i7 Company នឹងនាំគោចំនួន ២០០ ក្បាល ពីអាមេរិកមកទីផ្សារកម្ពុជា ដើម្បីយកគោទាំងនោះធ្វើជាពូជថ្មី និងយកសាច់សម្រាប់ផ្គត់ផ្គង់តម្រូវការទីផ្សារក្នុងស្រុក។ i7 Company
ភ្នំពេញៈ i7 Company ដែលជាក្រុមហ៊ុនគ្រប់គ្រងដោយវិនិយោគិនក្នុងស្រុកមានផែនការនាំចូលគោចំនួន ២០០ ក្បាល ពីអាមេរិកមកចិញ្ចឹមក្នុងស្ថានីយបសុសត្វរបស់ខ្លួន ដើម្បីយកគោទាំងនោះធ្វើជាពូជថ្មី និងយកសាច់សម្រាប់ផ្គត់ផ្គង់តម្រូវការទីផ្សារក្នុងស្រុក។
.jpg)
លោក ស្រី ចន្ធូ នាយកគ្រប់គ្រងក្រុមហ៊ុន i7 បានប្រាប់ភ្នំពេញប៉ុស្តិ៍កាលពីថ្ងៃទី ១៩ ខែតុលា ថា បន្ទាប់ពីមានបទពិសោធលើការចិញ្ចឹមគោជាច្រើនឆ្នាំ ស្របពេលដែលតម្រូវការទីផ្សារមានកាន់តែច្រើន លោកក៏បានសម្រេចចិត្តនាំចូលគោពីអាមេរិកមកលក់ឱ្យកសិករចិញ្ចឹមនៅកម្ពុជា ដែលគោពូជថ្មីនេះនឹងផ្តល់ផលប្រយោជន៍ច្រើន។
លោកថ្លែងថា៖ «យើងចង់ផ្លាស់ប្តូរវិធីចិញ្ចឹមគោបែបប្រពៃណីរបស់ប្រជាជនយើង ម្យ៉ាងទៀតខ្ញុំមើលឃើញឱកាសនៅក្នុងវិស័យនេះ។ ការនាំចូលប្រភេទពូជគោនេះ ក៏អាចរួមចំណែកក្នុងការនាំមកនូវបច្ចេកវិទ្យាបច្ចេកទេសចិញ្ចឹមថ្មីៗសម្រាប់កសិករខ្មែរផងដែរ»។
លោកបន្តថា ធម្មតាកសិករចិញ្ចឹមគោក្នុងស្រុករយៈពេល ២ ឆ្នាំអាចទទួលបាន ២០០-៣០០ គីឡូក្រាមប៉ុណ្ណោះ ប៉ុន្តែសម្រាប់ពូជគោនាំចូលនេះវិញ គឺគោឈ្មោលអាចមានទម្ងន់ពី ១ ៧០០ ទៅ ១ ៨០០ គីឡូក្រាម និងគោញីមានទម្ងន់ពី ៧០០ ទៅ ៨០០ គីឡូក្រាម។
លោកបន្ថែមថា៖ «គោដែលយើងនាំចូលនេះនឹងផ្ដល់ប្រយោជន៍ជាច្រើនដល់អ្នកចិញ្ចឹម។ ពិតហើយ យើងបាននាំចូលគោចំនួន ២៧ ក្បាលរួចហើយតាំងពីថ្ងៃទី ២២ ខែកញ្ញា។ ចំណែកលើកទី ២ នឹងមានគោ ២០០ ក្បាលដែលគ្រោងមកដល់ត្រឹមចុងខែមករា ឬដើមខែកុម្ភៈ ឆ្នាំក្រោយ»។
i7 Company នឹងនាំគោចំនួន ២០០ ក្បាល ពីអាមេរិកមកទីផ្សារកម្ពុជា ដើម្បីយកគោទាំងនោះធ្វើជាពូជថ្មី និងយកសាច់សម្រាប់ផ្គត់ផ្គង់តម្រូវការទីផ្សារក្នុងស្រុក។ i7 Company
បច្ចុប្បន្ននេះក្រុមហ៊ុនមានកសិដ្ឋានចិញ្ចឹមបសុសត្វ ១ កន្លែងលើផ្ទៃដី ៧ ហិកតានៅឃុំវិហារសួគ៌ ស្រុកខ្សាច់កណ្តាល ខេត្តកណ្តាល។ ក្រុមហ៊ុនក៏មានដាំស្មៅចំណីគោផងដែរ។
លោក ស្រី ចន្ធូ បានបញ្ជាក់ថា នៅពេលកសិករទិញគោពូជនេះ ក្រុមហ៊ុនរបស់លោកក៏មានក្រុមបច្ចេកទេសទៅធ្វើការបណ្តុះបណ្តាលអំពីរបៀបនៃការចិញ្ចឹម ការផ្ដល់ចំណី និងការរៀបចំកសិដ្ឋានផងដែរ។
លោកលើកឡើងថា៖ «ខ្ញុំជឿថា ជាមួយនឹងបេសកកម្មរបស់យើងក្នុងការផ្លាស់ប្តូររបៀបរស់នៅ និងការចិញ្ចឹមគោ ពួកគាត់នឹងងាកមកចាប់យកការចិញ្ចឹមគោនាំចូលប្រភេទនេះវិញ ព្រោះវាផ្តល់អត្ថប្រយោជន៍ច្រើនដល់ការផ្គត់ផ្គង់សាច់សម្រាប់ទីផ្សារ»។
បច្ចុប្បន្នក្រៅពី i7 Company ក៏មានក្រុមហ៊ុន Khmer Fresh Milk កំពុងវិនិយោគលើកសិដ្ឋានចិញ្ចឹមគោយកទឹកដោះ ១ កន្លែងនៅក្នុងខេត្តតាកែវ។ ក្រុមហ៊ុននេះគ្រោងនឹងបង្កើនការផលិតទឹកដោះគោស្រស់យីហោ គិរីសួគ៍ ឱ្យដល់ ១២ ០០០ លីត្រ ក្នុង ១ ថ្ងៃត្រឹមដើមឆ្នាំ ២០២២។
ក្រុមហ៊ុន Khmer Fresh Milk ក៏បាននាំចូលពូជគោ Holstein ប្រហែល ៥០០ ក្បាលពីប្រទេសអូស្ត្រាលី មកចិញ្ចឹមក្នុងកសិដ្ឋានរបស់ខ្លួនលើផ្ទៃដី ៣០០ ហិកតានៅក្នុងជ្រលងភ្នំតាមជួរភ្នំតាម៉ៅ ចម្ងាយប្រហែល ៤០ គីឡូម៉ែត្រពីទីក្រុងភ្នំពេញ៕ LA
