ខ្សែចម្លងអគ្គិសនីវ៉ុលខ្ពស់នៅប្រទេសចិនដែលមានវិបត្តិផ្នែកថាមពលអគ្គិសនី។ AFP
ទីក្រុងប៉េកាំងៈ អ្នករៀបចំផែនការសេដ្ឋកិច្ចជាន់ខ្ពស់របស់ចិនបាននិយាយថា ខ្លួនកំពុងពិចារណាអន្តរាគមន៍ដល់ការទាញទម្លាក់ថ្លៃធ្យូងថ្មដែលកើនឡើង ពេលទីក្រុងប៉េកាំងគិតគូរពីការកើនឡើងថ្លៃដើមដែលបានដាក់សម្ពាធកាន់តែខ្លាំងឡើងលើសន្តិសុខថាមពល និងកំណើនសេដ្ឋកិច្ចរបស់ប្រទេស ខណៈដែលកំពុងគំរាមកំហែងដល់សេដ្ឋកិច្ចពិភពលោក។
ទិន្នន័យផ្លូវការបង្ហាញនៅសប្តាហ៍នេះថា ចិនដែលមានសេដ្ឋកិច្ចធំទី ២ ក្នុងពិភពលោកបានរីកលូតលាស់យឺតជាងរំពឹងទុកក្នុងត្រីមាសទី ៣ ពេលដែលវិបត្តិថាមពលបានចាប់ផ្តើមកើតមាន ដោយការខ្វះខាតអគ្គិសនី និងការបន្ថយផលិតកម្មធ្វើឱ្យប៉ះពាល់ដល់ផលិតកម្មឧស្សាហកម្ម។
វិបត្តិកើតមានពេលដែលតម្លៃទំនិញទូទាំងសកលលោកហក់ឡើង ដោយសារការកើនឡើងតម្រូវការ ពេលដែលពិភពលោកបើកឡើងវិញពីការបិទបណ្តាលមកពីការរីករាលដាលកូវីដ ១៩ ខណៈបញ្ហាត្រូវបានធ្វើឱ្យកាន់តែធ្ងន់ធ្ងរឡើងដោយគោលដៅរបស់រដ្ឋាភិបាល ដើម្បីកាត់បន្ថយការបំភាយឧស្ម័ន និងការធ្លាក់ចុះយ៉ាងខ្លាំងនៃការនាំចូលពីប្រទេសអូស្ត្រាលីដោយសារតែការជាប់គាំងផ្នែកនយោបាយ។
កាលពីថ្ងៃអង្គារ គណៈកម្មការអភិវឌ្ឍន៍ និងកែទម្រង់ជាតិ (NDRC) បាននិយាយថាខ្លួនកំពុងសិក្សាវិធានការដើម្បីដាក់កំណត់តម្លៃធ្យូងថ្ម ដែលឡើងខ្ពស់ក្នុងកំណត់ត្រា។
ក្នុងសេចក្តីថ្លែងការតាមអនឡាញដែលបានផ្សព្វផ្សាយ បន្ទាប់ពីកិច្ចប្រជុំជាមួយអ្នកដឹកនាំឧស្សាហកម្ម NDRC បានកត់សម្គាល់ថា តម្លៃបានកើនឡើងយ៉ាងរហ័ស ឡើងខ្ពស់ជាបន្តបន្ទាប់ ដែលបង្ខំថ្លៃដើមផលិតកម្មហក់ឡើងយ៉ាងខ្លាំង ហើយប៉ះពាល់លើការផ្គត់ផ្គង់ថាមពល និងកំដៅនៅរដូវរងារដ៏អាក្រក់»។
NDRC បានព្រមានថា ខ្លួននឹងមិនអត់ឱនទេ និងបង្ក្រាបឱ្យធ្ងន់ធ្ងរលើសកម្មភាពដូចជាការផ្សព្វផ្សាយព័ត៌មានមិនពិត ឬក៏ការគប់គិតគ្នាលើតម្លៃ ធ្វើដូចនេះដើម្បីរក្សាការបញ្ជាទិញពីទីផ្សារ។
NDRC អះអាងថា៖ «ការកើនឡើងតម្លៃបច្ចុប្បន្ននេះបានងាកចេញពីមូលដ្ឋាននៃការផ្គត់ផ្គង់ និងតម្រូវការ» ដោយសន្យាធ្វើឱ្យតម្លៃវិលត្រឡប់មកកាន់កម្រិតសមរម្យវិញ។
នៅក្នុងសេចក្តីជួនដំណឹងដាច់ដោយឡែកកាលពីថ្ងៃអង្គារ ភ្នាក់ងារនេះបានសង្កត់ធ្ងន់ថា រ៉ែធ្យូងថ្មក្នុងប្រទេសចិនគួរតែប្រឹងប្រែង ដើម្បីសម្រេចឱ្យបានផលិតផលធ្យូងថ្មជាង ១២ លានតោនប្រចាំថ្ងៃ ដោយអាជ្ញាធរក្នុងតំបន់ដើម្បីធានាផលិតឱ្យដល់កម្រិតអតិបរមា។
ជិត ៦០ ភាគរយនៃសេដ្ឋកិច្ចដែលស្រេកឃ្លានថាមពលរបស់ចិន ដើរដោយថាមពលធ្យូថ្ម ហើយវាបានតស៊ូដើម្បីផ្តាច់ខ្លួនចេញពីឥន្ធនៈ បើទោះបីជាមានការប្តេជ្ញាថានឹងក្លាយជាអព្យាក្រឹតកាបូននៅឆ្នាំ ២០៦០ ក៏ដោយ៕ RR
