ភ្នំពេញៈ មន្ត្រីជាន់ខ្ពស់នៃធនាគារពិភពលោក (WB) បានលើកឡើងថាការបង្កើនល្បឿននៃការចាក់វ៉ាក់សាំងប្រឆាំងជំងឺកូវីដ ១៩ យ៉ាងឆាប់រហ័ស និងការចាប់ផ្តើមការចាក់ដូសជំរុញ គឺជាកត្តាសំខាន់សម្រាប់កម្ពុជាក្នុងការឆាប់បើកសេដ្ឋកិច្ចឡើងវិញ។
លោកស្រី Victoria Kwakwa អនុប្រធានធនាគារពិភពលោកប្រចាំតំបន់អាស៊ីខាងកើត និងប៉ាស៊ីហ្វិកបានលើកឡើងបែបនេះតាមរយៈ Video Conference ក្នុងជំនួបសម្តែងការគួរសម និងជម្រាបលាជាមួយលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកាលពីថ្ងៃទី ១៣ ខែកញ្ញា។
លោកស្រី Victoria Kwakwa បានសាទរចំពោះភាពជោគជ័យរបស់រដ្ឋាភិបាលកម្ពុជាក្នុងការគ្រប់គ្រងការរីករាលដាលជំងឺកូវីដ ១៩ ពិសេសលើចំណាត់ការដ៏រហ័សក្នុងការចាក់វ៉ាក់សាំងដូសជំរុញជូនប្រជាពលរដ្ឋធៀបនឹងបណ្តាប្រទេសកំពុងអភិវឌ្ឍន៍នានាក៏ដូចជាការបើកដំណើរការឡើងវិញនូវគ្រឹះស្ថានសិក្សាសាធារណៈ និងឯកជនទាំងឡាយ។
លោកស្រីនិយាយថា៖ «កិច្ចសហប្រតិបត្តិការក្នុងភាពជាដៃគូដ៏ល្អរវាងធនាគារពិភពលោក និងរដ្ឋាភិបាលកម្ពុជា គឺស្ថិតក្រោមស្មារតីគោរពគ្នា និងគោរពភាពជាម្ចាស់របស់កម្ពុជានាពេលកន្លងមក»។
លោក អូន ព័ន្ធមុនីរ័ត្ន បានថ្លែងថា គិតមកដល់ពេលនេះប្រទេសកម្ពុជាសម្រេចបានការចាក់វ៉ាក់សាំងដល់ប្រជាពលរដ្ឋអាយុចាប់ពី ១៨ ឆ្នាំឡើងបានប្រមាណ ៩០ ភាគរយធៀបនឹងគោលដៅចំនួន ១០ លាននាក់ និងកុមារអាយុពី ១២ ឆ្នាំរហូតដល់ក្រោម ១៨ ឆ្នាំបានប្រមាណ ១,៤ លាននាក់ធៀបនឹងគោលដៅ ២ លាននាក់។
លោកថ្លែងថា៖ «កម្ពុជាក៏នឹងបើកដំណើរការឡើងវិញនូវគ្រឹះស្ថានសិក្សាសាធារណៈ និងឯកជនសម្រាប់កម្រិតអនុវិទ្យាល័យ និងវិទ្យាល័យទាំងអស់នាពេលឆាប់ៗ លើកលែងតែកម្រិតបឋមសិក្សាប៉ុណ្ណោះ។ បន្ថែមពីលើនេះកម្ពុជាក៏គ្រោងបើកដំណើរការសកម្មភាពសេដ្ឋកិច្ចឡើងវិញតាមបែបគន្លងថ្មីដោយនឹងត្រូវចាប់ផ្តើមពីវិស័យអប់រំ បន្ទាប់មកវិស័យទេសចរណ៍ក្នុងស្រុក និងទេសចរណ៍បរទេសដែលទទួលការចាក់វ៉ាក់សាំងរួចជាដើម»។
លោកក៏បានស្នើសុំឱ្យធនាគារពិភពលោកពិចារណាឡើងវិញលើលក្ខខណ្ឌឥណទានដែលមានកម្រិតសម្បទានខ្ពស់សម្រាប់កម្ពុជាដូចជាបណ្តាដៃគូអភិវឌ្ឍន៍ផ្សេងទៀត និងការពន្យារពេលអនុវត្តលក្ខខណ្ឌឥណទានថ្មីដើម្បីឱ្យកម្ពុជាមានលទ្ធភាពទទួលបានហិរញ្ញប្បទានសម្រាប់ការវិនិយោគហេដ្ឋារចនាសម្ព័ន្ធធំៗដែលគាំទ្រការស្តារសេដ្ឋកិច្ចឡើងវិញក្រោយវិបត្តិកូវីដ។
«សូមធនាគារពិភពលោកជួយកៀរគរធនធានជាហិរញ្ញប្បទានឥណទានឥតសំណងសម្រាប់ហិរញ្ញប្បទានគម្រោងអភិវឌ្ឍន៍ និងគាំពារសង្គមដូចជា គម្រោងអប់រំ អភិវឌ្ឍន៍ជំនាញ និងសុខាភិបាលជាដើម ដែលកំពុងមានតម្រូវការកាន់តែច្រើនជាពិសេសក្នុងបរិការណ៍ក្រោយវិបត្តិនៃជំងឺកូវីដ-១៩»។ នេះបើយោងតាមការលើកឡើងរបស់លោក អូន ព័ន្ធមុនីរ័ត្ន។
រដ្ឋបាលរាជធានីភ្នំពេញបានប្រកាសអនុញ្ញាតឱ្យដំណើរការឡើងវិញនូវគ្រឹះស្ថានសិក្សាសាធារណៈ និងឯកជនសម្រាប់កម្រិតអនុវិទ្យាល័យ និងវិទ្យាល័យដែលមានហានិភ័យទាបចាប់ពីថ្ងៃទី ១៥ ខែកញ្ញា តទៅ ខណៈនៅតាមបណ្តាខេត្តផ្សេងៗទៀតក៏បានត្រៀមរួចរាល់ផងដែរក្នុងដំណើរការបើកសាលាឡើងវិញនេះ ដែលភាគច្រើនគ្រោងនឹងបើកដំណើរការនៅថ្ងៃទី ១៥ ខែកញ្ញា ដូចៗគ្នា។
កាលពីថ្ងៃទី ១ ខែ កញ្ញា ឆ្នាំ ២០២១ ក្រសួងទេសចរណ៍បានដាក់ឱ្យអនុវត្តវិធានសុវត្ថិភាពទេសចរណ៍ និងនីតិវិធីស្តង់ដាប្រតិបត្តិអប្បបរមា (SOP) តាមគន្លងប្រក្រតីភាពថ្មីសម្រាប់អាជីវកម្មទេសចរណ៍ធំៗចំនួន ៤ រួមមាន អាជីវកម្មសេវាកម្មស្នាក់នៅទេសចរណ៍ អាជីវកម្មភោជនីយដ្ឋាន អាហារដ្ឋានទេសចរណ៍ រមណីយដ្ឋានទេសចរណ៍ និងសហគមន៍ទេសចរណ៍ និងអេកូទេសចរណ៍ ដើម្បីអាចរក្សាបាននូវស្ថិរភាពអាជីវកម្ម និងធានាបាននូវសុវត្ថិភាពជូនដល់ភ្ញៀវទេសចរជាតិ និងភ្ញៀវទេសចរអន្តរជាតិ៕ LA