CAVAC ជា​ប្រភព​ផ្តល់​ចំណេះដឹង និង​ផ្តល់​ព័ត៌មាន​ត្រឹមត្រូវ​ដល់​កសិករ


140124_06a
លោក ឡុង សាវុធ កំពុងពន្យល់អតិថិជនរបស់គាត់ សហការី

ផលិតផល​កសិកម្ម​ទាំង​ស្រូវ និង​ដំណាំ​បន្លែបង្ការ​ផ្សេងៗ ដែល​ដាំដុះ​នៅ​ប្រទេស​កម្ពុជា គឺ​ទទួល​បាន​ទិន្នផល​នៅ​ទាប​ជាង​អ្វី​ដែល​ជា​លទ្ធភាព​អាច​នឹង​ទទួល​បាន​។ ប្រជាកសិករ​ជាច្រើន​ខ្វះ​ចំណេះដឹង​ក្នុង​ការ​បង្កបង្កើន​ផល​តាម​លក្ខណៈ​កសិកម្ម​ជឿនលឿន​។ ការ​ប្រឈម​របស់​ពួកគេ​គឺ​ត្រូវការ​ព័ត៌មាន​ច្បាស់លាស់ ចំ ពេលវេលា​(​រដូវកាល​) ពី​បណ្តា​ប្រភព នៅ​ជុំវិញ​ខ្លួន​ដែល​អាច​ទុក​ចិត្ត បាន​។ ប្រសិន​បើ​មាន​ព័ត៌មាន​ត្រឹមត្រូវ​កសិករ​អាច​នឹង​បង្កបង្កើន​កសិផល​របស់​ពួកគាត់​ប្រកប​ដោយ​ទិន្នផល​ខ្ពស់​។ ប្រភព​ដើម​នៃ​ចំណេះដឹង​ទាំងឡាយ​របស់​កសិករ​ក្នុង​ស្រុក គឺ​រាប់​ទាំង​ប្រភព​ជា​អ្នក​លក់ដូរ ឬ​ឈ្មួញ​កសិផល​ក្នុង​ស្រុក អ្នក លក់ដូរ​ទូទៅ​រួមទាំង​គ្រាប់ពូជ សម្ភារ​បម្រើ​វិស័យ​កសិកម្ម និង​ជីគីមី​ជាដើម​។

Content image - Phnom Penh Post

កាលពី​៣​ឆ្នាំ​មុន កសិករ ឡុង សាវុធ រស់នៅ​ភូមិ​ព្រែក​តាដួង នៅ​ខេត្ត​កណ្តាល បាន​ចាប់ផ្តើម​លក់ដូរ​គ្រាប់ពូជ​បន្លែបង្ការ​គ្រប់ មុខ ថ្នាំ​សម្លាប់​សត្វល្អិត និង​ជីគីមី សម្រាប់​ផ្គត់ផ្គង់​ដល់​កសិករ​នៅក្នុង​ភូមិ​។ នៅពេល ដែល​អតិថិជន​ជា​កសិករ​របស់ គាត់​បាន​សួរ​អំពី​របៀប​ដាំដុះ​ជាមួយ​គ្រាប់ពូជ​ទាំងនោះ និង​វិធីសាស្រ្ត​ក្នុង​ការ​រៀបចំ​ដី​ជា​មុន គាត់​ឆ្លើយ​ថា «​គ្រាន់តែ​ធ្វើ​ទៅ​តាម​ទម្លាប់​ដែល​ធ្លាប់​ដាំ​ពី​មុនៗ មក​គឺជា​ការ​ស្រេច​» ចម្លើយ​បែប​នេះ គឺ​ដោយសារ​តែ​គាត់​ពុំ​មាន​ចំណេះដឹង​អាច​ប្រាប់​ដល់​កសិករ​ទាំងនោះ​បាន​។

