បុរីញូវយ៉កៈ សេចក្តីថ្លែងការណ៍មួយរបស់អ.ស.ប.បានឲ្យដឹងកាលពីថ្ងៃអង្គារថា ក្រុមជនភៀសខ្លួនរ៉ូហ៊ីងយ៉ានៅមីយ៉ាន់ម៉ា បានប្រាប់ប្រេសិតពិសេសអង្គការសហប្រជាជាតិម្នាក់ដែលបានទៅទស្សនកិច្ចជំរំរបស់ពួកគេនៅក្នុងប្រទេសបង់ក្លាដែស នៅសប្តាហ៍នេះ ដែលថា ពួកគេ នឹងវិលត្រឡប់ទៅប្រទេសកំណើតរបស់ពួកគេវិញ ប្រសិនបើមានសុវត្ថិភាព និងប្រសិនបើពួកគេ ត្រូវបានផ្តល់សញ្ជាតិឲ្យនោះ។
ប្រេសិតពិសេសអង្គការសហប្រជាជាតិលោកស្រី Christine Schraner Burgener បានជួបក្រុមជនភៀសខ្លួនមូស្លីមរ៉ូហ៊ីងយ៉ានៅក្នុងស្រុកបាហ្សារ នៅក្នុងអំឡុងទស្សនកិច្ចបីថ្ងៃទៅកាន់បង់ក្លាដែស ពីថ្ងៃទី១៤កក្កដា ដល់១៦កក្កដា ត្រឹមតែប៉ុន្មានសប្តាហ៍ ក្រោយពីការពិភាក្សាជាមួយក្រុមមេដឹកនាំរបស់មីយ៉ាន់ម៉ាអំពីវិបត្តិជនភៀសខ្លួននេះ។
សេចក្តីថ្លែងការណ៍មួយរបស់អង្គការសហប្រជាជាតិបានឲ្យដឹងថា ប្រេសិតពិសេសរូបនេះ បានទទួលដំណឹងអំពីអំពើសាហាវព្រៃផ្សៃ ដែលមិនអាចស្រមៃដល់នោះ ត្រូវបានប្រព្រឹត្តនៅក្នុងរដ្ឋរ៉ាក់ឃីន។
សេចក្តីថ្លែងការណ៍នោះ បានបន្ថែមថា៖«ថ្វីបើមានការរំលោភសិទ្ធិមនុស្សធ្ងន់ធ្ងរក្តី ក៏ពួកគេបានសម្តែងក្តីសង្ឃឹមរបស់ពួកគេនៅចំពោះមុខប្រេសិតពិសេសរូបនោះថាពួកគេនឹងវិលត្រឡប់ទៅកន្លែងកំណើតវិញ ប្រសិនបើសន្តិសុខ អាចត្រូវបានធានា និងសញ្ជាតិអាចត្រូវបានគេផ្តល់ឲ្យនោះ»៕ PSA