AEON ជាផ្សារទំនើបលក់រាយវិនិយោគដោយជប៉ុននៅក្នុងប្រទេសវៀតណាម។ VNA
ទីក្រុងហាណូយៈ សមាមាត្រនៃសហគ្រាសជប៉ុនដែលកំពុងប្រតិបត្តិការនៅប្រទេសវៀតណាមបានព្យាករថានឹងទទួលបានប្រាក់ចំណេញក្នុងសកម្មភាពអាជីវកម្មកាលពីឆ្នាំមុន គឺ ៥៤,៣ ភាគរយកើនឡើង ៤,៧ ពិន្ទុ ធៀបនឹងឆ្នាំ ២០២០។
តួលេខនេះ គឺជាផ្នែកមួយនៃការស្ទង់មតិលើការវិនិយោគរបស់ជប៉ុននៅតំបន់អាស៊ី និងអូសេអានី ឆ្នាំ ២០២១។ តំណាង Jetro នៅទីក្រុងហាណូយលោក Takeo Nakajima បានបង្ហាញតួលេខនេះក្នុងកិច្ចប្រជុំនៅទីក្រុងហាណូយកាលពីថ្ងៃពុធ។
នៅក្នុងការស្ទង់មតិលើកទី ៣៥ នេះ កម្មវិធីបានទទួលការឆ្លើយតបពីសហគ្រាសជប៉ុនចំនួន ៧០២ ដែលកំពុងប្រតិបត្តិការនៅវៀតណាម។
គួរកត់សម្គាល់ថា រយៈពេលនៃការស្ទង់មតិ គឺចាប់ពីថ្ងៃទី ២៥ ខែសីហា ដល់ថ្ងៃទី ២៤ ខែកញ្ញា ឆ្នាំមុន ស្របពេលដែលប្រទេសវៀតណាមបានអនុវត្តវិធានការរក្សាគម្លាតសង្គមយ៉ាងតឹងរ៉ឹងដោយសារជំងឺរាតត្បាតកូវីដ ១៩។
លោក Nakajima បាននិយាយថា ដូច្នេះវាប៉ះពាល់ដល់លទ្ធផលឆ្លើយតបរបស់សហគ្រាស។
ទោះជាយ៉ាងណា ចំនួនធុរកិច្ចជប៉ុនដែលកំពុងវិនិយោគ និងប្រតិបត្តិការនៅវៀតណាមបាននិយាយថា ប្រាក់ចំណេញរបស់ពួកគេមានភាពប្រសើរឡើងឈានដល់ ៣១,៤ ភាគរយ ដែលជាការកើនឡើងបើធៀបនឹងការស្ទង់មតិចុងក្រោយក្នុងឆ្នាំ ២០២០។
ម្យ៉ាងទៀត ដោយសារឥទ្ធិពលនៃជំងឺរាតត្បាតកូវីដ ១៩ ការងើបឡើងនៃអាជីវកម្មគឺយឺតជាងប្រទេសដទៃទៀត។
ជាក់ស្តែងនៅក្នុងតំបន់ភាគខាងត្បូង និងកណ្តាលនៃប្រទេសវៀតណាម អាជីវកម្មជាង ៤០ ភាគរយបានឆ្លើយថា ប្រាក់ចំណេញប្រតិបត្តិការរបស់ពួកគេ «ធ្លាក់ចុះ» ដោយសារតែការថយចុះនៃអត្រាប្រតិបត្តិការ។
ចំពោះឧស្សាហកម្មផលិតកម្ម សមាមាត្រនៃសហគ្រាសដែលរាយការណ៍ប្រាក់ចំណេញគឺ ៥៧,៥ ភាគរយ ខណៈសហគ្រាសមិនមែនផលិតកម្មមាន ៥១,៥ ភាគរយ។
ឆ្ពោះទៅកាន់ឆ្នាំថ្មី ៥៦,២ ភាគរយនៃអាជីវកម្មដែលបានស្ទង់មតិបានឆ្លើយថា «មានភាពប្រសើរឡើង» ទាក់ទងនឹងការរំពឹងទុកប្រាក់ចំណេញអាជីវកម្មបើប្រៀបធៀបទៅនឹងឆ្នាំមុន។
