ភ្នំពេញៈ រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្ដិ បានស្នើប្រទេសអូស្ត្រាលីជួយផ្ដល់ជំនួយបច្ចេកទេស និងកិច្ចសហប្រតិបត្តិការបន្ថែមទៀតដល់កម្ពុជា ដើម្បីគាំទ្រដំណើរការអភិវឌ្ឍសេដ្ឋកិច្ច ជាពិសេសវិស័យពាណិជ្ជកម្ម ខណៈទំហំពាណិជ្ជកម្មទ្វេភាគី ២ បានកើនឡើងជាបន្តបន្ទាប់។
ការលើកឡើងនេះធ្វើឡើងក្នុងជំនួបពិភាក្សាទ្វេភាគីតាមប្រព័ន្ធវីដេអូកាលពីថ្ងៃទី ២៥ ខែតុលា រវាងថ្នាក់ដឹកនាំក្រសួងពាណិជ្ជកម្មកម្ពុជាដឹកនាំដោយលោក ប៉ាន សូរស័ក្តិ និងភាគីអូស្ត្រាលីដឹកនាំដោយលោក Dan Tehan រដ្ឋមន្ដ្រីពាណិជ្ជកម្ម ទេសចរណ៍ និងវិនិយោគ ប្រទេសអូស្ដ្រាលី ព្រមទាំងមានការចូលរួមរបស់លោក Pablo Kang ឯកអគ្គរាជទូតអូស្ត្រាលីប្រចាំកម្ពុជាផងដែរ។
លោក សូរស័កិ្ត បានលើកឡើងថា ប្រទេសអូស្ដ្រាលីតែងតែផ្ដល់ជំនួយដល់កម្ពុជាលើដំណើរការអភិវឌ្ឍសង្គម សេដ្ឋកិច្ច ពិសេសវ៉ាក់សាំងប្រឆាំងជំងឺកូវីដ ១៩ ដែលនេះជាកត្តាដ៏សំខាន់ក្នុងការជួយឱ្យកម្ពុជាអាចបើកប្រទេសឡើងវិញបានលឿនពីវិបត្តិជំងឺកូវីដ ១៩។
លោកលើកឡើងថា៖ «ខ្ញុំសូមថ្លែងអំណរគុណដល់រដ្ឋាភិបាលអូស្ដ្រាលី ដែលតែងជួយគាំទ្រ និងផ្ដល់ជំនួយបច្ចេកទេសដល់កម្ពុជា ដើម្បីគាំទ្រដល់ដំណើរការអភិវឌ្ឍសេដ្ឋកិច្ច ពិសេសវិស័យពាណិជ្ជកម្ម។ កម្ពុជាប្តេជ្ញានឹងបន្ដពង្រឹង និងពង្រីកកិច្ចសហប្រតិបត្តិការទ្វេភាគីឱ្យកាន់តែរឹងមាំបន្ថែមទៀត»។
ក្នុងឱកាសនោះ លោក Dan Tehan ក៏បានលើកសសើររាជរដ្ឋាភិបាលកម្ពុជា ទាក់ទងនឹងការគ្រប់គ្រងការរាតត្បាតជំងឺកូវីដ ១៩ បានល្អ និងទទួលជោគជ័យយ៉ាងធំធេងលើយុទ្ធនាការចាក់វ៉ាក់សាំង។ ជាមួយគ្នានេះការធ្វើពាណិជ្ជកម្មរបស់ប្រទេសទាំង ២ ក៏កំពុងបង្ហាញពីសញ្ញាវិជ្ជមានផងដែរ។
លោកលើកឡើងថា៖ «ខ្ញុំកត់សម្គាល់ឃើញថា ទំហំពាណិជ្ជកម្មទ្វេភាគីរវាងប្រទេសទាំងពីរមានកំណើនជាបន្ដបន្ទាប់ពីមួយឆ្នាំទៅមួយឆ្នាំ»។
ក្នុងជំនួបនេះ ភាគីទាំង ២ ក៏បានពិភាក្សា និងផ្លាស់ប្ដូរយោបល់គ្នាលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (អាសិប) ដែលកម្ពុជា និងអូស្ដ្រាលី គឺជាសមាជិក។ សម្រាប់ប្រទេសកម្ពុជា នីតិវិធីនៃការប្រកាសឱ្យដំណើរការ កិច្ចព្រមព្រៀងអាសិបត្រូវបានព្រះមហាក្សត្រប្រកាសឱ្យប្រើប្រាស់ជាផ្លូវការហើយកាលពីថ្ងៃទី ៥ ខែតុលា ឆ្នាំ ២០២១។
តាមរយៈកិច្ចសហប្រតិបត្តិការល្អរវាងរដ្ឋាភិបាលប្រទេសទាំង ២ បច្ចុប្បន្ននៅកម្ពុជាមានក្រុមហ៊ុនរុករករ៉ែ Renaissance Minerals Cambodia Limited ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Emerald Resources មានមូលដ្ឋាននៅក្នុងទីក្រុង Perth ប្រទេសអូស្ត្រាលីកំពុងធ្វើប្រតិបត្តិរុករក និងចម្រាញ់រ៉ែមាសនៅតំបន់អូរខ្វាវនៃខេត្តមណ្ឌលគិរី។
យោងតាមទិន្នន័យពីក្រសួងពាណិជ្ជកម្មក្នុងឆ្នាំ ២០២០ ពាណិជ្ជកម្មទ្វេភាគីរវាងកម្ពុជា និងអូស្ត្រាលីមានទឹកប្រាក់សរុប ២១៣,៦៤ លានដុល្លារ កើនឡើង ៣,៨២ ភាគរយធៀបឆ្នាំ ២០១៩៕ LA