ធនាគារ​ចិន​យល់​ព្រម​ផ្តល់​កម្ចី $៥០ លាន​ដល់​ធនាគារ​អភិវឌ្ឍន៍​ជន​បទ


130902_11
សកម្មភាពកម្មករកំពុងលីបាវស្រូវនៅរោងម៉ាស៊ីនកិនស្រូវមួយក្នុងខេត្តកណ្តាលនាពេលកន្លងមក

ភ្នំពេញៈ មន្ត្រី​រដ្ឋាភិបាល​បាន​អះ​អាង​ថា មន្ត្រី​ធនាគារ​នីហរណ​អាហរណ​ចិន​បាន​យល់​ព្រម​ផ្តល់​កម្ចី​​ចំនួន ៥០ លាន​ដុល្លារ​ដល់​ធនាគារ​អភិវឌ្ឍន៍​ជន​បទ។ មន្ត្រី​ធនាគារ​អភិវឌ្ឍន៍​ជន​បទ​បាន​ឲ្យ​ដឹង​ថា អនុស្សរណៈ​យោគ​យល់​គ្នា​មួយ​ប្រហែល​អាច​ធ្វើ​នៅ​ខែ​ក្រោយ។

លោក សុន គន្ធរ ប្រធាន​ធនាគារ​អភិ​វឌ្ឍន៍​ជន​បទ​ដែល​ជា​ធនាគារ​រដ្ឋ​បាន​និយាយ​ថា មន្ត្រី​ធនាគារ​រដ្ឋ​ចិន​បាន​មក​ជួប​លោក​ជាមួយ​គម្រោង​ថ្មី​ដែល​នឹង អនុញ្ញាត​ឲ្យ​ធនាគារ​អភិវឌ្ឍន៍​ជនបទ​ខ្ចី​បំណុល​ជា​សាច់​ប្រាក់ សុទ្ធ​យក​ទៅ​ផ្តល់​ជូន​បន្ត​ឲ្យ​វិស័យ​ឯក​ជន​ដើម្បី​អភិវឌ្ឍ​ស្រូវ អង្ករ។

លោក​បាន​ឲ្យ​ដឹង​ថា គម្រោង​អាជីវកម្ម​ថ្មី​នេះ​មាន​បន្ទាប់ពី​ភាគី​ទាំង​ពីរ​បរាជ័យ​ទៅ​លើ ប្រាក់​កម្ចី​ ២០០ លាន​ដុល្លារ​ដែល​កម្ពុជា​បាន​​ស្វែង​រក​កាល​ពី​ឆ្នាំ​មុន។ ភាព​បរាជ័យ​នេះ​បាន​កើត​ឡើង​ដោយសារ​តែ​លក្ខ​ខណ្ឌនៃ​ភាគី​ទាំង​ពីរ​ខុស​គ្នា។

លោក​បាន​បន្ត​ថា ភាព​ខុស​គ្នា​បណ្តាល​មក​ពីភាគី​ធនាគារ​ចិន​បាន​តម្រូវ​ឲ្យ​យក​កម្ចី​នោះ​មក ​វិនិយោគ​លើ​រោង​ម៉ាស៊ីន និង​ទិញ​ម៉ាស៊ីន​ពី​ប្រទេស​ចិន​ព្រម​ទាំង​ឲ្យ​រដ្ឋ​ធានា​ទៅ​លើ​បំណុល​នោះ។ ​ចំណែក​ឯក​ម្ពុជា​ចង់​បាន​កម្ចី​នោះ​ជា​ទឹក​ប្រាក់​សម្រាប់​យក​មក​បង្វិល​ ឲ្យ​ផ្នែក​ឯក​ជន​យក​ទៅ​ទិញ​ស្រូវ​។

លោក​បាន​បន្ត​ថា៖ «ពេលនេះ​គេ​អនុញ្ញាត​ឲ្យ​ខ្ចី​រវាង​ធនាគារ​អភិវឌ្ឍន៍​ជន​បទ និង​ធនាគារ នីហរ័ណ​-អាហរ័ណ​ចិន​ឲ្យ​ធ្វើ​ការ​ជា​មួយ​គ្នា ​ហើយ​ រដ្ឋាភិបាល​មិន​អាច​ធានា​ទេ ​ពី​ព្រោះ​វា​ជា​កម្ចី​សម្រាប់​វិស័យ​ឯកជន។

