ផលប្រយោជន៍​ពី​គម្រោង​ស្រោចស្រព​ស្បូវ​អណ្តែត​


140124_05
លោកស្រី ឈិន សុគន ធ្វើដំណើរទៅផ្សារ សហការី

លោកស្រី ឈិន សុគន្ធ និង​ស្វាមី គឺជា​កសិករ​មួយ​គ្រួសារ​ដែល​កាន់កាប់​ដី​ស្ទើរតែ​៥,៥ ហិកតា នៅ​ភូមិ​ពងទឹក ខេត្ត កំពត​។ ពួកគាត់​បាន​ធ្វើ​កសិកម្ម​ដាំដុះ​ដំណាំ ដូចជា ស្រូវ ពោត ចេក និង​ដំណាំ​បន្លែ​មួយ​ចំនួន ទៀត​នៅ​ជុំវិញ​ផ្ទះ​របស់​ខ្លួន​អស់​រយៈពេល​១៣​ឆ្នាំ ក្រោយពី​បាន​ចាប់ដៃ​គ្នា​ជា​ប្តី​ប្រពន្ធ​មក​។

លោកស្រី សុគន្ធ ក៏​ដូចជា​កសិករ​ឯទៀតៗ ដែល​អាច​ប្រើប្រាស់​ដី​របស់​ខ្លួន​ធ្វើ​ស្រែ​តែ​ម្ដង​គត់​នៅក្នុង​មួយ​ឆ្នាំ ដោយសារ​តែ​ពួកគាត់​ពុំ​មាន​ទឹក​គ្រប់គ្រាន់​។

លោកស្រី​បាន​អះអាង​ថា៖ «ខ្ញុំ អាច​ធ្វើ​ស្រែ​តែ​មួយ​ឆ្នាំ​ម្តង​ប៉ុណ្ណោះ ខ្ញុំ​ធ្វើស្រែ​តាម​ទម្លាប់​ពី​ដើម​មក ពោល​គឺ​ពឹង​លើ​ទឹក​ភ្លៀង ដោយ​ចំណាយ​ពេល​ប្រមាណ​ជា​៦​ខែ​។ ខ្ញុំ​ប្រមូលផល​យ៉ាង​ច្រើន​បាន​ប្រមាណ​ជា​ពី​២ ទៅ​២,៥​តោន ក្នុង​ដី​មួយ​ហិកតា ប៉ុន្តែ​ឥឡូវ​នេះ​វា​បាន​ប្រែប្រួល មិនមែន​តែ​គ្រួសារ​របស់​ខ្ញុំ​ទេ គឺ​សហគមន៍​ទាំងមូល»​។

កម្មវិធី ចង្វាក់​តម្លៃ​ផលិតកម្ម​ស្រូវ​កម្ពុជា​ដែល​គេ​ហៅថា កាវ៉ាក់ (CAVAC) គឺ​បាន​ផ្តូចផ្តើម គំនិត​មួយ ក្រោម​កម្មវិធី​ជំនួយ​ពី​អូស្ត្រាលី​។ កម្មវិធី​នេះ​ត្រូវ​បាន​បង្កើតឡើង​ដើម្បី​ជំរុញ​ផលិតកម្ម​កសិកម្ម​លើ​ដំណាំ​ស្រូវ និង​បន្លែ​។ នៅក្នុង​នោះ​កម្មវិធី​មួយ​ដែល​កាវ៉ាក់ បាន​ធ្វើ​គឺ​ស្តារ និង​សាងសង់​ប្រព័ន្ធ​ស្រោចស្រព​។

រហូត​ដល់​ខែ​មករា ឆ្នាំ​២០១៤ កម្មវិធី​នេះ​បាន​បញ្ចប់​ដោយ​សម្រេច​បាន​ការ​ស្តារ​ប្រព័ន្ធ​ស្រោចស្រព​ចំនួន ២០​ខ្សែ ក្នុង នោះ​មាន​រួម​ទាំង​ប្រឡាយ​មេ​មួយ ដែល​គេ​ស្គាល់​ថា «​ប្រឡាយ​ស្បូវ​អណ្តែត​» ដែល​ជា​ប្រឡាយ​នាំ​ទឹក​ទៅ​ដល់​ស្រែ​លោកស្រី សុគន្ធ​។

លោកស្រី សុគន្ធ គឺជា​មនុស្ស​ដែល​មិន​ចេះ​នៅ​ស្ងៀម​លោកស្រី​តែងតែ​ពិភាក្សា​អំពី​វិធី​ធ្វើ​ស្រែ​ជាមួយ​នឹង​កសិករ​ដទៃ​ទៀត​នៅក្នុង សហគមន៍​។ ការ ពិភាក្សា​នេះ បាន​នាំឲ្យ​លោកស្រី ដឹង​ថា កសិករ​នៅ​តំបន់​ផ្សេងៗ​ដែល​មាន​ប្រព័ន្ធ​ស្រោចស្រព គឺ​អាច​ធ្វើស្រែ​បាន​ច្រើន​ដង និង​បាន​ទិន្នផល​ខ្ពស់​។