កម្មវិធី​ជំនួយ​គាំទ្រ​របស់​អូស្ត្រាលី គឺ​ជួយ​ដល់​អ្នក​ទាំងឡាយ​ណា​ដូចជា លោក សាវុធ ជាដើម ដើម្បី​ផ្តល់​ចំណេះដឹង​ដល់​គាត់​អាច​យក​ទៅ​ចែក រំលែក​ដល់​កសិករ​ជាច្រើន​បន្ត​ទៀត ប្រយោជន៍​ឲ្យ​ពួកគេ​ទទួល​បាន​ចំណេះដឹង​នៅក្នុង​របរ​ដាំដុះ និង​ផ្នែក​បច្ចេកទេស​កសិកម្ម​។ កម្មវិធី​ជំនួយ​គាំទ្រ​នេះ​បាន​បម្រើ​ដល់​កសិករ​នៅ​ទូទាំង​ប្រទេស​កម្ពុជា តាមរយៈ​គម្រោង​ហៅ​កាត់​ថា កាវ៉ាក់ (CAVAC - Cambodia Agricultural Value Chain)​។ កម្មវិធី​នេះ​បាន​ជួយ​បង្កើន​ល្បឿន និង​លើក​កម្ពស់​ផលិតកម្ម​ស្បៀង រួមទាំង​ស្រូវ និង​ដំណាំ​កសិកម្ម​ផ្សេងៗ​។

កាលពី​ឆ្នាំ​មុន​នេះ លោក សាវុធ​បាន​ចូលរួម​វគ្គ​កម្មសិក្សា​អំពី​ការ​ប្រកបរបរ​លក់​រាយ ដែល​រៀបចំ​ឡើង​ដោយ CAVAC ស្តី​អំពី​គ្រាប់ពូជ​ដំណាំ​ផ្សេងៗ​ផង​ដែរ​។ វគ្គ​សិក្សា​នោះ គឺ​ផ្តោត​ការ​យក​ចិត្ត​ទុក​ដាក់​ខ្ពស់​អំពី​ការ​លក់ដូរ​ផលិតផល​ដំណាំ​បន្លែបង្ការ​ដែល​កំពុង​ទទួល​បាន​ការ​ពេញនិយម​នៅ​តាម​តំបន់​។ «​វគ្គ​កម្មសិក្សា​នោះ គឺ​មាន​សារៈសំខាន់​ខ្លាំង​ណាស់ សម្រាប់​រូប​ខ្ញុំ ខ្ញុំ​បាន​ដកស្រង់​ចំណេះដឹង​ទាំងនោះ​មក​អនុវត្ត​នៅក្នុង​មុខរបរ​ប្រចាំ​ថ្ងៃ របស់​ខ្ញុំ​» នេះ​បើ​យោងតាម​ប្រសាសន៍​របស់​លោក សាវុធ​។

ឥឡូវ​នេះ គាត់​មាន​ចំណេះដឹង​គ្រប់គ្រាន់​សម្រាប់​ការ​ដាំដុះ​ដំណាំ​ទូទៅ​។ គាត់​បាន​ចែក រំលែក​ចំណេះដឹង​របស់​ខ្លួន​ទៅ ដល់​កសិករ​ជាច្រើន​អំពី​វិធី​បណ្តុះ​គ្រាប់ពូជ និង​វិធីសាស្ត្រ​រៀបចំ​ដី​ឲ្យ​បាន​ត្រឹមត្រូវ​ជាដើម​។ «​បើ​ទោះ​បី​ជា​ពេល​ខ្លះ ពួកគេ​ពុំ​បាន​សាកសួរ​មក​ខ្ញុំ​ក៏ដោយ ប៉ុន្តែ​ខ្ញុំ​នៅ​តែ​ផ្តល់​ការប្រឹក្សា​ដល់​អ្នក​មក​ទិញ​ទំនិញ​ពី​ខ្ញុំ​» នេះ​បើ​យោងតាម​ប្រសាសន៍​របស់ លោក សាវុធ​។ «​ខ្ញុំ​ក៏​ចង់ដឹង​ផង​ដែរ​ថា តើ​បច្ចេកទេស​ដែល​ខ្ញុំ​បាន​រៀន​នេះ​វា​ល្អ​ដែរ ឬ​យ៉ាង ណា​?» គាត់​តែង​គិត​ថា ប្រសិន បើ​កសិករ​ទទួល​បាន​ជោគជ័យ នោះ​ពួកគេ​នឹង​វិល​ត្រឡប់​មក​ទិញ​ទំនិញ​ពី​គាត់​បន្ថែម​ទៀត​។