ភាគរយនៃសហគ្រាសដែលមានបំណងពង្រីកអាជីវកម្មរបស់ខ្លួនក្នុងប្រទេសវៀតណាមក្នុងរយៈពេលពី ១ ទៅ ២ ឆ្នាំខាងមុខ គឺ ៥៥,៣ ភាគរយកើនឡើង ៨,៥ ពិន្ទុធៀបនឹងឆ្នាំមុន ដោយជាប់ចំណាត់ថ្នាក់ទី ១ ក្នុងតំបន់អាស៊ាន និងទី ៤ ក្នុងចំណោមប្រទេសចំនួន ២០ សម្រាប់ការស្ទង់មតិ មានតែនៅពីក្រោយប្រទេសឥណ្ឌា បង់ក្លាដែស និងប៉ាគីស្ថានប៉ុណ្ណោះ។
លោក Nakajima បាននិយាយថា ភាគរយនៃអាជីវកម្មដែលចង់ពង្រីកប្រតិបត្តិការក្នុងប្រទេសវៀតណាមបានថយចុះបើធៀបទៅនឹងមុនពេលជំងឺរាតត្បាត។ ទោះជាយ៉ាងណា នេះគឺជានិន្នាការទូទៅនៅក្នុងទីផ្សារផ្សេងទៀត មិនត្រឹមតែវៀតណាមប៉ុណ្ណោះទេ ដោយសារផលប៉ះពាល់នៃជំងឺកូវីដ ១៩។
លោកបានបន្ថែមថា វៀតណាមក៏ជាប្រទេសមួយដែលមានអត្រាសហគ្រាសពង្រីកផលិតកម្មខ្ពស់ជាងគេនៃតំបន់អាស៊ាន។
នៅក្នុងលក្ខខណ្ឌនៃគុណសម្បត្តិនៃបរិយាកាសវិនិយោគ សមត្ថភាពទីផ្សារ សក្តានុពលនៃការអភិវឌ្ឍ ស្ថិរភាពនយោបាយ និងសង្គម និងបុគ្គលិកដែលមានគុណភាពខ្ពស់ គឺជាចំណុចលេចធ្លោរបស់វៀតណាម បើធៀបនឹងប្រទេសអាស៊ានដទៃទៀត។
ទោះបីជាប្រាក់ឈ្នួលអប្បបរមាកាលពីឆ្នាំមុនមិនបានកើនឡើងក៏ដោយ ប៉ុន្តែប្រាក់ឈ្នួលនៅក្នុងអាជីវកម្មជប៉ុនបានកើនឡើងជាមធ្យម ៥,៤ ភាគរយ។
របាយការណ៍របស់ Jetro ក៏បង្ហាញដែរថា អាជីវកម្មក្នុងប្រទេសវៀតណាមចាប់អារម្មណ៍បំផុតលើ «ការសន្សំថាមពល និងធនធានសន្សំ» ក្នុងនិន្នាការនៃកិច្ចខិតខំប្រឹងប្រែងកាត់បន្ថយការបញ្ចេញឧស្ម័នផ្ទះកញ្ចក់។
មានសហគ្រាសតិចតួចដែលធ្វើកិច្ចសហប្រតិបត្តិការជាមួយក្រុមហ៊ុនចាប់ផ្តើមអាជីវកម្មរបស់វៀតណាម (៥ ភាគរយ) និងសហគ្រាសមានបំណងសហការ (៣ ភាគរយ) ប៉ុន្តែសហគ្រាសដែលចាប់អារម្មណ៍លើកិច្ចសហប្រតិបត្តិការមានចំនួន ៣០ ភាគរយ ខ្ពស់ជាងមធ្យមភាគនៃតំបន់អាស៊ី និងអូសេអានី។
ទាក់ទិននឹងការរំពឹងទុកនៃរំហូរមូលធនថ្មីក្នុងឆ្នាំថ្មី Jetro ជឿជាក់ថា នៅពេលដែលផ្លូវហោះហើរអន្តរជាតិរវាងប្រទេសទាំង ២ ត្រូវបានស្តារឡើងវិញ និងមានស្ថិរភាពដោយទិន្នន័យនេះនឹងបង្កើតមូលដ្ឋានសម្រាប់សហគ្រាសជប៉ុនសិក្សាបរិយាកាសធុរកិច្ចវៀតណាម និងធ្វើការសម្រេចចិត្ត៕VNS-ANN/RR
