ក្រុងសាណាៈ អង្គការសហប្រជាជាតិ បានថ្លែងថា ក្មេង ១២ នាក់ និងស្ត្រី ១០ នាក់បានស្លាប់ ដោយសារការវាយប្រហារនៅក្នុងខេត្តហាចាភាគខាងជើងនៃប្រទេស យេម៉ែន នៅក្នុងរយៈពេល ៤៨ ម៉ោង។
នៅក្នុងសេចក្តីថ្លែងការណ៍មួយ ការិយាល័យសម្របសម្រួលជំនួយមនុស្សធម៌របស់អង្គការសហប្រជាជាតិ (OCHA) បានថ្លែងថា មនុស្ស ៣០ នាក់ត្រូវបានគេរាយការណ៍ថា បានរងរបួស នៅក្នុងនោះមានក្មេង ១៤ នាក់ ហើយមួយចំនួន ទៀត «បង្ខំចិត្តរត់ភៀសខ្លួនទៅតាមលទ្ធភាព ដើម្បីរក្សាជីវិត» របស់ពួកគេ។
អង្គការសហប្រជាជាតិមិនបាននិយាយអំពីអ្នកដែលត្រូវទទួលខុសត្រូវនោះទេ ប៉ុន្តែប្រព័ន្ធផ្សព្វផ្សាយរបស់ក្រុមឧទ្ទាមហ៊ូធី បានចោទប្រកាន់ក្រុមចម្រុះដឹកនាំដោយអារ៉ាប៊ី សាអ៊ូឌីតថា កំពុងវាយប្រហារទៅលើភាគីរដ្ឋាភិបាលយេម៉ែន ពីបទនៅពីក្រោយការវាយប្រហារនេះ។
តំបន់ខ្លះនៃខេត្តហាចា ត្រូវបានគ្រប់គ្រងដោយកងកម្លាំងរដ្ឋាភិបាល ចំណែកតំបន់ផ្សេងទៀត ដូចជាស្រុកគូហ្សា ដែលរងការវាយប្រហារដោយក្រុមឧទ្ទាមហ៊ូធី មានសម្ព័ន្ធមិត្ត ជាមួយប្រទេស អ៊ីរ៉ង់។
នៅក្នុងសេចក្តីថ្លែងការណ៍មួយ ដែលធ្វើឡើងដោយទីភ្នាក់ងារព័ត៌មានសាបា របស់ក្រុមឧទ្ទាមហ៊ូធី បានថ្លែងថា មន្ត្រីហ៊ូធី លោក Deifallah al-Shami បានចោទប្រកាន់ក្រុមចម្រុះពីបទសម្លាប់រង្គាលដោយចេតនា»។
ក្រុមចម្រុះនោះ មិនបាន ឆ្លើយតបភ្លាមៗ ទៅនឹងសំណើរបស់ AFP ឲ្យធ្វើអត្ថាធិប្បាយអំពី ការវាយប្រហារនោះនៅឡើយទេ៕ AFP/SK