លោក សាវុធ បន្ថែម​ថា៖ «ពេល ណា​ពួកគេ​មាន​ប្រាក់ ខ្ញុំ​ក៏​មាន ដែរ​។ ទោះ​បី​ជា​មុខរបរ​របស់​ខ្ញុំ​ទើប​តែ​ចាប់ផ្តើម​មែន ប៉ុន្តែ​វា​បាន ចម្រើន​លូតលាស់​ជា​ប្រចាំ​។ នៅ​ពេល​ដែល​យើង​បាន​ផ្តល់​ការ​ប្រឹក្សា​ល្អ​ដល់​កសិករ នោះ​ពួកគេ​នឹង​ទទួល​បាន​ជោគជ័យ ហើយ​ពួកគេ​នឹង​ត្រឡប់​មក​ទិញ​ទំនិញ​បន្ថែម​ពី​យើង​»​។ យោងតាម​បទពិសោធ​ដែល​គាត់​បាន ចែករំលែក​ដល់​កសិករ​អំពី​វិធី​បណ្តុះ​ពូជ​ដាំ និង​ការ​រៀបចំ​ដី​នោះ ពួគគេ​បាន​អនុវត្ត​តាម​ប្រកប​ដោយ​ជោគជ័យ​។

កសិករ​ម្នាក់ ដែល​លោក​សាវុធ បាន​ផ្តល់​ការ​ប្រឹក្សា​គឺ​លោក ផាត ហួត មកពី​ភូមិ​សំប៉ាន​ក្រោម ក្នុង​ស្រុក​កោះធំ ខេត្ត​កណ្តាល​។

កសិករ ហួត ទើប​តែ​ចាប់ផ្តើម​ដាំដំណាំ​បន្លែបង្ការ​របស់​ខ្លួន​។ «​ខ្ញុំ​បាន​ចាប់ផ្តើម​ដាំដំណាំ​របស់ ខ្ញុំ ព្រោះ​ខ្ញុំ​សង្ឃឹម​ថា បន្លែ​ទាំងនោះ​វា​នឹង​ផ្តល់​ទិន្នផល​យ៉ាង​ឆាប់ មក​វិញ ហើយ​បន្ទាប់ពី​ប្រមូលផល​រួច​យើង​អាច​បន្ត​ដាំ​សាជាថ្មី​ឡើង​វិញ​ជាច្រើន​ដង ព្រោះ​ដំណាំ​បន្លែ​ទាំង​នេះ​វា​មាន​អាយុកាល​លូតលាស់​តិច​ថ្ងៃ​ទេ​» នេះ​បើ តាម​ការ​ពន្យល់​របស់​គាត់​។

ទោះ​បី​ជា​គាត់​ជា​កសិករ​ថ្មីថ្មោង​មែន ប៉ុន្តែ ហួត មាន ចំណេះដឹង​ច្រើន​អំពី​ដំណាំ​បន្លែ និង​ទទួល​បាន​ផល​ខ្ពស់ ហើយ​គាត់​នៅ​តែ​ព្យាយាម​យក​ចិត្ត​ទុក ដាក់​ស្តាប់​ពី​កសិករ​ជិត​ខាង​។ ហួត បាន​សាកសួរ​គេ​អំពី​ទីកន្លែង​ណា​ដែល​គាត់​គួរ​ទិញ​គ្រាប់ពូជ​បន្លែ និង​ការ​លក់​ដូរ​។ «​ពួកគេ​បាន​ណែនាំ​ខ្ញុំ ឲ្យ​ទៅ​ទិញ​គ្រាប់ពូជ​បន្លែ​ពី​លោក សាវុធ ព្រោះ​គាត់​គឺជា​អ្នក​លក់​មាន​ចំណេះដឹង​សម្រាប់​ការ ដាំដុះ ហើយ​ថែម​ទាំង​ចំណាយ ពេល​មក​ជួយ​មើល​ដី​នៅ​ចម្ការ​របស់​យើង​ទៀត​ផង​» នេះ​បើ តាម​សម្តី​របស់​កសិករ ហួត​។ «​នៅ​ពេល​ដែល​ខ្ញុំ​ទៅ​ទិញ​ពី​គាត់ គាត់​បាន​ផ្តល់​ប្រឹក្សា​ដល់​ខ្ញុំ​អំពី​វិធី​រៀបចំ​ដី​ឲ្យ​បាន​ត្រឹមត្រូវ​» ។