លោកស្រី​បាន បញ្ជាក់​ថា​៖ «​ខ្ញុំ ចង់​ធ្វើ​ស្រែ​ឲ្យ​បាន​ច្រើន ដោយសារ​តែ​ខ្ញុំ​ឃើញ​កសិករ​នៅ​ស្រុក​ផ្សេង ដែល​មាន​ប្រព័ន្ធ​ស្រោចស្រព​មុន​ខ្ញុំ​អាច​ធ្វើ​ស្រែ​អ៊ីអ៊ែរ​បាន​ទិន្នផល​ខ្ពស់ ប៉ុន្តែ​ខ្ញុំ​មិន អាច​ធ្វើ​ដូច​ពួកគេ​ដោយសារ​អត់​មាន​ទឹក​គ្រប់គ្រាន់​»​។

លោកស្រី សុគន្ធ បាន​បន្ត ទៀត​ថា៖ «​បន្ទាប់ពី​ប្រឡាយ​ត្រូវ បាន​ស្តារ​ខ្ញុំ​ក៏​ចាប់ផ្តើម​ដំណើរការ​ធ្វើ​ស្រូវ​អ៊ីអ៊ែរ​នេះ ហើយ​ឥឡូវ​នេះ ខ្ញុំ​អាច​ធ្វើ​បាន ដោយ​ខ្ញុំ​ទទួល​ផល​ពី ៤,៥​ទៅ ៥​តោន នៅលើ​ដី​មួយ​ហិកតា​។ ទិន្នផល​ដែល​លើស​គឺជា​ប្រាក់​ចំណូល​បន្ថែម​សម្រាប់​គ្រួសារ​របស់​ខ្ញុំ​»​។

លោកស្រី​បាន​បន្ត​ទៀត​ថា៖ «នៅពេល​ដែល​ខ្ញុំ​ធ្វើ​ស្រូវ​ធម្មតា​គឺ​អាច​ទទួលផល​ពី​៣ ទៅ​៤​លាន​រៀល​ប៉ុណ្ណោះ នៅក្នុង​មួយ ឆ្នាំ​។ ឥឡូវ​នេះ​យើង​កំពុង​តែ​ធ្វើ​ស្រូវប្រាំង ដែល​អាច​ឲ្យ​យើង​រក ប្រាក់​ចំណូល​ប្រមាណ​ជា៦ លាន​រៀល​ទៀត នៅក្នុង​មួយ​រដូវ ដូច្នេះ​សរុប​ទៅ​យើង​ទទួល​បាន​ចំណូល​ប្រមាណ​ជា​១២ លាន​រៀល​ដែរ​នៅក្នុង​មួយ​ឆ្នាំ​»។

លោកស្រី​បាន​បន្ត​ទៀត​ថា គ្រួសារ​របស់​លោកស្រី មិនមែន​ជា​គ្រួសារ​តែ​មួយ​ដែល​ទទួល​ផល​ពី​គម្រោង​ស្តារ​ប្រព័ន្ធ​ស្រោចស្រព​នេះ​ទេ​។ ប្រព័ន្ធ​ប្រឡាយ​នេះ​អាច​ឲ្យ​កសិករ​ធ្វើ​ស្រែ​បាន​រហូត​ដល់​ទៅ​៧០០​ហិកតា ដល់​កសិករ​ចំនួន​ជាង​១០០០​គ្រួសារ ដោយ​ផ្តល់​ប្រាក់​ចំណូល សរុប​ប្រមាណ​ជា ៦០០.០០០ ដុល្លារ​នៅក្នុង​មួយ​ឆ្នាំ​។

ប្រព័ន្ធ​ស្រោចស្រព​ដែល​កសាង​ដោយ កាវ៉ាក់ គឺ​អាច​នាំ​យក​នូវ​ផលប្រយោជន៍​ជាច្រើន​ទៅ​សហគមន៍ ដូចជា ផ្លូវ​ខ្នង​ប្រឡាយ ដែល​ភ្ជាប់​ពី​ប្រឡាយ​មួយ​ទៅ​ប្រឡាយ​មួយ​ទៀត​។

