សកម្មភាពម៉ាស៊ីនលើកកុងតឺន័រដាក់លើរថយន្តនៅកំពង់ផែក្រុងព្រះសីហនុ។ ហុង មិនា
ភ្នំពេញៈ អ្នកនាំចេញបានស្វាគមន៍ចំពោះការសម្រេចរបស់កំពង់ផែស្វយ័តក្រុងព្រះសីហនុ (កសស) ដែលបានកែសម្រួលរយៈពេលស្តុកកុងតឺន័រនាំចេញនៅកំពង់ផែស្វយ័តក្រុងព្រះសីហនុ ដោយមិនគិតតម្លៃរយៈពេល ១ សប្តាហ៍ ដែលនឹងចាប់ផ្តើមអនុវត្តនៅខែក្រោយនេះតទៅ។
.jpg)
សេចក្តីជូនដំណឹងពីកំពង់ផែស្វយ័តក្រុងព្រះសីហនុបានឱ្យដឹងថា សេចក្តីសម្រេចនេះធ្វើឡើង ដោយយោងតាមស្មារតីអង្គប្រជុំរវាង កសស ជាមួយតំណាងក្រុមហ៊ុននាវា កាលពីថ្ងៃទី ៣០ ខែសីហា ឆ្នាំ ២០២១។
សេចក្តីជូនដំណឹងចុះហត្ថលេខាដោយ លោក ថៃ ឫទ្ធី អគ្គនាយករង កសស ឱ្យដឹងទៀតថា ដើម្បីសម្របសម្រួលពាណិជ្ជកម្មក្នុងវិស័យដឹកជញ្ជូន និងភ័ស្តុភារកម្មក្នុងគោលដៅសម្រួលដល់ការធ្វើធុរកិច្ច និងការធ្វើពាណិជ្ជកម្មរបស់ធុរជន កំពង់ផែស្វយ័តក្រុងព្រះសីហនុ សូមធ្វើការកែសម្រួលរយៈពេលស្តុកកុងតឺន័រនាំចេញពីការអនុគ្រោះមិនគិតថ្លៃស្តុកក្នុងរយៈពេល ៥ ថ្ងៃ មកអនុគ្រោះមិនគិតថ្លៃស្តុកក្នុងរយៈពេល ៧ ថ្ងៃ គិតចាប់ពីថ្ងៃដែលកុងតឺន័រចូលដល់ទីលានរហូតដល់ថ្ងៃនាវាចេញដំណើរ។ ប៉ុន្តែបើហួសរយៈពេលកំណត់ខាងលើចាប់ពីថ្ងៃទី ៨ គឺគិតថ្លៃស្តុកចំនួន ១ ថ្ងៃ និងកំណើនជាលំដាប់តាមចំនួនថ្ងៃស្តុក។ ចំពោះរយៈពេលស្តុកកុងតឺន័រ ដែលកែសម្រួលថ្មីនេះនឹងត្រូវអនុវត្តចាប់ពីថ្ងៃទី ១ ខែតុលា ឆ្នាំ ២០២១ តទៅ។
លោក ចាន់ ពេជ្រ ប្រធានគ្រប់គ្រងទូទៅក្រុមហ៊ុន Signature of Asia ដែលជាក្រុមហ៊ុននាំចេញអង្ករបានស្វាគមន៍ចំពោះការកែសម្រួលរយៈពេលស្តុកកុងតឺន័រនាំចេញនេះដែលនឹងចូលរួមចំណែកបន្ធូរបន្ថយបន្ទុកបានមួយផ្នែកសម្រាប់អ្នកនាំចេញ។
លោកនិយាយថា៖ «កុងតឺន័រដែលលើកចេញពីកប៉ាល់ ដាក់នៅកំពង់ផែ គឺខាងកប៉ាល់មួយចំនួនមានការខកថ្ងៃដឹកជញ្ជូន ដូចនេះ យើងអាចទុកទូកុងតឺន័រ ២ ថ្ងៃទៀតដោយឥតគិតថ្លៃ ដែលវានឹងជួយកាត់បន្ថយចំណាយយើងបានមួយផ្នែក ប៉ុន្តែមិនបានច្រើនប៉ុន្មានទេ។ យ៉ាងណានេះគឺជាការរួមចំណែកពីគ្រប់ភាគីទាំងអស់»។
លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូនទំនិញ (LOBA) ប្រាប់ ភ្នំពេញ ប៉ុស្តិ៍ថា ការបង្កើនចំនួនថ្ងៃស្តុកទុកទូកុងតឺន័រ ២ ថ្ងៃនេះ នឹងជួយសម្រួលដល់អ្នកនាំចេញក្នុងការកាត់បន្ថយថ្លៃដើមផលិតបានខ្លះៗ។
លោកប្រាប់ថា៖ «ខ្ញុំគិតថាជាការល្អដែលអាចជួយកាត់បន្ថយការចំណាយម្ចាស់ទំនិញ។ កាលពីពេលកន្លងទៅ ម្ចាស់ទំនិញធ្វើការស្តុកលើសក្នុងរយៈពេល ៥ ថ្ងៃចាប់ពីថ្ងៃទី ៦ ទៅ គាត់នឹងត្រូវបង់ថ្លៃស្តុកហួសរយៈពេលកំណត់ ប៉ុន្តែពេលនេះ កសស បានសម្រេចដាក់រហូតដល់ចំនួន ៧ ថ្ងៃដែលម្ចាស់ទំនិញអាចស្តុកបន្តបាន ២ ថ្ងៃទៀតដោយមិនគិតប្រាក់»។
របាយការណ៍របស់កំពង់ផែស្វយ័តក្រុងព្រះសីហនុបានបង្ហាញថា ក្នុងឆ្នាំ ២០២០ បរិមាណកុងតឺន័រឆ្លងកាត់ កសស មានចំនួន ៦៤១ ៨៤២ TEUs កើន ០,៤១ ធៀបឆ្នាំ ២០១៩ ដែលមានចំនួន ៦៣៩ ២១១ TEUs។
ទិន្នន័យឱ្យដឹងទៀតថា នៅក្នុងឆ្នាំ ២០២០ កសស ទទួលបានចំណូលសរុប ៣១១ ៨១៣ ៧៦៩ ០០០ រៀល ធ្លាក់ចុះ ៦,៦២ ភាគរយ និងប្រាក់ចំណេញសុទ្ធក្រោយបង់ពន្ធ ២៦ ៦០៧ ៥៩៤ ០០០ រៀល ថយចុះ ៣៨,៧៨ ភាគរយធៀបឆ្នាំ ២០១៩៕LA
វីដេអូ៖