«​នៅ​ពេល​ដែល​ដំណាំ​របស់​ខ្ញុំ​មាន​អាយុ ២៨​ថ្ងៃ ចម្ការ​របស់​ខ្ញុំ​ទទួលរង​ការ​ញាំញី​ដោយ​សត្វល្អិត​ចង្រៃ​។ ពេល​នោះ​ខ្ញុំ​ប្រាប់​ទៅ​សាវុធ គាត់​មិន​ព្រម​លក់​ថ្នាំ​កម្ចាត់​សត្វល្អិត​ឲ្យ​ខ្ញុំ​ភ្លាម​ទេ ប៉ុន្តែ​គាត់​ចំណាយ​ពេល​មក​ចម្ការ​របស់​ខ្ញុំ​ដើម្បី​ពិនិត្យ​មើល​ថា តើ​មាន​បញ្ហា​អ្វី​ពិតប្រាកដ​ជា​មុន សិន​។ នៅ​ពេល​ដែល​គាត់​ត្រឡប់​ទៅ​ដល់​ហាង​វិញ ទើប​គាត់​លក់​ផលិតផល​ថ្នាំ​នោះ​ឲ្យ​ខ្ញុំ វា​មាន​ប្រសិទ្ធភាព​ស័ក្តិសិទ្ធិ​ណាស់​» នេះ​បើ​តាម​សម្តី​របស់​កសិករ ហួត​។

ជា​អកុសល ដោយសារ​មាន​ភ្លៀងធ្លាក់​ច្រើន​បង្ក​ឲ្យ​មាន​ទឹក​ជន់​លិច​ចម្ការ​របស់​កសិករ ហួត ទាំង​មូល ធ្វើ​ឲ្យ​គាត់​ពុំ​អាច​ទទួល​បាន​កសិផល​លើក​ទី​១ ដូច​ការ​រំពឹង​ទុក​នោះ​ទេ​។ ប៉ុន្តែ​ទោះ​បី​បែប​នេះ​ក្តី គាត់​នៅ​តែ​សប្បាយ​រីករាយ ព្រោះ​គាត់​ទទួល​បាន​ផល​ខ្លះៗ​ដែរ ហើយ​ការ​ខាតបង់​ក៏​មាន​ចំនួន​តិចតួច​ប៉ុណ្ណោះ​។ គាត់​ក៏​សម្តែង​ការ​ដឹងគុណ​ចំពោះ​លោក សាវុធ ដែល​បាន​ផ្តល់​ការ​ប្រឹក្សា​យ៉ាង​ត្រឹមត្រូវ ចំពោះ​គាត់ ចំណែកឯ​កសិករ ខ្លះ​ទៀត ដែល​មាន​ចម្ការ​នៅ ក្បែរៗ​គាត់​ដែរ​នោះ មិនមាន​សំណាង​ល្អ​ដូច​គាត់​ឡើយ​។

ថ្វី​បើ​ពុំ​ទទួល​បាន​ជោគជ័យ​នៅពេល​នោះ កសិករ ហួត បាន និយាយ​ថា គាត់​នៅ​តែ​បន្ត​ការ ដាំដុះ​បន្លែ​របស់​គាត់​តទៅ​ទៀត​។ បន្ទាប់ពី​ការ​ប្រមូលផល​នា​រដូវ​នេះ គាត់​នឹង​ដាំដំណាំ​បន្លែ​យក​ស្លឹក​ម្តង​។ «​ចំពោះ​ផលិតផល​ពី​អ្នក​លក់​ទាំងឡាយ​ណា​ដែល​មាន​តម្លៃ​ប្រហាក់ប្រហែល​គ្នា នោះ​គាត់​នៅ​តែ​ជ្រើសរើស​មុខ​ទំនិញ​ពី​ហាង​របស់​លោក សាវុធ ពីព្រោះ​គាត់​បាន​ផ្តល់​ព័ត៌មាន​ដល់​យើង​យ៉ាង​ត្រឹមត្រូវ​» នេះ​បើ​តាម​ការ​អះអាង​របស់​កសិករ ហួត​៕ MN

ព័ត៌មានថ្មីៗ