ក្រាហ្វិកបង្ហាញពីស្ថានភាពអតិផរណានៅក្នុងឆមាសទី១ ឆ្នាំ ២០២១។ រូបថត ធនាគារជាតិនៃកម្ពុជា
ភ្នំពេញៈ សន្ទស្សន៍តម្លៃទំនិញប្រើប្រាស់ (CPI) របស់កម្ពុជានៅតែមានកម្រិតទាបនៅក្នុងឆមាសទី១ ឆ្នាំនេះ ដោយរដ្ឋាភិបាល និងអ្នកជំនាញអះអាងថា អត្រានេះនៅតែអាចគ្រប់គ្រងបាន ហើយត្រូវរំពឹងថានឹងកើនឡើងបន្តិចនៅចុងឆ្នាំនេះ ខណៈដែលការរំពឹងទុកនៃការងើបឡើងជាបណ្ដើរៗនៃតម្លៃប្រេងលើពិភពលោក។
.jpg)
របាយការណ៍ឆមាសទី១ ពីធនាគារជាតិនៃកម្ពុជា (NBC) ចេញផ្សាយកាលពីសប្ដាហ៍មុនឱ្យដឹងថា អត្រាអតិផរណារួមជាមធ្យម ២,៥ ភាគរយនៅឆមាសទី១ ឆ្នាំ ២០២១ ទាបជាងអត្រានៅឆមាសទី២ ឆ្នាំ ២០២០ ដែលមាន ៣,១ ភាគរយ។
NBC បានឱ្យដឹងថា៖ «អត្រាអតិផរណាមានកម្រិតទាបនៅដើមឆ្នាំ ប៉ុន្តែបានកើនឡើងចាប់ពីខែមីនា ដោយសារការកើនថ្លៃម្ហូបអាហារ គួបផ្សំនឹងការបន្តកើនឡើងនៃក្រុមទំនិញ និងសេវាពាក់ព័ន្ធទៅនឹងប្រេងឥន្ធនៈ»។
បើយោងតាមរបាយការណ៍ អតិផរណាក្រុមម្ហូបអាហារមានកម្រិត ២,៩ ភាគរយ (៥ ភាគរយនៅក្នុងឆមាសទី២ ឆ្នាំមុន) ដោយកំណើនថ្លៃមានកម្រិតទាបនៅដើមឆ្នាំនេះ ប៉ុន្តែបានកើនឡើងចាប់ពីខែមីនា ដែលបណ្ដាលមកពីការរីករាលដាលជំងឺកូវីដ ១៩ និងការបិទខ្ទប់។ ចំពោះថ្លៃក្រុមទំនិញ និងសេវាពាក់ព័ន្ធនឹងប្រេងឥន្ធនៈបានបន្តកើនឡើងសន្សឹមៗ ហើយបានប្តូរពីកម្រិតបរិត្តផរណា ៣,៣ ភាគរយ ទៅអតិផរណា ៥,៣ ភាគរយនៅឆមាសនេះ។
NBC បន្ថែមថា៖ «ការកើនឡើងនេះស្របទៅនឹងនិន្នាការថ្លៃប្រេងឆៅពិភពលោក ដោយសារតែតម្រូវការបានចាប់កើនសន្សឹមៗមកវិញ ក្នុងពេលដែលការផ្គត់ផ្គង់ពីក្រុមប្រទេសនាំចេញប្រេង (OPEC) និងដៃគូត្រូវបានកាត់បន្ថយ»។
លោក ជា ចាន់តូ ទេសាភិបាលធនាគារជាតិនៃកម្ពុជាឱ្យដឹងថា ទន្ទឹមនឹងការសម្រេចបានស្ថិរភាពថ្លៃ ធនាគារជាតិនៃកម្ពុជាក៏បានរួមចំណែកកាន់តែសកម្មក្នុងការជំរុញសកម្មភាពសេដ្ឋកិច្ច។ នយោបាយរូបិយវត្ថុត្រូវបានអនុវត្តដោយប្រុងប្រយ័ត្ន តាមរយៈការធ្វើអន្តរាគមន៍លើទីផ្សារប្តូរប្រាក់ និងបញ្ចេញការឱ្យខ្ចីជាប្រាក់រៀលដល់គ្រឹះស្ថានធនាគារ និងហិរញ្ញវត្ថុក្នុងកម្រិតសមស្រប ដើម្បីរក្សាស្ថិរភាពអត្រាប្តូរប្រាក់ និងបន្ទាបអត្រាការប្រាក់ឥណទានជារៀល។