លោកស្រី សុគន្ធ លក់​ផលិតផល​របស់​លោកស្រី​នៅ​ផ្សារ​ទូកមាស ដែល​មាន​ចម្ងាយ​ប្រមាណ​ជា​១៥​គីឡូម៉ែត្រ​ពី​ផ្ទះ​របស់​គាត់​។ លោកស្រី​បាន​អះអាង​ថា ពី​មុន​លោកស្រី​ត្រូវ​ធ្វើ​ដំណើរ​ទៅ​ផ្សារ តាម​ផ្លូវ​ដែល​ពិបាក​បំផុត ហើយ​ឆ្ងាយ​ថែម​ទៀត ប៉ុន្តែ​ឥឡូវ​នេះ លោកស្រី​បាន​ធ្វើ​ដំណើរ​ទៅ​ផ្សារ​ងាយស្រួល និង​រយៈពេល​ខ្លី​។ ទិន្នផល​ខ្ពស់​គួបផ្សំ​នឹង​ផ្លូវ​ល្អ​ជា​ហេតុ​បង្ក​លក្ខណៈ​ងាយស្រួល​ដល់ ឈ្មួញ​អង្ករ​ជាច្រើន​ឲ្យ​ចូល ទៅ​កាន់​តំបន់​នោះ​។

ដោយសារ​តែ​គម្រោង នេះ លោកស្រី សុគន្ធ អាច​លក់​កសិផល​ជា​ស្រូវ​អង្ករ​ទាំងនោះ ងាយស្រួល​ភ្លាមៗ ក្រោយពី​ប្រមូលផល ដោយសារ​មិន​ចាំបាច់​ដឹកជញ្ជូន​ចុះ​ឡើង​ដូច​ពេល​មុន​ឡើយ​។

ក្រៅពី​ទទួល​បាន​ទឹក​ពេញ​មួយ​ឆ្នាំ និង​ផ្លូវ​គមនាគមន៍​ល្អ គ្រួសារ​លោកស្រី សុគន្ធ កំពុង​ទទួល​ផល​ផ្សេង​ទៀត​ពី​គម្រោង នេះ​គឺ​ត្រី​។ បង់សំណាញ់​តែ​ពីរ​ដង​អី គឺ​បាន​ត្រី​ប្រមាណ​ជា​ពី ០,៥​គីឡូក្រាម ទៅ​១,៣​គីឡូក្រាម ហើយ​ពួកគេ​អាច​ត្រូវ​បាន​ពី​៤​ទៅ​៥​ខែ នៅក្នុង​មួយ​ឆ្នាំ​។

លោកស្រី បាន​ឲ្យ​ដឹង​ថា គាត់ មិន​បាន​យក​ត្រី​ដែល​នេសាទ​បាន​ទៅ​លក់​ទេ គឺ​គ្រាន់តែ​ទុក​ធ្វើ​ម្ហូប​ប្រចាំ​ថ្ងៃ ឯ​ខ្លះ​ទៀត​ប្រឡាក់​ទុក​ប្រើប្រាស់​ថ្ងៃ​ក្រោយ ដូច្នេះ​យើង​អាច​សន្សំសំចៃ​បាន​ពី​៥០០០​ទៅ​៦០០០​រៀល នៅ ក្នុង​មួយ​ថ្ងៃ ។

ជាមួយ​នឹង​ប្រាក់​ចំណូល​រួម ទាំង​ផលប្រយោជន៍​ពី​ប្រព័ន្ធ​ស្រោចស្រព​នេះ លោកស្រី សុ គន្ធ រំពឹង​ថា លោកស្រី​នឹង​អាច​ពង្រីក​ផ្ទះ​បាន​ធំ​ជាង​មុន​ទិញ​ដី​បន្ថែម ហើយ​និង​ទិញ​គោយន្ត ម៉ាស៊ីន​បាញ់​ថ្នាំ ម៉ាស៊ីន​បូម​ទឹក​ជាដើម​។

លោកស្រី បញ្ជាក់​ថា «​ដំបូង​ខ្ញុំ​ចង់​សង់​ផ្ទះ​ឈើ​ទេ តែ​ក្រោយ ពី​ដាំ​ស្រូវ​អ៊ីអ៊ែរ​នេះ​មក គឺ​ខ្ញុំ​ចង់​សង់​ផ្ទះ​សសរ​ស៊ីម៉ងត៍​វិញ​។ ខ្ញុំ​រីករាយ​ណាស់​ដែល​បាន​ទទួល​ប្រព័ន្ធ​ស្រោចស្រព​នេះ​។ ខ្ញុំ​មាន​កូន​បី​នាក់ ប្រសិន​បើ​ខ្ញុំ​នៅ​តែ​ធ្វើស្រែ​តាម​លក្ខណៈ​បុរាណ​ទៀត ខ្ញុំ​មិន​ដឹង​ជា​អាច​ឧបត្ថម្ភ​កូន​ឲ្យ​រៀន​ខ្ពស់​ដូច​គេ​បាន​ឬ​អត់​ទេ ប៉ុន្តែ​ឥឡូវ នេះ​ខ្ញុំ​គិត​ថា​ខ្ញុំ​អាច បើ​កូន​ខ្ញុំ​វា​ចង់​បន្ត​ការ​សិក្សា​ទៅ​មុខ​»៕ MN

ព័ត៌មានថ្មីៗ