនងមានភាពតានតឹងកាន់តែខ្លាំងឡើង ជាមួយប្រធានាធិបតីតួកគីលោក រ៉េសិប តៃយីប អេរដូហ្គែន ទេ ចំណែកកិច្ចប្រជុំក្រុមរដ្ឋមន្ត្រីការបរទេសនៅក្នុងប្រទេស លុចសំបួ មើលទៅមិនទំនងជាយល់ព្រមចំពោះចាត់វិធានការតឹងរ៉ឹងនោះឡើយ។
លោករដ្ឋមន្ត្រីការបរទេស អេស្ប៉ាញ Josep Borrell បានថ្លែងប្រាប់ក្រុមអ្នកកាសែត ខណៈដែលលោកបានទៅដល់ ដើម្បីចូលរួមកិច្ចប្រជុំនោះថា៖ «យើងគ្មានឥទ្ធិពលនោះទេ ប៉ុន្តែអ្វីដែលយើងអាចធ្វើនោះ គឺចាត់វិធានការទាំងអស់ទៅតាមលទ្ធភាព ដើម្បីបញ្ឈប់សកម្មភាពវាយប្រហារនេះ»។
លោក Borrell ថ្លែងថា ប្រទេស អេស្ប៉ាញ នឹងគាំទ្របម្រាមលក់អាវុធនៅទូទាំងអឺរ៉ុប ប៉ុន្តែខ្លួននឹងមានការពិបាកទទួលការគាំទ្រជាឯកច្ឆន្ទពីប្រទេសសមាជិកសហភាពអឺរុបទាំង ២៨ នោះ។
លោករដ្ឋមន្ត្រីការបរទេសអាល្លឺម៉ង់ Heiko Maas បានថ្លែងថា ការវាយប្រហាររបស់តួកគី គំរាមមិនឲ្យឈានទៅរកដំណោះស្រាយចំពោះសង្គ្រាមស៊ីវិលនៅស៊ីរី៕ AFP/PSA
