សាខាធនាគារ ១១ ០០០ ទីតាំង នឹងត្រូវបិទនៅអាស៊ីអាគ្នេយ៍ក្នុងរយ:ពេល ១ ទសវត្សរ៍ខាងមុខ ដោយនៅឥណ្ឌូនេស៊ីច្រើនជាងគេ
យោងតាមក្រុមហ៊ុនប្រឹក្សាយោបល់ Roland Berger បានឱ្យដឹងថា ឥណ្ឌូនេស៊ីត្រូវបានគេព្យាករណ៍ថា នឹងកាត់បន្ថយសាខាធនាគារជាច្រើននៅអាស៊ីអាគ្នេយ៍ (SEA) រយៈពេល ១០ ឆ្នាំខាងមុខនេះ នៅពេលអតិថិជនផ្លាស់ប្តូរពីសេវាកម្មរូបវន្តទៅជាសេវាកម្មធនាគារឌីជីថល។
ក្រុមហ៊ុនពិគ្រោះយោបល់ផ្នែកគ្រប់គ្រងដែលមានមូលដ្ឋាននៅទីក្រុងមុយនិច ប្រទេសអាល្លឺម៉ង់ បានប៉ាន់ប្រមាណថា ចំនួនសាខាធនាគារនៅអាស៊ីអាគ្នេយ៍នឹងធ្លាក់ចុះ ១៨ ភាគរយ នៅទសវត្សរ៍ក្រោយ។
តួលេខនេះ គឺស្មើនឹងសាខាចំនួន ១១ ០០០ ដែលត្រូវបានបិទនៅក្នុងតំបន់ដោយមានជិត ៧ ០០០ ស្ថិតនៅក្នុងប្រទេសឥណ្ឌូនេស៊ី។
ប្រទេសថៃ និងម៉ាឡេស៊ី នឹងដើរតាមប្រទេសឥណ្ឌូនេស៊ី ខណៈសិង្ហបុរី និងប្រ៊ុយណេ បានឃើញនិន្នាការនេះរួចមកហើយចាប់តាំងពីឆ្នាំ ២០១០។
ផ្ទុយទៅវិញ ចំនួនសាខាធនាគារត្រូវគេរំពឹងបន្តកើនឡើងនៅក្នុងប្រទេស វៀតណាម ឡាវ កម្ពុជា មីយ៉ាន់ម៉ា ដោយសារវិស័យធនាគារមិនទាន់អភិវឌ្ឍន៍ក្នុងប្រទេសទាំងនេះ។
របាយការណ៍បានលើកឡើងថា៖ “ពួកគេ [ធនាគារ] ត្រូវការដោះស្រាយបញ្ហាប្រឈមនាពេលខាងមុខនៃការធ្លាក់ចុះនៃតួនាទីសាខាឱ្យបានឆាប់"៕ The Jakarta Post-ANN/RR
