ទីក្រុង កាត់ថ្មាន់ឌូ: និយតករទូរគមនាគមន៍របស់ប្រទេសនេប៉ាល់នឹងព្រាងគោលនយោបាយបច្ចេកវិទ្យាព័ត៌មាន និងទូរគមនាគមន៍ (ICT) រួមបញ្ចូលគ្នាដើម្បីបង្កើនលទ្ធភាពទទួលបានបច្ចេកវិទ្យាព័ត៌មាន (IT) ចំពោះគ្រប់ទិដ្ឋភាពសង្គម និងការអភិវឌ្ឍ និងដើម្បីចៀសវាងការកើនឡើងគម្លាតឌីជីថល។
ប្រទេសនេប៉ាល់បានសង្កេតឃើញថាមានការរីកចម្រើនគួរឱ្យចាប់អារម្មណ៍នៅក្នុងវិស័យព័ត៌មាន និងទូរគមនាគមន៍ ក្នុងរយៈពេលជាច្រើនឆ្នាំចុងក្រោយនេះ។
ទោះបីការប្រើប្រាស់អ៊ីនធឺណិតនៅតាមបណ្ដាប្រទេសអភិវឌ្ឍន៍តិចតួច (LDC) ដូចជា នេប៉ាល់កំពុងកើនឡើងយ៉ាងឆាប់រហ័សក៏ដោយក៏ភាពខុសគ្នានៅតែមានរវាងក្រុមផ្សេងៗគ្នា។ ជាឧទាហរណ៍ភាគរយនៃស្ត្រីដែលប្រើប្រាស់អ៊ីនធឺណិតគឺទាបជាងបុរស។ លើសពីនេះមានភាពមិនស្មើគ្នាដែលសង្កេតឃើញរវាងបុគ្គលដែលរស់នៅក្នុងទីក្រុង និងតំបន់ជនបទ។
លោក Min Prasad Aryal នាយកអាជ្ញាធរទូរគមនាគមន៍នេប៉ាល់បានថ្លែងថា៖ «ជាមួយនឹងការរីកចម្រើនយ៉ាងខ្លាំងផ្នែក ICT មានបញ្ហាជាច្រើនដែលយើងត្រូវដោះស្រាយទៅតាមពេលវេលាដែលផ្លាស់ប្តូរ»។
លោកបានបន្តថា សេចក្តីព្រាងដែលបានស្នើឡើង រំពឹងថានឹងបម្រើជាក្របខ័ណ្ឌគោលនយោបាយការពារដោយរួមបញ្ចូលវិស័យទូរគមនាគមន៍ និងអ៊ីនធឺណិត ICT និងទិដ្ឋភាពសេដ្ឋកិច្ចឌីជីថល ដើម្បីបំពេញតម្រូវការការអភិវឌ្ឍរបស់ប្រទេសមួយនេះ។
ពិភពលោកកំពុងផ្លាស់ប្តូរ។ គំរូអាជីវកម្មដែលរីកចម្រើនរហ័ស និងបច្ចេកវិទ្យាដែលរំខានដូចជាបញ្ញាសិប្បនិមិ្មត (AI) មនុស្សយន្ត និងសង្គមអ៊ីនធឺណិតកំពុងផ្លាស់ប្តូររបៀបធ្វើការងារ។
បច្ចេកវិទ្យាឌីជីថលទាំងនេះកំពុងអាចឱ្យរដ្ឋាភិបាល និងសហគ្រាសនៅទូទាំងពិភពលោក លើកកម្ពស់សក្តានុពលដើម្បីសម្រេចបានកំណើនដ៏រហ័ស។
មានការភ្ជាប់ទំនាក់ទំនងយ៉ាងរឹងមាំរវាងការទទួលយកឌីជីថល និងកំណើនផលិតផលក្នុងស្រុកសរុប (GDP)។ យោងតាមរបាយការណ៍របស់ធនាគារពិភពលោករាល់ការកើនឡើង ១០ ភាគរយនៃការចូលទីផ្សាររបស់អ៊ីនធឺណិតក្នុងប្រទេសមួយបណ្តាលឱ្យមានកំណើនសេដ្ឋកិច្ចកើនឡើង ១,៣ ភាគរយ។
រដ្ឋាភិបាលនេប៉ាល់បានបង្កើតគោលនយោបាយទូរគមនាគមន៍ឆ្នាំ ២០០៤ គោលនយោបាយអ៊ីនធឺណិតជាតិឆ្នាំ ២០១៤ និងគោលនយោបាយបច្ចេកវិទ្យាព័ត៌មាន និងទូរគមនាគមន៍ជាតិចុងក្រោយនៅឆ្នាំ ២០១៥។
ប៉ុន្តែសព្វថ្ងៃនេះបច្ចេកវិទ្យាត្រូវពឹងផ្អែកលើពិធីសារអ៊ីនធឺណិត (IP) ហើយទាមទារឱ្យមានការឆ្លើយតបគោលនយោបាយទំនាក់ទំនង និងរួមបញ្ចូលគ្នា។ បច្ចេកវិទ្យាដែលមានមូលដ្ឋានលើ IP គឺក្រុមហ៊ុនសេវាសាជាសំឡេង (VoIP) ការផ្សាយតាមអ៊ីនធឺណិត និងបច្ចេកវិទ្យាទូរស័ព្ទចល័តឥតខ្សែ។
លោក Aryalបានថ្លែងថា៖ «គោលនយោបាយដែលមានស្រាប់ទាំងអស់នេះនឹងត្រូវបានដាក់បញ្ចូលទៅក្នុងគោលនយោបាយដ៏ទូលំទូលាយមួយ»។
ខណៈពេលដែលការរីករាលដាលជំងឺកូវីដ ១៩ បានជះឥទ្ធិពលយ៉ាងខ្លាំងទៅលើសកម្មភាពសេដ្ឋកិច្ច ស្ថានភាពបែបនេះក៏បានបណ្តាលឱ្យមានការកើនឡើងពិសេសក្នុងការប្រើប្រាស់ដំណោះស្រាយឌីជីថលផ្សេងៗផងដែរ។
បុគ្គលិកបម្រើការងារនៅតាមក្រុមហ៊ុនឯកជន និងស្ថាប័នរបស់រដ្ឋនៅជុំវិញពិភពលោកបានផ្លាស់ប្តូរទៅធ្វើការពីផ្ទះ និងសន្និសីទអនឡាញ ខណៈដែលសិស្សជាច្រើនត្រូវរៀនពីចម្ងាយដែលគាំទ្រដោយបច្ចេកវិទ្យាឌីជីថលផ្សេងៗគ្នា៕ THE KATHMANDU POST (NEPAL)-ANN/LA