លោកថ្លែងថា៖ «ការរក្សាអត្រាប្រាក់បម្រុងកាតព្វកិច្ចឱ្យនៅកម្រិតទាប បានផ្ដល់លទ្ធភាពដល់គ្រឹះស្ថានធនាគារ និងហិរញ្ញវត្ថុមានសាច់ប្រាក់នៅក្នុងដៃគ្រប់គ្រាន់ក្នុងការឆ្លើយតបនឹងតម្រូវការឥណទាន ប៉ុន្តែជាមួយគ្នានេះសន្ទស្សនីយភាពលើសនៅលើទីផ្សារក៏ត្រូវបានស្រូបយកមកវិញផងដែរ ដើម្បីបន្ថយសម្ពាធលើអតិផរណា»។
លោក ហុង វណ្ណៈ អ្នកស្រាវជ្រាវសេដ្ឋកិច្ចនៅរាជបណ្ឌិត្យសភាកម្ពុជា បានប្រាប់ ភ្នំពេញ ប៉ុស្ដិ៍ កាលពីថ្ងៃទី ២៩ ខែ កក្កដា ឆ្នាំ ២០២១ ថា អតិផរណាទាប កំពុងឆ្លុះបញ្ចាំងពីការគ្រប់គ្រងម៉ាក្រូសេដ្ឋកិច្ចដ៏ល្អរបស់រដ្ឋាភិបាល។ វាបង្ហាញស្ថិរភាពម៉ាក្រូសេដ្ឋកិច្ច ដែលមានន័យថា ប្រាក់ចំណូល និងការចំណាយមានភាពធន់នឹងស្ថានភាពការរីករាលដាលជំងឺកូវីដ ១៩ នៅពេលបច្ចុប្បន្ន។ ជាមួយគ្នានេះវាក៏បង្ហាញពីការគ្រប់គ្រងល្អពីអាជ្ញាធរក្នុងស្រុក។
លោក វណ្ណៈ បានបន្ថែមថា៖ «ការណ៍នេះបង្ហាញថា ការនាំចូល-នាំចេញ ក៏មានស្ថិរភាពដែលមិនបានជំរុញខ្លាំងដល់អតិផរណាឱ្យកើនឡើងទេ។ អតិផរណាទាបក៏ធ្វើឱ្យមានផលប៉ះពាល់វិជ្ជមានសម្រាប់ជីវភាពប្រចាំថ្ងៃរបស់ប្រជាជនដែលកំពុងស្ថិតនៅក្នុងពេលដ៏ពិបាក ដោយសារវិបត្តិសុខភាពលើការចំណាយរបស់ពួកគេ។ ជាមួយគ្នានេះ អតិផរណាទាបក៏បង្ហាញអត្រាប្តូរប្រាក់ល្អនៃរូបិយប័ណ្ណក្នុងស្រុករបស់យើងធៀបនឹងប្រាក់ដុល្លារផងដែរ»។
CPI ស្នូលដែលមិនរាប់បញ្ចូលតម្លៃអាហារ និងថាមពលមានកម្រិតទាបចំនួន ១,២ ភាគរយ (២,១ ភាគរយកាលពីឆមាសមុន) គឺដោយសារសកម្មភាពសេដ្ឋកិច្ចខ្សោយ។ នេះបើយោងតាម NBC។
អតិផរណាត្រូវបានព្យាករថា នឹងកើនឡើងបន្តិចពី ២,៥ ភាគរយទៅ ២,៨ ភាគរយនៅឆមាសទី ២ ដោយសារការរំពឹងទុកពីនិន្នាការបន្តកើនឡើងនៃថ្លៃក្រុមទំនិញ និងសេវាពាក់ព័ន្ធនឹងប្រេងឥន្ធនៈ ថ្លៃម្ហូបអាហារ នៅបន្តរក្សាកំណើនប្រហាក់ប្រហែលឆមាសទី ១ អតិផរណាស្នូលអាចកើនបន្តិច ប៉ុន្តែបន្តមានកម្រិតទាប។ សម្រាប់ឆ្នាំនេះ អតិផរណាត្រូវព្យាករថាមានកម្រិត ២,៦ ភាគរយ៕LA