លោកបាន​បន្ថែម​ថា ធនា​គារ​ ​នីហរ័ណ​-អាហរ័ណ​ចិន​បាន​យល់​ព្រម​ផ្តល់​ប្រាក់​កម្ចី​ចំនួន ៥០ លាន ដុល្លារ​ក្នុង​អត្រា​ការ​ប្រាក់ ៤ ភាគរយ​ក្នុង​មួយ​ឆ្នាំ និង​រយៈពេល​កម្ចី​គឺ​បី​ឆ្នាំ។

លោក​បាន​បញ្ជាក់​ថា ​អត្រា​ការ​ប្រាក់​ទៅ​ដល់​ដៃ​​វិនិ​យោ​គិន​ឯក​ជន​ក្នុង​ស្រុក​អាច​ឡើង​ដល់​ ៧ ​ភាគរយ​​ក្នុង​មួយ​ឆ្នាំ​ ព្រោះ​អត្រា​ការ​​ប្រាក់​ប្រតិ​បត្តិ​ការ​អាច​មាន​ទំហំ​ប្រមាណ​៣ ​ភាគ​រយ​។

តាម​ការ​ពិភាក្សា​គ្នា​ បន្ទាប់​ពី​ការ​ចុះ​ហត្ថ​លេខា​លើ​អនុស្សរណៈ​យោគ​យល់​គ្នារួច​ ធនាគារ​អភិវឌ្ឍន៍​ជន​បទ​អាច​ទទួល​សាច់​ប្រាក់​ចំនួន ២០ លាន​ដុល្លារ ក្នុង​ជំ​ហាន​ដំបូង​ ហើយ​ទឹក​ប្រាក់​ដែល​នៅ​សល់​នឹង​ត្រូវ​ដក​ជា​បន្ត​បន្ទាប់។

លោក​បាន​ និយាយ​ថា៖ «​នេះ​ជា​លើក​ទីមួយ​ហើយ ​ដែល​គេ​អនុ​ញ្ញាត​ឲ្យ​យើង​ខ្ចី​ជា​សាច់​ប្រាក់​សុទ្ធ ​តែ​ពី​មុន​គេ​មិន​ដែល​ឲ្យ​ខ្ចី​ជា​លុយ​សុទ្ធ​ចឹង​ទេ។​ យើង​ប្រើ​​កម្ចី​នេះ​សម្រាប់​ទិញ​ស្រូវ​។

គម្រោង​របស់គេ​ផ្តោត​លើក​សិកម្ម ​ធំ​ជាង​គេ​គឺ​ស្រូវ ​ហើយ​បន្ទាប់​មក​អាច​ដំឡូង​មី ឬ​កៅ​ស៊ូ»​។

លោក ​ហ៊ុន ​ឡាក់​ អគ្គ​លេខាធិការ​នៅ​សម្ព័ន្ធ​អ្នក​ផលិត​ និង​នាំ​ចេញ​កម្ពុជា​ និង​ជា​អគ្គនាយក​ក្រុម​ហ៊ុន​មេគង្គ អូរីហ្សា ​ត្រេឌីង ​ឲ្យ​ដឹង​ថា ​លោកក៏​ត្រូវ​បាន​អញ្ជើ​ញ​ឲ្យ​ចូលរួម​​ក្នុង​ជំនួប​នៃ​​មន្ត្រី​នៃ​ធនាគារ ​ទាំង​ពីរ​នោះ​ដែរ។

លោក​បាន​លើក​ឡើង​ថា​ លោកក៏​ធ្លាប់​យក​កម្ចី​ពី​ធនាគារ​អភិវឌ្ឍន៍​ជន​បទ​យក​ទៅ​ប្រកប​អាជីវកម្ម​ដែរ ​ហើយ​ជាមួយ​អត្រា​ការ​ប្រាក់ ៧ ភាគរយ​ក្នុង​មួយ​ឆ្នាំ មិន​ខ្ពស់​ពេក​ទេ​ តែ​ផល​លំបាក​គឺ​ការ​តម្រូវ​ឲ្យ​ដាក់​ប្លង់​បញ្ចាំ​ច្រើន។

លោក​បន្ត​ថា៖«​បើ​គេ​កាត់​បន្ថយ​តម្រូវ​នៃ​ការ​ដាក់​ទ្រព្យ​បញ្ចាំ​ច្រើន​ វា​នឹង​ជាការ​ល្អ​សម្រាប់​វិស័យ​ឯកជន»៕

ព័ត៌មានថ្មីៗ