ក្រុងវ៉ាស៊ីនតោនៈ សេតវិមាន បានថ្លែងកាលពីថ្ងៃពុធថា អាមេរិកនឹង «មិនអន្តរាគមន៍» ទេ ប្រសិនបើកូរ៉េខាងត្បូង សម្រេចចិត្តបញ្ជូនជំនួយស្បៀងអាហារទៅឲ្យប្រទេស កូរ៉េខាងជើង មែននោះ។
ការិយាល័យប្រធានាធិបតីបានថ្លែងថា លោកប្រធានាធិបតីអាមេរិក ដូណាល់ ត្រាំ បានបង្ហាញការគាំទ្រចំពោះជំនួយមនុស្សធម៌ដល់កូរ៉េខាងជើងទៅតាមលទ្ធភាពរបស់កូរ៉េខាងត្បូង នៅអំឡុងពេលសន្ទនាតាមទូរស័ព្ទមួយជាមួយប្រធានាធិបតី លោក មូន ជេអ៊ីន កាលពីថ្ងៃអង្គារកន្លងទៅ។
រដ្ឋមន្ត្រីព័ត៌មាននៃសេតវិមាន លោកស្រី Sarah Sanders ត្រូវបានគេសួរសំណួរនៅឯជំនួបមួយជាមួយក្រុមអ្នកសារព័ត៌មានកាលពីថ្ងៃពុធថា តើលោក ត្រាំ នឹងយល់ស្របទៅតាមផែនការនោះដែរ ឬយ៉ាងណា ព្រោះកូរ៉េខាងជើងបានបាញ់សាកល្បងមីស៊ីលជាច្រើនគ្រាប់ កាលពីចុងសប្តាហ៍មុន។
លោកស្រី Sanders បានថ្លែងថា៖ «ទាក់ទងទៅនឹងកូរ៉េខាងជើង តួនាទីរបស់ពួកយើងនឹងបន្តយុទ្ធនាការដាក់សម្ពាធបន្ថែមទៀត។ ការយកចិត្តទុកដាក់របស់ពួកយើង គឺផ្តោតទៅលើការលុបបំបាត់កម្មវិធីអាវុធនុយក្លេអ៊ែរ» ដោយនិយាយសំដៅទៅលើការដាក់ទណ្ឌកម្មដឹកនាំដោយអាមេរិក ដែលមានបំណងចង់លុបបំបាត់កម្មវិធីអាវុធនុយក្លេអ៊ែររបស់កូរ៉េខាងជើងនោះ។
លោកស្រីបានបន្ថែមថា៖ «ប្រសិនបើកូរ៉េខាងត្បូង បន្តវិធានការទៅមុខទៀតមែននោះ យើងនឹងមិនធ្វើអន្តរាគមន៍ជាដាច់ខាត»។
យោងតាមរបាយការណ៍ថ្មីមួយរបស់កម្មវិធីស្បៀងអាហារពិភពលោក និងអង្គការកសិកម្ម និងស្បៀងអាហារ បានឲ្យដឹងថា តាមការវាយតម្លៃមួយមានប្រជាជន ១០ លាននាក់ នៅកូរ៉េខាងជើង ឬប្រជាពលរដ្ឋចំនួន ៤០ ភាគរយ កំពុងត្រូវការស្បៀងជាបន្ទាន់។
ការដឹកជញ្ជូនជំនួយមនុស្សធម៌ទៅកាន់ប្រទេសដ៏ក្រីក្រមួយនេះ ជាញឹកញាប់ត្រូវបានរារាំងដោយការដាក់ទណ្ឌកម្មពីអន្តរជាតិទៅលើរបបនេះជុំវិញកម្មវិធីអាវុធនុយក្លេអ៊ែរ និងមីស៊ីលបាលីស្ទីក។
កាលពីឆ្នាំ ២០១៧ កូរ៉េខាងត្បូង បានផ្តល់ជំនួយមនុស្សធម៌ ៨ លានដុល្លារ ដល់កូរ៉េខាងជើង៕ Yonhap/SK