ភ្នំពេញៈ ការធ្វើពាណិជ្ជកម្មទ្វេភាគីរវាងកម្ពុជា-កូរ៉េ ក្នុងឆមាសទី១ ឆ្នាំ ២០២១ មានតម្លៃជាង ៤៥១ លានដុល្លារ កើនឡើង ៦,៧២ ភាគរយបើធៀបនឹងរយៈពេលដូចគ្នាឆ្នាំ ២០២០។ នេះបើតាមទិន្នន័យពីសមាគមពាណិជ្ជកម្មអន្តរជាតិកូរ៉េ (Kita)។
ទិន្នន័យបង្ហាញថា ចាប់ពីខែមករា ដល់ខែមិថុនា ឆ្នាំ ២០២១ ពាណិជ្ជកម្មទ្វេភាគីរវាងកម្ពុជា-កូរ៉េ មានទឹកប្រាក់សរុប ៤៥១,៩៨ លានដុល្លារ កើនឡើង ៦,៧២ ភាគរយពីចំនួន ៤២៣,៥១ លានដុល្លារ ក្នុងរយៈពេលដូចគ្នាឆ្នាំ ២០២០។
ក្នុងនោះការនាំចេញពីកម្ពុជាមានទឹកប្រាក់ ១៥៩,៤ លានដុល្លារ ធ្លាក់ចុះ ១,៦ ភាគរយពីចំនួន ១៦២,០៦ លានដុល្លារ និងការនាំចូលពីប្រទេសកូរ៉េ មានទឹកប្រាក់ ២៩២,៥៩ លានដុល្លារ កើនឡើង ១១,៩ ភាគរយពីចំនួន ២៦១,៤៥ លានដុល្លារ។
ទំនិញសំខាន់ៗដែលកម្ពុជានាំទៅកាន់កូរ៉េខាងត្បូង រួមមានសម្លៀកបំពាក់ ស្បែកជើង ផលិតផលធ្វើដំណើរ ភេសជ្ជៈ គ្រឿងបន្លាស់អេឡិចត្រូនិក កៅស៊ូ ថ្នាំពេទ្យ និងផលិតផលកសិកម្ម ហើយកម្ពុជានាំចូលមកវិញរួមមាន យានយន្ត គ្រឿងអេឡិចត្រូនិក សម្ភារផ្ទះបាយ ភេសជ្ជៈ ថ្នាំពេទ្យ និងផលិតផលប្លាស្ទិក។
ទំហំពាណិជ្ជកម្មទ្វេភាគីរវាងកម្ពុជា និងកូរ៉េខាងត្បូងមានចំនួន ៨៨៤,៨៨ លានដុល្លារក្នុងឆ្នាំ ២០២០ ដោយធ្លាក់ចុះ ១៧,៧៧ ភាគរយធៀបនឹងឆ្នាំ ២០១៩ ដែលមានប្រមាណ ១ ០៣២ លានដុល្លារ។ នេះបើយោងតាមទិន្នន័យពីសមាគមពាណិជ្ជកម្មអន្តរជាតិកូរ៉េ (Kita)។
ទិន្នន័យនោះបានឱ្យដឹងថា កម្ពុជាបាននាំចេញទំនិញទៅកាន់ទីផ្សារកូរ៉េខាងត្បូងក្នុងតម្លៃជាង ៣១៧ លានដុល្លារកាលពីឆ្នាំមុនធ្លាក់ចុះ ៥,៤ ភាគរយ ខណៈកម្ពុជានាំចូលមកវិញមានជាង ៥៦៧ លានដុល្លារធ្លាក់ចុះ ១៨,៦ ភាគរយ បើធៀបនឹងឆ្នាំ ២០១៩ មានជាង ៦៩៦ ដុល្លារ៕